பாஸ்போர்ட்டில் ஆதார் எண் இணைப்பது அவசியமா? மண்டல அதிகாரி விளக்கம்

சென்னை:சென்னை மண்டல பாஸ்போர்ட் அதிகாரி கே.பாலமுருகன் நேற்று சாஸ்திரிபவனில் நிருபர்களுக்கு பேட்டி அளித்தார். அப்போது அவர் கூறியதாவது:-

இந்திய அளவில் உள்ள மண்டல பாஸ்போர்ட் அலுவலகங்களிலேயே விரைவான மற்றும் சிறந்த சேவைக்கான விருதை சமீபத்தில் சென்னை மண்டல அலுவலகம் பெற்றிருக்கிறது. சென்னை மண்டலத்தை பொறுத்தவரையில் சாலிகிராமம், அமைந்தகரை, தாம்பரம் என 3 இடங்களில் சேவை மையங்கள் செயல்பட்டு வருகின்றன. 2014-15-ம் ஆண்டில் இதுவரை 4 லட்சத்து 14 ஆயிரத்து 892 விண்ணப்பங்கள் வினியோகிக்கப்பட்டுள்ளன. கடந்த ஆண்டை காட்டிலும் இந்த ஆண்டில் கூடுதலாக 25 ஆயிரத்துக்கும் அதிகமான விண்ணப்பங்கள் வினியோகிக்கப்பட்டு இருக்கின்றன. ஒரு நாளில் 2 ஆயிரம் பாஸ்போர்ட்டுகள் வினியோகம் செய்யும் வகையில் சிறப்பான வளர்ச்சி அடைந்துள்ளோம்.

பாஸ்போர்ட் வைத்திருக்கும் அல்லது விண்ணப்பம் செய்திருப்பவர்களுக்கு தங்களது பாஸ்போர்ட்டின் நிலை என்ன? என்பது குறித்து தெரியவில்லை. எனவே ஒவ்வொரு மண்டல அலுவலகத்திலும் ‘சோசியல் ஆடிட் செல்’ எனப்படும் பயனாளர்கள் குறைதீர்க்கும் மையம் ஏற்படுத்தப்பட்டுள்ளது.

இந்த மையங்களுக்கு சென்று பாஸ்போர்ட் தொடர்பான சந்தேகங்கள், விளக்கங்கள், கருத்துகள் போன்றவற்றை கேட்டு பயனடையலாம். பாஸ்போர்ட் பெறுவதற்கான விண்ணப்பங்களை பூர்த்தி செய்யத் தெரியாதவர்களிடம் இடைத்தரகர்கள் சென்று, கணிசமான தொகையை வாங்குவதாக புகார்கள் வருகின்றன. எனவே இடைத்தரகர்களிடம் பொதுமக்கள் ஏமாற வேண்டாம்.

இதனைத் தடுக்க மண்டல அலுவலகங்களில் பொது சேவை மையம் ஏற்படுத்தப்பட்டுள்ளது. இந்த மையங்களில் முறைப்படி படிவங்களை விண்ணப்பிக்க உதவி செய்யப்படும். இதற்காக ரூ.100 கட்டணமாக வசூலிக்கப்படும். விரைவில் இந்த மையங்களை எல்லா மாவட்ட கலெக்டர் அலுவலகங்களிலும் அமைக்க திட்டமிடப்பட்டுள்ளது. இதன் மூலம் பாஸ்போர்ட் விண்ணப்பங்கள் பூர்த்தி செய்யப்படுவதில் இடைத்தரகர்கள் பிரச்சினை தடுக்கப்படும். பாஸ்போர்ட் பெறுவதற்கான போலீசார் விசாரணையிலும் புதிய திட்டங்கள் கொண்டு வர திட்டமிடப்பட்டு வருகிறது.

வருகிற செப்டம்பர் மாதம் புதுச்சேரியில் புதிதாக பாஸ்போர்ட் சேவை மையம் திறக்கப்பட உள்ளது. இதனால் கடலூர், காரைக்கால் உள்ளிட்ட மாவட்டங்களை சேர்ந்தவர்கள் இனி புதுச்சேரியிலேயே பாஸ்போர்ட் விண்ணப்பித்து பெற்றுக் கொள்ளலாம். சென்னை வரும் தேவை இருக்காது.

தற்போது பாஸ்போர்ட் விண்ணப்பித்து பெறுவதற்கு அதிகபட்சமாக 24 நாட்கள் ஆகும். எதிர்காலத்தில் புதிய திட்டங்கள் கொண்டு வரப்பட்டு நாட்கள் குறைக்கப்படலாம். ரூபாய் நோட்டுகளில் உள்ளது போல பாஸ்போர்ட்டிலும் ஏராளமான ரகசிய குறியீடுகள் இடம்பெறும் வகையில் தயாரிக்கப்படுகின்றன. எனவே போலி பாஸ்போர்ட்டுகள் தயாரிக்கும் தேச விரோத நடவடிக்கைகள் இனி இருக்காது என்று நம்புகிறோம்.

போலி ஆவணங்கள் மூலம் பாஸ்போர்ட் பெறும் முயற்சி தடுத்து நிறுத்தப்பட்டுள்ளது. இதுதொடர்பாக 150 வழக்குகள் பதிவு செய்யப்பட்டுள்ளன. தற்போது பாஸ்போர்ட் வழங்கும் பணிகளில் டி.சி.எஸ். நிறுவனத்துடன் இணைந்து ஒப்பந்தம் போடப்பட்டுள்ளது. இந்த உடன்படிக்கை வருகிற 2018-ம் ஆண்டு வரை உள்ளது. சேவை தரம் சரியாக இருக்கும் பட்சத்தில் இந்த உடன்படிக்கை தொடரப்படும்.

பாஸ்போர்ட்டில் ஆதார் எண்ணை இணைப்பது அவசியமா? என்று பொதுமக்களிடையே குழப்பம் இருந்து வருகிறது. பாஸ்போர்ட்டில் ஆதார் எண்ணை இணைப்பது நல்லது தான். அதுவும் ஒரு வகையில் சாட்சிதான். ஆனால் ஆதார் எண்ணை இணைக்கவேண்டும் என்று கட்டாயமில்லை. எனவே பொதுமக்கள் குழப்பம் அடைய வேண்டாம்.

பாஸ்போர்ட் தேவை அதிகம் உள்ள மாநிலங்களில் இந்தியாவிலேயே தமிழகம் 3-வது இடத்திலேயே இருக்கிறது. முதல் இரு இடங்களில் முறையே மகாராஷ்டிரா, கேரளா மாநிலங்கள் உள்ளன. வெளிநாடுகளில் வேலை வாய்ப்பு என்று ஆசைப்பட்டு சில போலி நிறுவனங்களை நம்பி பெரும்பாலானோர் ஏமாந்து வருகிறார்கள். எனவே பொதுமக்களுக்கு மாவட்ட வாரியாக விழிப்புணர்வு முகாம்கள் நடத்தப்பட்டு, போலி நிறுவனங்கள் தொடர்பாக விளக்கம் அளிக்கப்பட உள்ளது. எனவே பொதுமக்கள் யாரும் போலி நிறுவனங்களை நம்பி ஏமாந்து விட வேண்டாம்.

இவ்வாறு அவர் கூறினார்.

பேட்டியின்போது, மண்டல பாஸ்போர்ட்டு உதவி அதிகாரி ஆர்.பாலசுப்பிரமணியன், பத்திரிகை தகவல் அலுவலகம் (சென்னை) கூடுதல் தலைமை இயக்குனர் கே.எம்.ரவீந்திரன் ஆகியோர் உடன் இருந்தனர்.