தமிழகத்தில் உலா வரும் 2,000 போலி "டாக்டர்கள்': இந்திய மருத்துவ சங்க ஆய்வில் அதிர்ச்சி தகவல்

சென்னை : தமிழகம் முழுவதும், 2,000க்கும் மேற்பட்ட போலி சித்த மருத்துவர்கள், நோயாளிகளுக்கு சிகிச்சை அளித்து வரும் அதிர்ச்சி தகவல் வெளியாகியுள்ளது.


தமிழ்நாடு சித்த மருத்துவக் கவுன்சிலில் பதிவு செய்யப்பட்டதாக, போலி சான்றிதழை வைத்துக் கொண்டு, சித்த மருத்துவம் தொடர்பாக, எவ்வித பட்டமோ, தகுதியோ பெறாமல், 10 ஆண்டுகளுக்கு மேல் அனுபவம் இருப்பதாகவும், பாரம்பரிய மருத்துவ முறை மூலம் சிகிச்சை அளிக்கும் அறிவு இருப்பதாகவும் கூறி, கவுன்சிலின், "பி, சி' சான்றிதழ் மற்றும் டாக்டர்கள் பட்டியலை வைத்துக் கொண்டு, பலர் சிகிச்சை அளித்து வருகின்றனர்.


பதிவு:இவர்களது சான்றிதழ்களில், ஓய்வு பெற்ற பதிவாளர்களின் கையெழுத்துகள் இடம்பெற்றுள்ளன. அதனால், இந்திய மருத்துவ முறை மருத்துவர்களுக்கான கூட்டுறவு மருந்தகம் மற்றும் கடைகளுக்கான அமைப்பு (இம்ப்காப்ஸ்), இவர்களது சான்றிதழ்களை பதிவு செய்து கொண்டு, சிகிச்சையளிக்க அனுமதித்து வருகிறது.ஆனால், இந்த சான்றிதழ்கள் முழுக்க முழுக்க போலியாகத் தயாரிக்கப்பட்டுள்ளன. 2007ம் ஆண்டில் பதிவு செய்யப்பட்டவர்களில், 2,000 போலி டாக்டர்கள் இருப்பதாக, மாநில சித்த மருத்துவக் கவுன்சிலுக்கும், "இம்ப்காப்ஸ்'க்கும் கடந்த 2010ம் ஆண்டு தெரிவிக்கப்பட்டது. ஆனாலும், அவர்கள் தொடர்ந்து சிகிச்சையளிக்க அனுமதிக்கப்படும் நிலை நீடிக்கிறது.


சட்டம் அமல்: "பி, சி' மற்றும் பட்டியல் அடிப்படையில் பணிபுரியும் சித்த மருத்துவர்கள், பாரம்பரிய மற்றும் கிராமப்புறங்களில் சட்டப்பூர்வமாக பணிபுரிவதற்காக, தமிழ்நாடு சித்த மருத்துவ முறை சட்டம், 1997ல் அமல்படுத்தப்பட்டது.ஆனால் இந்த முறை, 2002ம் ஆண்டிலேயே நிறுத்தப்பட்டது. அதனால், இந்த முறையிலான மருத்துவர்கள், 60 வயதை அடைந்தவர்களாகத் தான் இருக்க முடியும். ஆனால், 30 வயது நிரம்பிய பலர் தற்போது இந்த முறை மூலம் சித்த மருத்துவச் சிகிச்சை அளித்து வருகின்றனர்.இந்த போலி சான்றிதழ்கள், 1997 மற்றும் 1998ம் ஆண்டுகளில் பெறப்பட்டது போல் முன்தேதியிட்டு தயாரிக்கப்பட்டுள்ளது. ஒரு மாதத்தில், 4,000 முதல் 8,000 வரை என்ற வரிசை எண்படி பெறப்பட்ட இந்த சான்றிதழ்களில் அச்சிடப்பட்டுள்ள எழுத்துக்கள், முத்திரைகள் வேறுபட்டுள்ளன.மேலும், 30 முதல் 40 வயது நிரம்பியவர்கள், "பி, சி' சான்றிதழ்களுடன் சிகிச்சை அளித்து வருவதே முதலில் சந்தேகத்தை ஏற்படுத்தியது. இது குறித்து, மாநில சித்த மருத்துவக் கவுன்சிலிடம் புகார் செய்யப்பட்டது. அவர்கள் மேற்கொண்ட விசாரணையில், 2,000 சான்றிதழ்களில் 400 போலி என்பது கண்டுபிடிக்கப்பட்டது.


நிராகரிப்பு:இது குறித்து, இந்திய சித்த மருத்துவ பட்டதாரிகள் சங்கத்தினர், தமிழக முதல்வரின் தனிப் பிரிவுக்கும், மாநகர போலீஸ் கமிஷனரிடமும் புகார் அளித்துள்ளனர்.

இது குறித்து, "இம்ப்காப்ஸ்' தலைவர் ராமலிங்கம் கூறுகையில், ""சமீபத்தில் 1,000 போலி சான்றிதழ்கள் நிராகரிக்கப்பட்டுள்ளன. போலி சான்றிதழ் புழக்கத்தில் இருப்பது தெரியவந்தவுடன், பல உறுப்பினர்களின் பதிவு விண்ணப்பங்கள் நிராகரிக்கப்பட்டுள்ளன. கடந்த ஜனவரி மாதம் முதல், புதுப்பித்தலும் நிறுத்தி வைக்கப்பட்டது. போலி சான்றிதழ் குறித்து மாநில சித்த மருத்துவக் கவுன்சிலுக்கும், இந்திய மருத்துவ முறைக்காக மத்திய குழுவுக்கும் சான்றிதழ்கள் அனுப்பப்பட்டு சரிபார்க்கப்பட்ட பிறகே பதிவு செய்யப்படுகிறது,'' என்றார்.

இதற்கிடையில், கடந்த 2007ம் ஆண்டு முதல் 2009ம் ஆண்டு வரை பதிவு செய்யப்பட்ட சான்றிதழ்களை, "இம்ப்காப்ஸ்' சித்த மருத்துவக் கவுன்சிலுக்கு அனுப்பி சோதனை செய்தது. இதில், 115 சான்றிதழ்கள் போலி என்பது கண்டறியப்பட்டது. "இம்ப்காப்ஸ்' இயக்குனர்கள் கூட்டத்தில் இந்த 115 சான்றிதழ்களின் பதிவு ரத்து செய்யப்பட்டுள்ளது.

சட்டம் என்ன சொல்கிறது :தமிழ்நாடு சித்த மருத்துவக் குழு சட்டத்தில் கூறியிருப்பதாவது: * இந்திய மருத்துவ முறைக்கான மத்திய வாரியம், இந்திய மருத்துவ முறைக்கான சென்னை அல்லது தமிழ்நாடு வாரியம் ஆகியவை, இந்திய மருத்துவ முறையில் பாரம்பரிய அல்லது மரபுரிமை அடிப்படையில் பயிற்சி பெற்ற சித்த மருத்துவர்களுக்கு சான்றிதழ் அளிக்கலாம்.
* 1970ம் ஆண்டு இந்திய மருத்துவ முறை மத்தியக் குழு சட்டத்தின் படி, அனுபவ அடிப்படையில் ஏற்கனவே பதிவு செய்தவர்களுக்கு, சான்றிதழ் அளிக்கலாம்.
* நிறுவனம் சாராமல் பயிற்சி பெற்றவர்களுக்கு, வாய்மொழித் தேர்வு மூலம் சான்றிதழ் அளிக்கலாம்.