புதுடெல்லி, ஜூன். 11- ஐ.ஐ.டி. உள்ளிட்ட அரசுக் கல்வி நிறுவனங்களில் சிறுபான்மையினருக்கு 4.5 சதவீத உள் ஒதுக்கீடு வழங்குவதற்கான ஆணையை மத்திய அரசு வெளியிட்டது. இந்த ஆணை செல்லாது என்று ஆந்திர உயர் நீதிமன்றம் தீர்ப்பளித்தது.
இதை எதிர்த்து மத்திய அரசு, உச்ச நீதிமன்றத்தில் மேல் முறையீடு செய்தது. இந்த வழக்கு உச்ச நீதிமன்றத்தில் நீதிபதிகள் கே.எஸ்.ராதாகிருஷ்ணன், ஜே.எஸ்.கேஹர் ஆகியோர் அடங்கிய பெஞ்ச் முன் இன்று விசாரணைக்கு வந்தது.
அப்போது, ஆந்திர உயர்நீதிமன்றத்தின் உத்தரவுக்கு இடைக்காலத் தடை விதிக்க நீதிபதிகள் மறுத்து விட்டனர். இந்த விவகாரத்தில், எந்தவித ஆதார ஆவணங்களும் இல்லாமல் அரசு மேல் முறையீடு செய்திருப்பது அதிருப்தி அளிப்பதாக அவர்கள் தெரிவித்தனர்.
இட ஒதுக்கீடு என்ற சிக்கலான பிரச்னையை அரசு மிகவும் சாதாரணமாகக் கையாள்வது அதிருப்தி அளிப்பதாகவும் நீதிபதிகள் தெரிவித்தனர். சிறுபான்மையினருக்கு 4.5 சதவிவீத உள் ஒதுக்கீடு விவகாரத்தில் ஆதார ஆவணங்களைச் சமர்ப்பிக்குமாறு அரசின் அட்டர்னி ஜெனரல் வாகன்வதிக்கு நீதிபதிகள் உத்தரவிட்டனர்.
இவ்வழக்கு விசாரணை வரும் புதன்கிழமைக்கு ஒத்திவைக்கப்பட்டது.
0 கருத்துகள்:
கருத்துரையிடுக