விருத்தாசலம் புதுவாழ்வு திட்ட அலுவலகம் சார்பில் செய்தி குறிப்பு ஒன்று வெளியிடப்பட்டுள்ளது. அதில் கூறியிருப்பதாவது:–
புதுவாழ்வு திட்டத்தின் கீழ் கிராமங்களில் வறுமை ஒழிப்பு சங்கம் செயல்பட்டு வருகிறது. இந்த சங்கத்தின் மூலம் தமிழக அரசின் மின் ஆளுமை சேவைகளை வழங்கக்கூடிய பொது இ–சேவை மையம் செயல்பட இருக்கிறது. இந்த சேவை மையத்தில் வருவாய் துறை மூலம் வழங்கப்படும் சாதி, இருப்பிடம், வருமானம், முதல் பட்டதாரி சான்றிதழ், கணவனால் கைவிடப்பட்டோர் சான்றிதழ் போன்ற சான்றிதழ்களை அந்தந்த கிராமத்தில் கிராம வறுமை ஒழிப்பு சங்கத்தின் மூலம் செயல்படும் இ–சேவை மையத்திலேயே பெற முடியும்.
மேலும் சமூக நலத்துறையால் வழங்கப்படும் திருமண நிதி உதவி திட்டம், விதவை மறுமண நிதி, ஆதரவற்றோர், பெண்கள் திருமண நிதி, கலப்பு திருமண நிதி, முதல்–அமைச்சரின் பெண் குழந்தை பாதுகாப்பு திட்டம் ஆகிய திட்டங்கள் மூலம் பயன்பெற கிராம வறுமை ஒழிப்பு சங்கத்திலேயே விண்ணப்பிக்க வசதிகள் ஏற்படுத்தி கொடுக்கப்பட்டுள்ளது.
இதன் மூலமாக பொதுமக்கள் தங்கள் கிராமத்திலேயே விண்ணப்பித்த 7 முதல் 10 நாட்களுக்குள் சான்றிதழ் மற்றும் அரசு நலத்திட்ட உதவிகளை பெறமுடியும். இதனால் வட்டார வளர்ச்சி அலுவலகம், தாலுகா அலுவலகம், மாவட்ட கலெக்டர் அலுவலகம் சென்று அலையவேண்டிய நிலை இருக்காது மேற்கண்டவாறு அதில் கூறப்பட்டுள்ளது.
0 கருத்துகள்:
கருத்துரையிடுக