ஒவ்வொரு நாட்டிற்கும், ஒவ்வொரு சமூகத்துக்கும் தனிப்பட்ட வரலாறுகள் உண்டு, ஒரு நாட்டிற்கு அந்த நாட்டின் வரலாறு மூலம் தான் அந்த நாட்டின் கலாச்சாரங்கள் , வழிதோன்றல்கள், பண்பாடுகளை விளக்க முடியும். ஒவ்வொரு நாடும் தனக்கான வரலாற்று ஆய்வை தொடர்ந்து செய்து கொண்டே வருவதற்கு முக்கிய காரணம் இதுதான். அறிவியல் ஆய்வுகள் எவ்வளவு முக்கியமோ அந்த அளவிற்கு வரலாற்று ஆய்வும் முக்கியம். அறிவியலுக்கு எவ்வாறு கோட்பாடுகள் உள்ளனவோ அதுபோன்றே வரலாற்றுக்கு ஆதாரங்கள் முக்கியம். அனுமானங்கள் மற்றும் நம்பிக்கைகளை என்றுமே வரலாற்றை வடிவமைக்க எடுத்துக்கொள்ள மாட்டார்கள்.
வரலாறு எவ்வாறு தொகுக்கப்படுகிறது என்பதை பல அறிஞர்கள் விளக்குகின்றனர், அவற்றின் சாராம்சம் இதுதான் “வரலாற்றறிஞர்கள், எழுதப்பட்ட அல்லது அச்சிடப்பட்ட பதிவுகள், நேர்காணல் (வாய்மொழி வரலாறு), மற்றும் தொல்பொருளியல் உள்ளிட்டவைகளை வரலாற்றை பதிவு செய்ய பயன்படுத்துகிறார்கள். மனிதனால் பதிவு செய்யப்படுவதற்கு முன் நிகழ்ந்தவை வரலாற்றுக்கு முற்பட்டவை எனப்படுகின்றன”.
வரலாறு பதிவு செய்யப்படுவதற்கு தேவையானவைகள் எழுதப்பட்ட அல்லது அச்சிடப்பட்ட பதிவுகள், நேர்காணல் (வாய்மொழி வரலாறு), மற்றும் தொல்பொருளியல் உள்ளிட்டவைகள் தான் என்பது இதன்மூலம் தெளிவாகிறது. மாறாக தனி மனிதன் அல்லது ஒரு குழுவின் நம்பிக்கைகள் என்றுமே வரலாறாக ஆகாது, அறிவியலுக்கு கோட்பாடு போல வரலாற்றுக்கு தேவை ஆதாரங்கள் தானே தவிர நம்பிக்கைகள் அல்ல. இதுதான் வரலாற்று ஆராய்ச்சியின் முக்கிய கோட்பாடே.
இந்தியா போன்ற பன்முக காலாச்சாரங்கள் கொண்ட நாட்டில் வரலாறு என்பது வெறுமனே பதிவுகளாக மட்டும் பார்க்கப்படுவதில்லை மாறாக அவை இந்த மண்ணின் மூலத்தை விவரிக்கும் காலச்சுவடுகள். இன்னும் சொல்லப்போனால் இந்தியாவில் இருக்கும் பன்முக கலாச்சாரத்துக்கு வரலாற்றில் மட்டுமே விளக்கங்கள் உண்டு.
அமெரிக்கா போன்ற நாடுகளின் வரலாறுகள் சில நூறு ஆண்டுகள் முற்பட்டவை , மாறாக இந்தியாவுக்கோ அது ஆயிரங்களில் அடங்கும். இன்றும் குமரிக்கண்டத்தை பற்றியும் லெமூரியாவை பற்றியும் நாம் சிலாகித்துக்கொண்டிருக்க காரணம் அவற்றை பற்றிய வரலாறுகள் கிடைக்க பெறுவதால் தான்.
எல்லா நாடுகளிலும் வரலாற்று ஆய்வு குழு ஒன்று செயல்படும், இந்தியாவிலும் அது உண்டு. இந்திய வரலாற்று ஆய்வு கவுன்சில் (INDIAN COUNCIL OF HISTORICAL RESEARCH-ICHR) என அழைக்கப்படும் இவர்கள் தான் இந்தியாவின் வரலாற்றை ஆய்வு செய்து தொகுத்து வெளியிடுபவர்கள். சுருக்கமாக சொல்லப்போனால் இன்று நாம் கற்கும் வரலாறும் இவர்கள் தொகுத்ததே, நாளைய தலைமுறை நம்மை பற்றி கற்கப்போவதும் இவர்கள் தொகுத்து தருவதையே. இப்படிப்பட்ட அதி முக்கியத்துவம் வாய்ந்த துறைக்கு வரலாற்று ஆய்வாளர்கள் அதில் பட்டங்கள் பெற்றவர்களையே நியமிக்க வேண்டும், எல்லாவற்றிற்கும் மேலாக மேற்சொன்னது போல பன்முக கலாச்சாரங்கள் கொண்ட இந்தியாவில் அனைத்து காலாச்சரங்களின், சமூகத்தின் வரலாறுகளை எந்தவித பாகுபாடுமின்றி அணுகுபவர்களே இந்த பதவிக்கு தகுதியானவர்கள்.
ஆனால் தற்போது ஆளும் பாஜக அரசால் இந்த பதவிக்கு நியமிக்கப்பட்டுள்ள சுதர்ஷன் ராவின் பேட்டிகள் தற்போது இந்த பதவியையும் இந்த துறையின் நம்பகத்தன்மையும் கேள்விக்குறியாகியுள்ளது.
சமீபத்தில் டில்லியில் நடந்த ஏய்ம்ஸ் மருத்துவமனை விழாவில் கலந்து கொண்ட இந்திய பிரதமர் நரேந்திர மோடி ஹிந்து கடவுளான விநாயகருக்கு யானை தலை இருப்பது அந்த காலத்து ப்ளாஸ்டிக் அறுவை சிகிச்சை என்றும், கர்ணனின் பிறப்பு அந்த காலத்திலேயே டெஸ்ட் ட்யூப் குழந்தை போன்ற மரபணு விஞ்ஞானம் இருந்ததை ஊர்ஜித்தப்படுத்துவதாகவும் பேசி சர்வதேச அளவில் நய்யாண்டிகளை இந்தியாவுக்கு வாங்கி தந்தார். அப்போது கூட அவரது பேச்சு ஒரு சாராரால் அறியாமையாகவே பார்க்கப்பட்டது ஆனால் தற்போது சுதர்ஷன் ராவின் பணி நியமனம் பல பலத்த சந்தேகங்களை ஏற்படுத்தியுள்ளது,
“ஆவணங்களையும் ஆய்வுகளையும் நம்பியிருக்காமல் ஹிந்து மதப்புரானங்களே இந்திய வரலாற்றை பதிவு செய்வதற்கு போதுமானவை” என்று கொளுத்தி போட்டிருக்கும் ராவ், “5000 ஆண்டுகளுக்கு முன்னமேயே இந்தியாவில் ஸ்டெம் செல் ஆராய்ச்சி, காஸ்மிக் ஆயுதங்கள் இருந்திருக்கும்” என்கிறார். இவற்றையெல்லாம் அவர் ஆதாரங்களை கொண்டு சொல்லியிருந்தால் நாமும் பெருமை பட்டுக்கொள்ளலாம், மாறாக ஹிந்து புராணங்களில் உள்ளதால் இவற்றை வரலாறு என்பது தான் விஷயத்தை விபரீதமாக்குகிறது.
ஹிந்து மதப்புரானங்களில் உள்ளவை உண்மையா பொய்யா என்பதல்ல இங்கு வாதம், ஒரு மதத்தின் நம்பிக்கையை எப்படி வரலாற்றுக்கு ஆதாரமாக கொள்ள முடியும் என்பதே. ஒரு நாட்டின் வரலாற்றை மக்களுக்கும் அடுத்த தலைமுறைக்கும் எடுத்து செல்லும் முக்கியத்துவமிக்க துறைக்கு இப்படி ஒரு ஹிந்து தேசியவாதியை தலைவராக நியமித்திருப்பதன் மூலம் பாஜக அரசு வரலாற்றில் குழப்பங்கள் ஏற்படுத்த தெளிவாக பாதை வகுப்பது தெரிகிறது.
சென்ற முறை ஆட்சிக்கட்டிலில் ஏறியபோது பாடப்புத்தகங்களில் உள்ள வரலாறுகளை இஷ்டத்திற்கு மாற்றியமைத்தார்கள் பின்பு இருமுறை அரியணை ஏறிய காங்கிரசும் அதனை கண்டு கொள்ளாததான் விளைவு இன்னமும் கலப்பட வரலாற்றையே பள்ளி குழந்தைகள் கற்றுக்கொண்டிருக்கிறார்கள்.
இந்த முறை இன்னும் தீவிரமாக ஒட்டுமொத்த இந்தியாவின் வரலாற்றையும் ஹிந்து தேசியத்தின் மீது கட்டமைக்க பார்க்கிறது பாஜக, ஹிந்து தேசியம் என்ற அவர்களின் கோஷத்திற்கு வலுசேர்க்கும் விதமாக வரலாற்றையே மாற்ற நினைக்கிறார்கள். தற்போதும் மக்கள் விழித்து கொள்ளவில்லை என்றால் நாளைய நம் தலைமுறை மூளை மழுங்கடிப்பட்டவர்களாக, மண்ணின் பெருமை அறியாதவர்களாக, இந்தியாவின் கலாச்சார வேர் அறியாதவர்ளாக, தன் சொந்த நாட்டின் உண்மை வரலாற்றை அறியாதவர்களாக ஆகிவிடுவார்கள்.
இதற்கு ஒரு உதாரணம் , சில மாதங்களுக்கு முன், பாஜக ஆளும் குஜராத்திலும், மத்திய பிரதேசத்திலும் சர்ச்சைக்குரிய ஹிந்து தேசியவாதியான தீனநாத் பத்ரா வை பாடபுத்தகங்கள் வடிவமைப்பதில் ஆலோசகராக நியமித்தார்கள். விளைவு அவர்களுக்கு தற்போது வழங்கப்பட்ட பாடப்புத்தகத்தில் கார்கள் இந்தியாவில் பழங்காலத்திலேயே இருந்தன என்றும் ஒன்றுபட்ட இந்தியாவின் வரைபடமாக ஆப்கானிஸ்தான், பாகிஸ்தான், வாங்க தேசத்தை இணைத்து வரைய வேண்டும் என்றும் கற்பிக்க படுகிறார்கள்.
பாடபுத்தகங்கள் வரலாறுகள் மூலமாக நேற்றைய, நாளைய இந்தியாவை ஹிந்து தேசியமாக மாற்றும் அப்பட்டமான முயற்சி இது. தமிழன் என்றவன் கைபர் போலன் கணவாய் வழியாக ஆடுமாடுகளை மேய்த்துக்கொண்டு இந்தியாவிற்குள் வந்தவன் என்று நம் கொள்ளுபேரன்களுக்கு சொல்லிக்கொடுக்கப்படுவதற்கு முன் விழித்துகொள்வது அவசியம்.
கட்டுரையாளர் :அப்துல் ரஹ்மான்
நன்றி :mypno.com
0 கருத்துகள்:
கருத்துரையிடுக