ரெயில் பிரசார பயணம்
அணுசக்திக்கு எதிரான மக்கள் இயக்க ஒருங்கிணைப்பாளரும், கூடங்குளம் அணுஉலை எதிர்ப்பாளருமான உதயகுமார் தலைமையிலான குழுவினர் அணு உலைக்கு எதிராக தமிழகம் முழுவதும் ரெயில் பயண பிரசாரம் செய்து வருகின்றனர். கடந்த 10–ந்தேதி நாகர்கோவிலில் பிரசாரத்தை தொடங்கிய இக்குழுவினர் நேற்று மதியம் 1.15 மணிக்கு சோழன் விரைவு ரெயிலில் கடலூர் வந்தனர்.
கடலூரில் அந்த குழுவினருக்கு தமிழர் தேசிய முன்னணி அமைப்பாளர்கள், நாம் தமிழர் கட்சி நிர்வாகிகள் வரவேற்பு அளித்தனர். அதை தொடர்ந்து
அக்குழுவின் தலைவர் உதயகுமார் அணுசக்திக்கு எதிரான விழிப்புணர்வு துண்டுபிரசுரங்களை ரெயில் பயணிகளுக்கு வழங்கினார். பின்னர் அவர் நிருபர்களிடம் கூறியதாவது:–
தரமான உதிரிபாகங்கள் இல்லை
அறிவியல் முன்னேற்றம், வளர்ச்சி என்ற பெயரில் தமிழ்நாட்டை அழிவு பாதைக்கு கொண்டு செல்கிற, நாசமாக்கும் திட்டத்தை மத்திய அரசு செய்து வருகிறது. தமிழ்நாட்டில் கூடங்குளம் அணுமின்நிலையம் வெற்றி திட்டம் என்று ஏமாற்றி வருகிறார்கள். தரமான உதிரிபாகங்கள் இல்லாமல் கூடங்குளம் அணுமின்நிலைய திட்டம் முடங்கி கிடக்கிறது. இந்த உண்மையை சொல்ல மறுக்கிறார்கள். கூடுதலாக அணுஉலைகளை அமைக்க முயற்சி செய்கிறார்கள்.
இது போன்ற அணுசக்தி எதிராக தமிழகத்தில் இருக்கக்கூடிய பெரிய கட்சிகளான அ.தி.மு.க., தி.மு.க. கருத்து தெரிவிக்காதது ஏன்? அவர்கள் வாய் மூடி மவுனமாக இருக்க காரணம் என்ன? இது போன்ற அணுசக்திகளால் தமிழக மக்களின் வாழ்வாதாரம் பாதிக்கும். எதிர்காலம் கேள்விக்குறியாகி விடும். இதை தடுக்க வலியுறுத்தி தான் நாகர்கோவிலில் இருந்து சென்னை வரை இந்த பிரசாரத்தை மேற்கொண்டு வருகிறோம்.
இவ்வாறு அணுசக்திக்கு எதிரான மக்கள் இயக்க ஒருங்கிணைப்பாளர் உதயகுமார் கூறினார்.
சிதம்பரம்
முன்னதாக சிதம்பரம் ரெயில் நிலையத்திற்கு மதியம் 12.35 மணி அளவில் சோழன் விரைவு ரெயிலில் வந்த உதயகுமாருக்கு தமிழர் தேசிய முன்னணி மாநில மாணவரணி அமைப்பாளர் ஜெயபிரகாஷ் தலைமையில் வரவேற்பு அளிக்கப்பட்டது. இதில் மாவட்ட செயலாளர் பாலசுப்பிரமணியன், அண்ணாமலைநகர் தலைவர் சண்முகநாதன், தமிழக ஒடுக்கப்பட்டோர் விடுதலை இயக்கம் மாவட்ட செயலாளர் விடுதலைச்செல்வம் உள்பட பலர் கலந்து கொண்டனர். தொடர்ந்து அந்த குழுவினர் பண்ருட்டியிலும் பிரசாரம் செய்தனர்.
0 கருத்துகள்:
கருத்துரையிடுக