பவர் பிளான்ட் விபத்து :மேலும் ஒரு தொழிலாளி சாவு

பரங்கிப்பேட்டை: பரங்கிப்பேட்டையில், தனியார் அனல்மின் நிலைய கட்டுமானப் பணியின் போது ரோப் அறுந்து லிப்ட் கீழே விழுந்த விபத்தில், மேலும் ஒரு தொழிலாளி நேற்று இறந்தார்.

கடலுார் மாவட்டம், பரங்கிப்பேட்டை அடுத்த கரிக்குப்பம் கிராமத்தில் தனியார் அனல்மின் நிலைய கட்டுமானப் பணிகளை 'எல் அண்ட் டி' நிறுவனம் செய்து வருகிறது.
கடந்த 26ம் தேதி, பீகார் மாநிலத்தைச் சேர்ந்த 7 தொழிலாளர்கள் 250 மீட்டர் உயரம் உள்ள சிம்னியில் வெல்டிங் பணி செய்து கொண்டிருந்தபோது, ரோப் அறுந்து லிப்ட் கீழே விழுந்தது.
இதில், பீகார் மாநிலத்தைச் சேர்ந்த சோனுராஜ் சவுத்திரி (20), முகித்கான் (31) ஆகிய இருவரும் உடல் நசுங்கி சம்பவ இடத்திலேயே இறந்தனர்.
வினோத்குமார் (21), சந்தோஷ்குமார் (32), சந்தோஷ் புஷ்ஆகா (29), தயாமுதீன் (36), சுரேந்தர் (24) ஆகிய ஐந்து பேர் படுகாயமடைந்து, சிதம்பரம் அண்ணாமலைநகர் ராஜா முத்தையா மருத்துவக் கல்லுாரி மருத்துவமனையில் சிகிச்சை பெற்று வருகின்றனர். இதில், வினோத்குமார் மேல் சிகிச்சைக்காக புதுச்சேரி ஜிப்மர் மருத்துவமனையில் சேர்க்கப்பட்டு, சிகிச்சை பெற்று வந்தார். அங்கு, நேற்று வினோத்குமார் இறந்தார். இதுகுறித்து பரங்கிப்பேட்டை இன்ஸ்பெக்டர் உதயகுமார் வழக்குப் பதிந்து விசாரணை நடத்தி வருகிறார்

தலா ரூ.8 லட்சம் நிவாரணம்

இதனிடையே இதுகுறித்து தகவல் அறிந்த சிதம்பரம் எம்எல்ஏ கே.பாலகிருஷ்ணன் அந்நிறுவனத்துக்குச் சென்று பார்வையிட்டு தொழிலாளர்களிடம் குறைகளை
கேட்டறிந்தார். பின்னர், தொழிலாளர்கள் பிரச்னைகள் குறித்து உடனடியாக நடவடிக்கை எடுக்குமாறு சிதம்பரம் உதவிஆட்சியரிடம் மனு அளித்து வலியுறுத்தினார். மனுவின் பேரில் சிதம்பரம் உதவி ஆட்சியர் அந்த மின்உற்பத்தி நிறுவனத்துக்கு செவ்வாய்க்கிழமை காலை சென்று விசாரணை மேற்கொண்டார்.
இதைத்தொடர்ந்து, சிதம்பரம் உதவி ஆட்சியர் அலுவலகத்தில் அமைதிப் பேச்சுவார்த்தை கூட்டம் செவ்வாய்க்கிழமை மாலை நடைபெற்றது.
கூட்டத்துக்கு உதவிஆட்சியர் எம்.அரவிந்த் தலைமை வகித்தார். வட்டாட்சியர் ஜி.அன்புச்செல்வி முன்னிலை வகித்தார்.
கூட்டத்தில் கே.பாலகிருஷ்ணன் எம்எல்ஏ, டிஎஸ்பி ஆர்.ராஜாராம், மின் உற்பத்தி நிறுவன மேலாளர் வரதராஜன், எல்.அன்ட்.டி நிறுவன மேலாளர்கள் தானப்பபிள்ளை, சுரேஷ்பாபு, மார்க்சிஸ்ட் கம்யூனிஸ்ட் கட்சி மாவட்ட செயற்குழு உறுப்பினர் பி.கற்பனைச்செல்வம், பரங்கிப்பேட்டை ஒன்றியச் செயலாளர் எம்.ஜி.ரமேஷ்பாபு, கரிக்குப்பம் பகுதிச் செயலாளர் பரமானந்தம், விவசாய சங்க ஒன்றிய அமைப்பாளர் கருணைச்செல்வம் உள்ளிட்டோர் பங்கேற்றனர்.
  உயிரிழந்த தொழிலாளர்கள் குடும்பத்துக்கு தலா ரூ.8 லட்சம் இழப்பீடு வழங்குவது என உதவிஆட்சியர் தலைமையில் நடைபெற்ற அமைதிப் பேச்சுவார்த்தை கூட்டத்தில் முடிவு செய்யப்பட்டது.
கூட்டத்தில் விபத்தில் இறந்த தொழிலாளர்களின் குடும்பத்துக்கு முதல் தவணையாக ரூ.2 லட்சம் உடனடியாக வழங்கப்பட்டது.
மேலும், இறந்த தொழிலாளர்கள் குடும்பத்தில் ஒருவருக்கு வேலை வழங்க நடவடிக்கை மேற்கொள்வது, அடிப்படை வசதி, மருத்துவ வசதி உள்ளிட்ட வசதிகளை மேற்கொள்வது, சட்டரீதியான அடிப்படை சம்பளம் வழங்குவது, சம்பளம் குறித்து சம்பள பில் வழங்குவது, மேற்கண்ட முடிவுகளை அமலாக்கம் செய்யப்பட்டது குறித்து செப்டம்பர் முதல் வாரத்தில் ஆய்வுக் கூட்டம் நடத்துவது என கூட்டத்தில் முடிவுகள் எடுக்கப்பட்டன