மாவட்ட கடலோரக் கண்காணிப்பில் அதிநவீன ஏ.டி.வி. வாகனம்

கடலூர்:கடலூர் மாவட்ட கடலோரக் காவல்படையின் கண்காணிப்புப் பணிக்காக அதிநவீன ஏ.டி.வி. வாகனம் திங்கள்கிழமை வழங்கப்பட்டது.

தமிழக அரசு தமிழக கடலோரக் காவல்படை குழுமத்துக்கு அதிநவீன கண்காணிப்பு வாகனங்களை அண்மையில் அளித்தது. அதன்படி, மோட்டார் சைக்கிள் வடிவிலான ஏ.டி.வி. வாகனம் 12-ம், ஜீப் வடிவிலான ஏ.டி.வி. வாகனம் 12-ம் வழங்கப்பட்டன.

இதில் கடலூர் மாவட்ட கடலோரக் காவல்படைக்கு மோட்டார் சைக்கிள் வடிவிலான ஏ.டி.வி. வாகனம் ஒன்று வழங்கப்பட்டுள்ளது. இந்த வாகனம் திங்கள்கிழமை கடலூர் தேவனாம்பட்டினம் வெள்ளிக்கடற்கரையில் இயக்கப்பட்டது.

மணிக்கு 40 முதல் 50 கி.மீ. வேகத்தில் செல்லும் இந்த வாகனம் 500 குதிரைத்திறன் கொண்டது. மணலிலும், கடற்கரையோரத்திலும் செல்லும் வகையில், இந்த வாகனத்தின் 4 சக்கரங்களும் ஒரே நேரத்தில் இயங்கும் தன்மைக் கொண்டது. மேலும், தேவைப்படும் போது 2 சக்கரங்களை தனியாக இயக்கிக் கொள்ளவும் முடியும். மணலில் பதியும் தன்மையோ, பள்ளத்தில் கவிழும் தன்மையோ இந்த வாகனத்தில் கிடையாது.

இந்த வாகனத்தின் மூலமாக கடலில் ஆபத்தில் சிக்கித்தவிப்பவரை மீட்டு உடனடியாக சாலைக்கு கொண்டுவர முடியும். மேலும், கடத்தல் உள்ளிட்ட சட்டவிரோத சம்பவங்களில் ஈடுபடுபவர்களை கண்காணிக்கவும், தடுக்கவும் உதவும்.

 

இரு சக்கர வாகன வடிவமைப்பில் உள்ள வாகனம் ஒன்று கடலூர் மாவட்ட கடலோர காவல்படையிடம் அரசு ஒப்படைத்துள்ளது. இந்த வாகனத்தில் 2 பேர் அமர்ந்து செல்லலாம். 500 குதிரை திறன் கொண்டது. 40 முதல் 50 கிலோ மீட்டர் வேகத்தில் செல்லும். இந்த வாகனத்தில் தினந்தோறும் தேவனாம்பட்டினம் – கடலூர் துறைமுகத்துக்கும், கடலூர் துறைமுகம் முதல் பரங்கிப்பேட்டை வரைக்கும் ரோந்துப்பணியில் ஈடுபட இருக்கிறோம்

இந்த வாகனம் மூலமாக தினமும் தேவனாம்பட்டினம் கடற்கரையிலிருந்து கண்காணிப்புப் பணி செல்லப்படும் என்றும், மாவட்டம் முழுவதும் கடற்கரையில் கண்காணிப்புப் பணியில் ஈடுபடுவோம் என்றும் கடலூர் கடலோர பாதுகாப்புப்படை ஆய்வாளர் ர.சேகர் தெரிவித்தார். மேலும், கடலூருக்கு ஜீப் வடிவிலான ஏ.டி.வி. வாகனம் விரைவில் வரவுள்ளதாகவும் அவர் கூறினார்.

இந்த வாகன இயக்கத்தின் போது உதவி ஆய்வாளர் வா.சிவகுருநாதன், சிறப்பு உதவி ஆய்வாளர் எம்.நாகராஜன் ஆகியோர் உடனிருந்தனர்.