கடலூர், ஜூன் 10: கடலூரில் மேற்கொள்ளப்பட்ட பாதாள சாக்கடைத் திட்டப் பணிகள் தொடங்கப்பட்டு 5 ஆண்டுகள் ஆகவுள்ள நிலையில் இன்றும் நீடித்து வருகிறது. 1.10.2011 முதல் கடலூர் பாதாள சாக்கடைத் திட்டம், மக்கள் பயன்பாட்டுக்கு வரும் என அமைச்சர் எம்.சி.சம்பத் அறிவித்து ஓராண்டாகியும் பணி முடிந்தபாடில்லை.÷மாவட்ட தலைநகரான கடலூர் நகரில் 45 வார்டுகள் உள்ளன. இதில் 2 லட்சத்துக்கும் மேற்பட்டோர் வசித்து வருகின்றனர்.
÷நகரின் சுகாதாரம் பேணி காக்கும் வகையில் பாதாள சாக்கடைத் திட்டம் கடலூர் நகரில் தொடங்கப்பட்டது. 18 மாதங்களில் முடிக்கப்படும் என அறிவிக்கப்பட்ட இத் திட்டம் ஐந்தாண்டுகள் பூர்த்தியாக உள்ள நிலையில் இன்னமும் முடியவில்லை.
÷பாதாள சாக்கடை பைப் புதைப்பதற்காக இன்னமும் நகரில் பல்வேறு பகுதியில் பள்ளங்கள் தோண்டிக் கொண்டுதான் உள்ளனர். இதனால் நகரின் முக்கிய சாலைகள் மேடு பள்ளங்களாக மாறியுள்ளன.
÷நாள்தோறும் நகர மக்கள் வேதனையை அனுபவித்து வருகின்றனர். எச்சரிக்கைப் பலகை, தடுப்புக் கட்டை இல்லாமல் பள்ளங்கள் எடுக்கப்படுவதால் பாதசாரிகளும், வாகன ஓட்டிகளும் பள்ளத்தில் விழுந்து உள்ளனர். பலர் ஊனமடைந்துள்ளனர்.
÷கடலூர் பாதாள சாக்கடைத் திட்டப் பணிகள் குறித்த ஆய்வுக் கூட்டம் கடந்த ஆண்டு ஜூன் 25-ம் தேதி அமைச்சர் எம்.சி.சம்பத் தலைமையில், அப்போதைய ஆட்சியர் வே.அமுதவல்லி, காவல் துறை கண்காணிப்பாளர் பகலவன் முன்னிலையில் நடந்தது.
÷இதில், குழாய்கள் பதிக்கும் பணி ஆகஸ்ட் மாதத்துக்குள்ளும், சேதப்படுத்தப்பட்ட மாநில, தேசிய நெடுஞ்சாலைகள் செப்டம்பர் மாதத்துக்குள் புதிதாக போடப்பட்டு 1.10.2011 முதல் கடலூர் பாதாள சாக்கடைத் திட்டம் மக்கள் பயன்பாட்டுக்குத் தயாராகிவிடும் எனவும், குறிப்பிட்ட பணியை குறிப்பிட்ட காலத்தில் முடிக்காவிட்டால் ஒப்பந்ததாரர்களுக்கு அபராதம் விதிக்கப்படும் என அமைச்சர் எம்.சி.சம்பத் செய்தியாளர்களிடம் தெரிவித்தார்.
÷முதல்முறையாக குறித்த காலத்தில் பணிகளை முடிக்காத ஒப்பந்ததாரர்களுக்கு அபராதம் விதிக்கப்படும் என அமைச்சர் எம்.சி.சம்பத் கூறியதால், இத்திட்டம் விரைவில் முடிவடையும் என கடலூர் மக்கள் எதிர்பார்த்தனர்.
÷ஆனால் அமைச்சர் கூறிய நாள் முடிந்து 8 மாதங்கள் ஆகியும் இத் திட்டம் இன்னமும் கடலூர் மக்கள் பயன்பாட்டுக்கு வராதது வேதனை அளிக்கிறது
0 கருத்துகள்:
கருத்துரையிடுக