கிள்ளை அருகே சின்னவாய்க்கால், தில்லுமேடு, பட்ரடி, எம்.ஜி.ஆர். திட்டு, முழுக்குதுறை, முடசல் ஓடை உள்ளிட்ட 8 மீனவ கிராமத்தை சேர்ந்தவர்கள், அங்குள்ள வெள்ளாற்று முகத்துவாரம் வழியாக கடலுக்குள் சென்று மீன்பிடித்து வந்தனர்.
இந்த நிலையில், முகத்துவாரம் தூர்ந்துபோனதால் படகு போக்குவரத்து முற்றிலும் பாதிக்கப்பட்டது. அதோடு, முகத்துவார பகுதியில் மீனவர்கள் தங்களின் படகுகளை நிறுத்தவும் முடியாத நிலை உருவானது.
இதனால், கடந்த சில நாட்களாக மீனவர்கள் கடலுக்குள் மீன்பிடித்து விட்டு, தங்களின் படகுகளை சின்னவாய்க்கால் கடற்கரையோரங்களிலேயே நிறுத்தி செல்கின்றனர். அதன்படி, நேற்று 100–க்கும் மேற்பட்ட படகுகள் கடற்கரையோரம் நிறுத்தி வைக்கப்பட்டிருந்தன.
இந்த நிலையில், நேற்று அதிகாலையில் கடல் சீற்றம் அதிகமாக இருந்தனர். அப்போது, ராட்சத அலை கடற்கரையோரத்தில் நிறுத்தி வைக்கப்பட்டிருந்த 27 படகுகளை கடலுக்குள் இழுத்து சென்றது. இதில் சில படகுகள் கடலில் மூழ்கியது.
இதனை பார்த்த மீனவர்கள் அதிர்ச்சியடைந்தனர். பின்னர், அவர்கள் படகுகள் மூலம் கடலுக்குள் சென்று இழுத்து செல்லப்பட்டு கடலில் மூழ்கிய மற்றும் இழுத்து செல்லப்பட்டதால் நடுக்கடலில் கேட்பாரற்று இருந்த 27 படகுகளை மீட்டு கரைக்கு இழுத்து வந்தனர். இதில் படகில் வைக்கப்பட்டிருந்த மீன்பிடி வலைகளும் கடலில் மூழ்கியது.
இதில் காசிநாதன், சங்கர், பரசுராமன், பார்த்தசாரதி, செந்தில், விஜயன், ஏழுமலை உள்ளிட்ட சிலரது படகுகள் முற்றிலும் சேதமடைந்தன.
இது குறித்து மீனவர்கள் கூறுகையில், வெள்ளாற்று முகத்துவாரம் தூர்ந்து போனதால், நாங்கள் எங்களின் படகுகளை பாதுகாப்பற்ற நிலையில் கடற்கரையில் நிறுத்த வேண்டிய நிலை உள்ளது. இதனை தவிர்க்க பலமுறை கோரிக்கை விடுத்தும் எந்தவித நடவடிக்கையும் இல்லை. மீன்பிடி படகுகளை பாதுகாப்பாக நிறுத்த வழியின்றி நாங்கள் தவித்து வருகின்றோம். இதற்கு சம்பந்தப்பட்ட அதிகாரிகள் உரிய நடவடிக்கை எடுக்க முன்வரவேண்டும் என்றனர்.
0 கருத்துகள்:
கருத்துரையிடுக