பரங்கிப்பேட்டையில் கொடுவா மீன் வளர்ப்பு குறித்து பயிற்சி முகாம்

பரங்கிப்பேட்டை:கொடுவா மீன் வளர்த்தால் கூடுதல் வருமானம் கிடைக்கும் என கடலோர மீனவர்களுக்கு மாவட்ட மீன்துறை துணை இயக்குநர் செல்வன் அறிவுரை வழங்கினார்.பரங்கிப்பேட்டை மீன்துறை உதவி இயக்குநர் அலுவலகத்தில் கடலூர் மற்றும் நாகப்பட்டினம் மாவட்ட கடலோர மீனவர்களுக்கு கொடுவா மீன் வளர்ப்பு குறித்து 5 நாள் பயிற்சி முகாம் நடந்தது. மீன் துறை ஆய்வாளர் ஜெயராஜ் தலைமை தாங்கினார்.மாவட்ட மீன் துறை துணை இயக்குநர் செல்வன், பயிற்சி முகாமை துவக்கி வைத்து பேசியதாவது:மீன் வள மேம்பாட்டிற்காவும், மீன் வளத்தினை பெருக்கவும் தமிழக அரசு பல்வேறு வளர்ச்சித் திட்டங்களை செயல்படுத்தி வருகிறது.பெருகி வரும் மக்கள் தொகைக்கு ஏற்ப எளிய முறையில் புரதம் நிறைந்த உணவு அளிப்பதில் மீன் வளம் பெரும் பங்கு வகிக்கிறது.

மீனின் தேவையும் அதிகரித்துக் கொண்டே வருகிறது.இயற்கை நீர் நிலைகளில் மீன் வளம் குறைந்து வருவதன் காரணமாக மீன் வளத்தைப் பெருக்குவது அவசியமாகிறது. நமது நாட்டில் வளர்ப்பு மீன்களாக நன்னீரில் கெண்டை மீன்களும், கடலோர உவர் நீர் நிலைகளில் இறால் மட்டுமே பெருவாரியாக வளர்க்கப்படுகிறது. இந்நிலை மாறி பல்வகை மீன்கள் வளர்க்கப்பட வேண்டும்.கடலோர மீனவர்களை கடல் மீன் பிடிப்பில் இருந்து மீன் வளர்ப்பிற்கு ஊக்குவிப்பதற்காக இதுபோன்ற பயிற்சிகள் நடத்தப்படுகிறது. மீனவர்கள் கொடுவா மீன் வளர்த்தால் கூடுதல் வருமானம் கிடைக்கும்.இவ்வாறு அவர் பேசினார்.ராஜீவ்காந்தி நீர் உயிரின கொடுவா மீன்வளர்ப்பு திட்ட மேலாளர் பாண்டியராஜ், பரங்கிப்பேட்டை அண்ணாமலை பல்கலைக்கழக கடல்வாழ் உயிரின பேராசிரியர் சீனிவாசன், மீன் வளர்ப்பு ஆலோசகர் தமிழ்மணி ஆகியோர் மீனவர்களுக்கு பயிற்சி அளித்தனர்.மீன்துறை சார் ஆய்வாளர் நவீன்சந்துரு நன்றி கூறினார்.