காணாமல் போன கடலோர காவல்படை விமானம் எங்கே?

கடலூர்:கடலூர்-சிதம்பரம் இடையேயான கடல் பகுதியில் மாயமானதாகக் கூறப்படும் கடலோர காவல்படை விமானம், தேடும் பணியில் ஏற்பட்டுள்ள தொய்வால், 20 நாளாகியும் கண்டுபிடிக்க முடியாத நிலை தொடர்கிறது. அதிலிருந்த விமானிகள் உள்ளிட்ட 3 பேரின் கதி என்ன ஆனது என்பது இதுவரை தெரியவில்லை.

கடந்த 8 ஆம் தேதி ஆம்லா பாதுகாப்பு ஒத்திகையை முன்னிட்டு, சென்னையிலிருந்து இந்திய கடலோர காவல்படைக்குச் சொந்தமான சிஜி 791 என்ற டார்னியர் ரக விமானம் தமிழகம்-புதுவை கடல் பகுதியில் ரோந்துப் பணிக்குச் சென்றது.

இந்த விமானத்தில் துணை கமாண்டர்கள் பதவியிலான விமானி வித்யாசாகர், துணை விமானி சோனி மற்றும் வழிகாட்டுநர் சுபாஷ் சுரேஷ் ஆகிய 3 பேர் இருந்தனர்.

ரோந்துப் பணியை முடித்து, விமானம் மீண்டும் சென்னைக்குத் திரும்பிய போது, சிதம்பரம் அருகே 16 கடல் மைல் தொலைவில் இரவு 9.23 மணியளவில், திருச்சியில் உள்ள ரேடார் கண்காணிப்புக் கருவியில் இருந்து தொடர்பு துண்டிக்கப்பட்டது.

இதையடுத்து, இந்திய கடற்படை, தமிழக கடலோரக் காவல்படையினர் தேடுதல் பணியைத் தொடக்கினர்.

காணாமல்போன விமானம் சிதம்பரத்துக்கும், புதுவைக்கும் இடைப்பட்ட பகுதியில் விழுந்திருக்க அதிக வாய்ப்புள்ளதாகக் கருதப்பட்டு அப்பகுதியில் கடந்த 9ஆம் தேதி தேடுதல் பணி நடந்தது.

முதல் கட்டமாக, கடலின் மேல்பரப்பில் விமானம் மற்றும் பாராகிளைடர் மூலமாகவும், நீர்மூழ்கிக் கப்பல் மற்றும் ஸ்கூபா டைவிங் வீரர்கள் ஆழ்கடலுக்குள் சென்றும் தேடும் பணி நடந்தது.

கடல் மேல்பரப்பில் தேடும் பணியில் இந்திய கடலோர பாதுகாப்புப் படையைச் சேர்ந்த 12 கப்பல்களும், கடற்படையைச் சேர்ந்த 6 கப்பல்களும் ஈடுபடுத்தப்பட்டன.

இதற்கிடையே சிதம்பரம், காரைக்கால் பகுதிகளில் விமானத்திலிருந்து சமிக்ஞை கிடைப்பதாகக் கூறப்பட்டு அப்பகுதியிலும் தேடுதல் பணி நடந்தது.

இரண்டாவது கட்டமாக ஒலி பிரதிபலிப்பு முறையில் ஐ.என்.எஸ். சந்தயாக் எனும் இந்திய கடற்படையின் நீர்மூழ்கிக் கப்பல் கடலுக்கடியில் தேடுதல் பணியில் ஈடுபட்டது.

மூன்றாவது கட்டமாக ரிலையன்ஸ் நிறுவனத்தின் ஒலிம்பிக் கேன்யான் என்ற நவீன கப்பலும் தேடுதல் பணியில் ஈடுபட்டது.

இந்தக் கப்பல் கடலுக்கடியில் விடியோ மூலம் தேடுதல் பணியில் ஈடுபட்டது.

எனினும், மாயமான கப்பல் குறித்து, இருபது நாளாகியும் எந்தவிதமானத் தகவலும் மீட்புப் படையினருக்கு கிடைக்கவில்லை.

காணாமல் போன விமானத்தைத் தேடும் பணியில் எந்தவிதமான முன்னேற்றமும் ஏற்படாததோடு தொய்வு நிலையே தொடர்கிறது.

தேடும் பணியில் தொய்வு

இந்நிலையில், மீட்பு படையினரிடம் போதிய ஒருங்கிணைப்பு இல்லாததே, தேடும் பணியில் தொய்வு எற்படக் காரணம் என்ற புகார் எழுந்துள்ளது. அனைத்துத் துறையினரும் தனித்தனியாகவே விமானத்தைத் தேடும் பணியில் ஈடுபடுவதாகக் கூறப்படுகிறது.

விமானம் விழுந்ததாகத் தற்போது கருதப்படும் பகுதியானது சிதம்பரத்திலிருந்து கிழக்கே 16 கடல் மைல் தொலைவாகும்.

இந்தப் பகுதிக்கு தினமும் கடலூரிலிருந்தே கடலோர பாதுகாப்பு படையினர் சென்று வருகின்றனர். அவர்களாலும் குறிப்பிட்ட பகுதிக்குச் சென்று தேடுதல் பணியில் ஈடுபடும் அளவுக்கு போதுமான உபகரணங்கள், நவீன கருவிகள் இல்லை. இதனால் கடல்பகுதியில் இருட்டத் துவங்கும் முன்பே இவர்கள் கரைதிரும்ப வேண்டிய நிலை உள்ளது. மற்ற தேடுதல் பிரிவினர் புதுவை அல்லது சென்னையிலிருந்து தான் வந்து செல்கின்றனர். தவிர, ஸ்கூபா டைவிங் வீரர்கள், பாரா கிளைடர் ஆகியவை தற்போது பயன்படுத்தப்படவில்லை.

இந்திய கடலோர காவல்படை, கப்பற்படைச் சேர்ந்த கப்பல்கள் திரும்பியதோடு, ஒலிம்பிக் கேன்யான் கப்பலும் தேடுதல் பணியை கைவிட்டுத் திரும்பியது. இவ்வாறு போதிய ஒருங்கிணைப்பு இல்லாததால் யார் தேடுதல் பணியில் ஈடுபடுகிறார்கள் என்பதே தெரியாத நிலை உள்ளது.