ஜவுளி பூங்கா திட்டத்தை கைவிடாவிட்டால் போராட்டம்: ராமதாஸ்

பரங்கிப்பேட்டை:பரங்கிப்பேட்டை அருகேயுள்ள பெரியப்பட்டு ஜவுளி பூங்கா திட்டத்தை கைவிடாவிட்டால் போராட்டம் நடத்தப்படும் என்று அரசுக்கு ராமதாஸ் எச்சரிக்கை விடுத்துள்ளார்.

இதுகுறித்து பா.ம.க. நிறுவனர் ராமதாஸ் வெளியிட்டுள்ள அறிக்கையில், ''கடலூர் மாவட்டம் சிதம்பரத்தை அடுத்த பரங்கிப்பேட்டை அருகேயுள்ள பெரியப்பட்டு கிராமத்தில் 300 ஏக்கர் பரப்பளவில் அமைக்கப்படவுள்ள ஜவுளிப் பூங்கா சாயப்பட்டறைக்கு எதிர்ப்பு தெரிவித்து அங்குள்ள மக்கள் நடத்தி வரும் போராட்டம் தீவிரமடைந்து வருகிறது. இப்போராட்டத்தின் பின்னணியிலுள்ள நியாயத்தை உணர மறுக்கும் தமிழக அரசு மக்கள் எழுச்சியை
அடியோடு முடக்க தீவிர நடவடிக்கை எடுத்து வருகிறது.

தொழிற்சாலைகளை அமைக்கிறோம் என்ற பெயரில் கடலூர் மாவட்டம் நச்சு பூமியாக்கப்பட்டு வருகிறது. கடலூரையொட்டியுள்ள பகுதிகளில் அமைக்கப்பட்டுள்ள தொழிற்சாலைகளில் இருந்து வெளியேற்றப்படும் வேதிக்கழிவுகளால் அந்த ஆலைகளில் பணியாற்றும் தொழிலாளர்களுக்கும், அப்பகுதி மக்களுக்கும் புதிது புதிதாக நோய்கள் தோன்றுகின்றன. இந்தத் தொழிற்சாலைகளில் ஆய்வு மேற்கொண்டு மக்களுக்கு பாதிப்பை ஏற்படுத்தும் ஆலைகளை மூட வேண்டும் என மக்கள் குரல் எழுப்பிவரும் நிலையில், சிதம்பரம் அருகில் உள்ள பெரியப்பட்டு கிராமத்தில் ஒருங்கிணைந்த ஜவுளிப் பூங்காவை அமைக்க சைமா எனப்படும் தென்னிந்திய நூற்பாலைகள் சங்கத்திற்கு அனுமதி அளிக்கப்பட்டிருக்கிறது.

ரூ.700 கோடி செலவில் 300 ஏக்கர் நிலப்பரப்பில் அமைக்கப்படவுள்ள இந்த ஜவுளி பூங்காவில் 10 நிறுவனங்கள் தங்களின் ஜவுளி ஆலைகளை ஏற்படுத்தவுள்ளன. 2004 ஆம் ஆண்டு உருவாக்கப்பட்ட இத்திட்டத்திற்கு அப்பகுதியில் உள்ள மக்களும், விவசாயிகளும் கடந்த 10 ஆண்டுகளாக கடும் எதிர்ப்பு தெரிவித்துவரும் நிலையில், அதைப் பொருட்படுத்தாமல் ஜவுளிப் பூங்கா மற்றும் அதனுடன் இணைந்த சாயப்பட்டறைகளை அமைக்கும் பணிகள் வேகம் பெற்று வருகின்றன.

ஜவுளிப் பூங்கா அமைக்கப்படவுள்ள பெரியப்பட்டு மற்றும் அதைச்சுற்றியுள்ள கிராமங்களில் நிலத்தடி நீர் வளம் அபரிமிதமாக உள்ளது. இதைப் பயன்படுத்திக்கொள்ள வேண்டும் என்ற நோக்குடன் தான் இப்பகுதியை ஜவுளிப் பூங்கா அமைப்பதற்காக சைமா தேர்வு செய்திருக்கிறது. இப்பகுதியில் ஜவுளிப் பூங்காவும், சாயப்பட்டறைகளும் அமைக்கப்பட்டால் இருவகை பாதிப்புகள் ஏற்படும். சாயப்பட்டறைக்காக பெரியப்பட்டு கிராமத்தில் 12 ஆழ்துளை கிணறுகளை அமைத்து நாள்தோறும் ஒன்றரை கோடி லிட்டர் தண்ணீரை எடுக்கவும், சாயப்பட்டறைகளின் கழிவுகளை முழுமையாக சுத்திகரிக்காமல் கடலில்விடவும் ஜவுளிப் பூங்கா நிர்வாகம் திட்டமிட்டிருக்கிறது. இவற்றைத் தான் தங்களின் வாழ்வாதாரங்களை பறிக்கக் கூடிய நடவடிக்கைகளாக அப்பகுதியில் உள்ள விவசாயிகளும், மீனவர்களும் அஞ்சுகின்றனர்.

ஜவுளிப் பூங்காவை ஒட்டியுள்ள பெரியப்பட்டு, பெரியாண்டிக்குழி, வாண்டியாம்பாளையம், தச்சம்பாளையம், கோபாலபுரம், ஆண்டார் முள்ளிப்பள்ளம், காயல்பட்டு, புத்திரவெளி, தாழஞ்சாவடி, சான்றோர்மேடு, சிலம்பிமங்கலம், சின்னாண்டிக்குழி, புதுச்சத்திரம், வில்லியநல்லூர் உள்ளிட்ட 20 கிராமங்களில் வேளாண்மையும், சாமியார்பேட்டை, குமராப்பேட்டை, மடவாப்பள்ளம், அன்னப்பன்பேட்டை, ரெட்டியார்பேட்டை, ஐயம்பேட்டை, பேட்டோடை உள்ளிட்ட 10 கடற்கரையோர கிராமங்களில் மீன்பிடித் தொழிலும் முக்கிய வாழ்வாதாரமாக உள்ளன. பெரியப்பட்டில் சாயப்பட்டறைகளுடன் கூடிய ஜவுளிப் பூங்கா அமைக்கப்பட்டால் விவசாயம், மீன்பிடித் தொழில் இரண்டுமே கடுமையாக பாதிக்கப்படும்.

கடற்பகுதியிலிருந்து 10 கி.மீ வரை ஆழ்துளை கிணறுகளை அமைக்கக் கூடாது என்று விதிகள் உள்ளன. சென்னை அருகே மீஞ்சூர், பஞ்சட்டி பகுதிகளில் இத்தகைய ஆழ்துளை கிணறுகள் அமைக்க அனுமதி அளிக்கப்பட்டதால், கடற்பகுதியிருந்து 16 கி.மீ. தொலைவுக்கு கடல் நீர் ஊடுருவி சரி செய்ய முடியாத அளவுக்கு பாதிப்புகளை ஏற்படுத்தியிருப்பதாக பொதுப்பணித் துறையின் நீர்வளப் பிரிவு முதன்மை பொறியாளர் அளித்த அறிக்கையில் தெரிவிக்கப்பட்டிருக்கிறது.

இத்தகைய சூழலில் கடற்பகுதியிலிருந்து ஒரு கி.மீ. தொலைவில் உள்ள பெரியப்பட்டில் ஆழ்துளை கிணறுகள் அமைக்கப்பட்டால் அதை சுற்றியுள்ள கிராமங்களுக்குள் கடல் நீர் ஊடுருவி சுமார் 10 ஆயிரம் ஏக்கர் பரப்பளவில் விவசாயம் பாதிக்கப்படும். அதுமட்டுமின்றி, முழுமையாக சுத்திகரிக்கப்படாத சாயக்கழிவுகள் கடலில் விடப்படும்போது அப்பகுதியில் உள்ள மீன்கள் அழிந்துவிடும் ஆபத்து உள்ளது. இதனால் மீனவர்களின் வாழ்வாதாரம் அடியோடு அழிந்துவிடும் ஆபத்து இருப்பதை அரசு உணர வேண்டும்.

பெரியப்பட்டு ஜவுளிப் பூங்காவில் தொழிற்சாலைகளை அமைக்கவிருக்கும் நிறுவனங்கள் அனைத்துமே திருப்பூர் பகுதியில் துணி ஆலைகளை நடத்தி, சாயக்கழிவுகளை சுத்திகரிக்காமல் வெளியேற்றியதற்காக தண்டிக்கப்பட்டவை தான். இந்த நிறுவனங்களின் சாயக்கழிவுகள் சேர்ந்ததால் நொய்யல் ஆற்று அணையை திறக்க முடியாமல் திருப்பூர் மற்றும் ஈரோடு மாவட்டங்களில் விவசாயம் கடுமையாக பாதிக்கப்பட்டிருக்கிறது. அதேபோன்ற நிலை கடலூர் மாவட்டத்திலும் ஏற்பட்டுவிடக் கூடாது என்பதற்காகத் தான் அப்பகுதி மக்கள் தொடர்ந்து பல ஆண்டுகளாக போராட்டம் நடத்தி வருகிறார்கள்.

எனவே, பெரியப்பட்டு பகுதி மக்களின் உணர்வுகளை மதித்தும், சுற்றுச்சூழலுக்கும், வாழ்வாதாரத்திற்கும் ஏற்படும் பாதிப்புகளைக் கருத்தில் கொண்டும் சாயப்பட்டறையுடன் கூடிய ஜவுளிப் பூங்கா திட்டத்தை மத்திய, மாநில அரசுகள் ரத்து செய்ய வேண்டும். இதற்கான அறிவிப்பு உடனடியாக வெளியிடப்படாவிட்டால், பாதிக்கப்படும் கிராமங்களின் மக்களைத் திரட்டி ஜவுளிப் பூங்காத் திட்டத்திற்கு எதிராக எனது தலைமையில் மிகப்பெரிய அளவில் போராட்டம் நடத்தப்படும் என்று எச்சரிக்கிறேன்" என்று கூறியுள்ளார்.