சென்னை : தமிழகம் முழுவதும் இருசக்கர வாகன ஓட்டிகள் கட்டாயம் ஹெல்மெட் அணிவது இன்று முதல் அமலாகிறது. இதனை சோதனை செய்ய போலீசார் களம் இறங்குகின்றனர்.இருசக்கர வாகனங்களில் செல்பவர்களில் பெரும்பாலானவர்கள், விபத்தில் சிக்கும் போது தலையில் அடிபடுவதாலேயே உயிரிழக்கிறார்கள். இதனை கருத்தில் கொண்டு, சென்னை உயர்நீதிமன்ற நீதிபதி கிருபாகரன், 2 வாரங்களுக்கு முன்னர் அதிரடி தீர்ப்பு ஒன்றை வழங்கினார்.
இருசக்கர வாகனம் ஓட்டுபவர்களும், பின்னால் அமர்ந்திருப்பவர்களும் கட்டாயம் ஹெல்மெட் அணிய வேண்டும். போலீசார் இதனை தீவிரமாக கண்காணித்து நடவடிக்கை எடுக்க வேண்டும் என்று நீதிபதி உத்தரவிடப்பட்டிருந்தார். ஹெல்மெட் அணியாமல் வாகனம் ஓட்டுபவர்களின் ஆவணங்களை பறிமுதல் செய்ய வேண்டும் என்றும் தீர்ப்பில் குறிப்பிடப்பட்டிருந்தது.இதையடுத்து நீதிமன்ற உத்தரவை அமல்படுத்த தமிழக அரசு தீவிர நடவடிக்கையை எடுத்துள்ளது. இன்று முதல் நீதிமன்ற உத்தரவுக்கு இணங்க, இருசக்கர வாகனங்களில் செல்பவர்கள் கட்டாயம் ஹெல்மெட் அணிய வேண்டும் என்று அறிவிக்கப்பட்டுள்ளது.இதன்படி தமிழகம் முழுவதும் இன்று முதல் கட்டாய ஹெல்மெட் தீவிரமாக அமல்படுத்தப்படுகிறது. இதற்காக அனைத்து மாவட்டங்களிலும் போலீசார் சிறப்பு குழுக்களை அமைத்துள்ளனர்.இக்குழுவில் இடம் பெற்றுள்ள போலீசார் சாலை சந்திப்புகளில் நின்று கொண்டு ஹெல்மெட் அணியாமல் இருசக்கர வாகனங்களில் செல்பவர்கள் மீது நடவடிக்கை எடுக்க தயாராகி வருகிறார்கள்.
இதுநாள் வரையில் ஹெல்மெட் அணியாமல் மோட்டார் சைக்கிளில் சென்று பிடிபட்டவர்களுக்கு 'ஸ்பாட் பைன்' விதிக்கப்பட்டு வந்தது. முதல்முறை சிக்கினால் ரூ. 100-ம், 2-வது முறை பிடிபட்டால் ரூ. 300-ம் அபராதமாக விதிக்கப்பட்டது.3-வது முறையாகவும் ஹெல்மெட் அணியாமல் ஒருவர் பிடிபட்டால் மட்டுமே இரு சக்கர வாகனங்களுக்குரிய ஆர்.சி.புத்தகம், லைசென்ஸ் உள்ளிட்ட ஆவணங்கள் பறிமுதல் செய்யப்பட்டு வந்தன. ஆனால் இனி 'ஸ்பாட் பைன்' விதிக்கப்பட மாட்டாது.இன்று முதல் ஹெல்மெட் அணியாமல் இருசக்கர வாகனம் ஓட்டுபவர்களின் லைசென்ஸ் உள்ளிட்ட ஆவணங்கள், மோட்டார் சைக்கிள் ஆகியவை உடனடியாக பறிமுதல் செய்யப்படும்.ஹெல்மெட் அணியாமல் வந்தவர், புதிய 'ஹெல்மெட்'டை வாங்கியதற்கான ரசீதை காட்டிய பின்னரே இவை திருப்பி ஒப்படைக்கப்படும். பறிமுதல் செய்யப்படும் மோட்டார் சைக்கிள் மற்றும் ஆவணங்களை நீதிமன்றம் மூலமே திரும்ப பெறமுடியும்.மோட்டார், சைக்கிளில் பின்னால் அமர்ந்திருப்பவரும் ஹெல்மெட் அணிவது கட்டாயமாக்கப்பட்டுள்ளது. பெண்களும் அவசியம் ஹெல்மெட் அணிய வேண்டும்.இன்று முதல் கட்டாய ஹெல்மெட் அமல்படுத்தப்பட்டாலும் ஹெல்மெட் அணியாமல் இருசக்கர வாகனம் ஓட்டுபவர்கள் மீது போலீசார் தொடர்ந்து நடவடிக்கை எடுத்துக் கொண்டுதான் இருக்கிறார்கள். இந்த ஆண்டு (மே மாதம் வரை) இதுவரையில் 90 ஆயிரம் வழக்குகள் பதிவாகி உள்ளன.கடந்த 3 ஆண்டுகளில் சுமார் 3 லட்சம் வழக்குகள் போடப்பட்டுள்ளன. கடந்த ஆண்டு மோட்டார் சைக்கிள் விபத்தில் 571 பேர் பலியாகி இருக்கிறார்கள். இந்த ஆண்டு மே மாதம் வரை 227 பேர் உயிரிழந்திருப்பது குறிப்பிடத்தக்கது.
0 கருத்துகள்:
கருத்துரையிடுக