நிலங்களை அபகரிக்கும் நிறுவனங்கள் மீது வழக்கு தொடர வேண்டும்: பாலகிருஷ்ணன் எம்.எல்.ஏ.,

பரங்கிப்பேட்டை:"குண்டர்களை வைத்து ஏழைகளை மிரட்டி நிலங்களை அபகரிக்கும் தனியார் நிறுவனங்கள் மீது நில அபகரிப்பு வழக்கு போட்டு கைது செய்ய வேண்டும்'' என சிதம்பரம் எம்.எல்.ஏ., பேசினார். பரங்கிப்பேட்டை கடற்கரையோர மக்கள் வாழ்வுரிமை இயக்கம், தமிழ்நாடு விவசாயிகள் சங்கம் மற்றும் விவசாயத் தொழிலாளர் சங்கம் சார்பில் புதுச்சத்திரம் பஸ் நிலையம் அருகே உண்ணாவிரதம் நடந்தது. கடற்கரையோர மக்களின் எதிர்காலத்தை பாதுகாக்க வேண்டும். சுற்றுச்சூழல், நிலத்தடி நீர் மற்றும் பிச்சாவரம் பகுதி பாதுகாப்பை உறுதிப்படுத்த வேண்டும். மீனவர்கள், விவசாயத் தொழிலாளர்கள் விவசாயிகள் வாழ்வாதாரம் அழியாமல் தடுக்க வேண்டும் என்பது உள்ளிட்ட கோரிக்கைகளை வலியுறுத்தி நடந்த உண்ணாவிரதத்தை மா.கம்யூ., மாவட்டச் செயலர் ஆறுமுகம் துவக்கி வைத்தார்.
கொத்தட்டை ஊராட்சித் தலைவர் நாகராஜன், மா,கம்யூ., பரங்கிப்பேட்டை ஒன்றிய செயலர் கற்பனைச்செல்வன் முன்னிலை வகித் தனர். கடற்கரையோர மக்கள் வாழ்வுரிமை இயக்க மாவட்ட அமைப்பாளர் ரமேஷ்பாபு வரவேற்றார்.
சிதம்பரம் எம்.எல்.ஏ., பாலகிருஷ்ணன் தலைமை தாங்கி பேசுகையில், "ஏழை மக்கள் புறம்போக்கு நிலங்களில் வீடு கட்ட பட்டா கேட்டால் அரசு தர மறுக்கிறது. தனியார் கம்பெனிகளுக்கு மட்டும் நிலங்களை உடன் வழங்குகிறது. தனியார் அனல் மின் நிலைய நிறுவனம் குண்டர்களை வைத்து ஏழைகளை மிரட்டி நிலங்களை அபகரிக்கிறது. அவர்கள் மீது நில அபகரிப்பு வழக்கு போட்டு கைது செய்ய வேண்டும். மக்கள் வசிக்கும் பகுதியில் 25 கி.மீ., தொலைவிற்கு மேல் தான் கம்பெனிகளுக்கு அனுமதி தரவேண்டும் என்ற விதி இருக்கும் போது 8 கி.மீ., தொலைவில் மக்கள் வசிக்கும் பகுதியில் அனுமதி வழங்கப்பட்டுள்ளது. இந்த தனியார் நிறுவனம் வந்தால் சுற்றுச்சூழல் மாசுபாட்டால் பாதிக்கப்படுவோம்' என்றார்.