பரங்கிப்பேட்டை:வாடிக்கையாளர் வங்கிக் கணக்கிலிருந்து ரூ.36 லட்சத்தை போலி காசோலை மூலம் பணப்பரிமாற்றம் செய்து மோசடியில் ஈடுபட்டதாக வங்கி ஊழியர் உள்பட 4 பேரை மாவட்ட குற்றப்பிரிவு போலீஸார் கைது செய்தனர்.கடலூர் மாவட்டம்,பரங்கிப்பேட்டையில் உள்ள இந்தியன் ஓவர்சீஸ் வங்கியின் வாடிக்கையாளர் அப்துல்மாலிக். இவர் தனது கணக்கிலிருந்து ரூ.2,700ஐ காசோலை மூலம் எடுத்து வர பி.முட்லூரில் உள்ள தனது உறவினரான அப்துல்ராஜ்மாலிக்கை வங்கிக்கு கடந்த செப்டம்பர் 10ஆம் தேதி அனுப்பி வைத்தார்.
அப்துல்ராஜ்மாலிக், காசோலையை வங்கியில் கொடுத்த போது அவர் கொடுத்த காசோலை எண் மூலமாக ஜூலை 22ஆம் தேதி ரூ.36 லட்சம் எடுக்கப்பட்டிருப்பது தெரியவந்தது.
இதையடுத்து வங்கிக் கிளை மேலாளர் பழனியப்பனிடம், அப்துல்ராஜ்மாலிக் முறையிட, வாடிக்கையாளரின் கணக்கை வங்கி மேலாளர் ஆய்வு செய்தார். அதில், ரூ.36 லட்சம் பணம் திருப்பூரில் உள்ள ஸ்டேட் பாங்க் ஆப் திருவாங்கூர் வங்கிக் கிளை மூலம் அருள்பரமசிவம் என்பவர் வங்கிக் கணக்கில் செலுத்தப்பட்டிருப்பது தெரிய வந்தது. தீர விசாரித்த போது, செக் மோசடி மூலம் அருள்பரமசிவம் பணத்தை எடுத்திருப்பது தெரியவந்துள்ளது. இதையடுத்து வங்கி மேலாளர் பழனியப்பன், கடலூர் மாவட்டக் குற்றப்பிரிவு போலீஸில் புகார் அளித்தார். அதன்பேரில் மாவட்டக் குற்றப்பிரிவு ஆய்வாளர் செந்தில்விநாயகம், அருள்பரமசிவத்தை நவம்பர் 8ஆம் தேதி கைது செய்து விசாரணை நடத்தினார்.
விசாரணையில், காசோலை மோசடியில் திருப்பூரைச் சேர்ந்த ஈஸ்வரன், புதுச்சேரியைச் சேர்ந்த முகமதுஅலி, வளவனூர் இந்தியன் ஓவர்சீஸ் வங்கி ஊழியர் இஸ்மாயில் ஆகியோர் ஈடுபட்டிருப்பது ஊர்ஜிதமானது. இதையடுத்து 3 பேரையும் வியாழக்கிழமை மாவட்டக் குற்றப்பிரிவு போலீஸார் கைது செய்தனர். இந்த மோசடியில் தொடர்புடைய மேலும் இருவரை தேடிவருகின்றனர்.
0 கருத்துகள்:
கருத்துரையிடுக