பாலிஷ் போட்டுத் தருவதாக நூதன முறையில் நகைத் திருட்டு

சிதம்பரம்: மணலூரில் நகைக்கு பாலிஷ் போட்டு கொடுப்பதாக கூறி 6 சவரன் நகைகளை அபேஸ் செய்த வடநாட்டு ஆசாமியை போலீசார் தேடி வருகின்றனர். சிதம்பரம் அடுத்த மணலூரைச் சேர்ந்த கலிவரதன் மகன் ரவி. நேற்று முன்தினம் இவரது வீட்டில் 2 பேர் பழைய நகைகளுக்கு தங்க பாலிஷ் போட்டுக் கொடுக்கிறேன் என கேட்டுள்ளனர். ரவி மனைவி மற்றும் தாய் வீட்டில் இருந்த வெள்ளிக் கிண்ணம், கொலுசு மற்றும் பஞ்சபாத்திரம் ஆகியவைகளைக் கொடுத்தனர். அவர்கள் பாலிஷ் போட்டு கொடுத்துள்ளனர். குறைவான விலையில் பாலிஷ் போட்டுக் கொடுத்ததால், அழுக்காக இருந்த ரவி மனைவியின் தாலி ஜெயின், தாலி மற்றும் தாலி குண்டு, காசு என 6 சவரன் கொண்ட தங்க நகைகளை பாலிஷ் போட கொடுத்தனர். உடன் அந்த நபர்கள், வீட்டில் உள்ள குக்கரை எடுத்து வரச்சொல்லி, அதில் தண்ணீர் ஊற்றி நகை, மஞ்சள் தூள் போட்டு லேசாக கொதிக்க வைத்தால் அழுக்கு போய்விடும் என கூறிவிட்டு, பக்கத்து வீடு வரை போய் வருகிறோம் என சென்றனர். குக்கரில் ஆவி வந்தவுடன் திறந்த பார்த்தால் அதில் போடப்பட்ட தங்க நகைகளைக் காணாமல் போயிருப்பது கண்டு அதிர்ச்சி அடைந்தனர். பாலிஷ் போடும் ஆசாமிகளை பல இடங்களில் தேடியும் கிடைக்கவில்லை. பாலிஷ் போடுவதாக கூறி, குக்கரில் தங்க நகைகளை போடுவது போல் போட்டு எடுத்து அபேஸ் செய்திருப்பது தெரியவந்தது. கொள்ளை போன நகைகளின் மதிப்பு ஒரு லட்சம் ரூபாய் ஆகும். இது குறித்து ரவி கொடுத்த புகாரின் பேரில் சிதம்பரம் தாலுகா போலீசார் வழக்குப் பதிவு செய்து தலைமறைவான மர்ம நபர்களை தேடி வருகின்றனர்.