இது பற்றி போலீஸ் தரப்பில் கூறப்படுவதாவது:–
ரூ.36 லட்சம் மோசடி
சென்னை செம்மங்கேணியைச்சேர்ந்த பாலு என்பவர் தலைமையில் செயல்பட்டு வந்த ஒரு கும்பல் வங்கிகளில் பெரும் தொகைகளை டெபாசிட் செய்து வைத்துள்ளவர்களின் பெயரில் போலி காசோலைகளை தயாரித்து பல லட்சம் ரூபாயை கையாடல் செய்தது சமீபத்தில் தெரியவந்தது.
இக்கும்பல் பரங்கிப்பேட்டை இந்தியன் ஓவர்சீஸ் வங்கியின் வாடிக்கையாளர் அப்துல்மாலிக்
(வயது55) என்பவரின் வங்கிக்கணக்கில் இருந்த 36 லட்சம் ரூபாயை போலி காசோலை மூலம் கையாடல் செய்தது. இது தொடர்பாக வங்கி மேலாளர் பழனியப்பன் கொடுத்த புகாரின் பேரில் கடலூர் மாவட்ட குற்றப்பிரிவு போலீஸ் துணை சூப்பிரண்டு சேகர் மேற்பார்வையில் இன்ஸ்பெக்டர் செந்தில்விநாயகம் வழக்குப்பதிவு செய்து விசாரணை நடத்தினார். விசாரணையில் திருப்பூர் விஜயபுரம் அருள் என்ற அருள்பரமசிவன் (31) என்பவர் அப்துல்மாலிக் பெயரில் போலிகாசோலையை திருப்பூரில் உள்ள ஒரு வங்கியில் கொடுத்து ரூ.36 லட்சத்தை எடுத்தது தெரியவந்தது. அதன்பேரில் அருளை போலீசார் கைது செய்தனர்.
மேலும் ஒருவர் கைது
அவர் கொடுத்த தகவலின் பேரில் விழுப்புரம் மாவட்டம் வளவனூரில் உள்ள ஒரு வங்கியின் உதவி மேலாளர் ஷேக் இஸ்மாயில், திருப்பூர் உடுமலைப்பேட்டை ஈஸ்வரன், புதுச்சேரி கார்டன் இல்லம் முகமதுஅலி (56) ஆகியோரை கைது செய்தனர். இவ்வழக்கில் புதுச்சேரி வெங்கட்டா நகரைச்சேர்ந்த அப்துல்சத்தார் மகன் கதிர் என்ற அப்துல்காதர்(38) என்பவரை இன்ஸ்பெக்டர் செந்தில் விநாயகம் தலைமையிலான போலீசார் நேற்றுமுன்தினம் கைது செய்தனர். கைதான கதிர், விழுப்புரம் மாவட்டம் வளவனூரில் கணக்கு வைத்துள்ள தனியார் பொறியியல் கல்லூரியின் பெயரில் தயாரித்த போலி காசோலையை கோவையில் உள்ள தேசியமயமாக்கப்பட்ட வங்கியில் தனது பெயரில் உள்ள கணக்கில் செலுத்தி ரூ.9 லட்சம் மோசடி செய்திருப்பது தெரியவந்தது.
இந்த மோசடி கும்பலின் தலைவனையும் தொடர்புடைய மேலும் சிலரையும் போலீசார் தேடி வருகிறார்கள்.
0 கருத்துகள்:
கருத்துரையிடுக