கடலூர் மாவட்டத்தில் 82 பள்ளிகளில்இந்தாண்டு ஆங்கில வழிக்கல்வி துவக்கம்

கடலூர்:கடலூர் மாவட்டத்தில் உள்ள அரசு தொடக்க, நடுநிலைப் பள்ளிகளில் இந்தாண்டு 82 பள்ளிகளில் ஆங்கில வழிக்கல்வி துவங்கப்பட்டுள்ளது.தமிழகத்தில் உள்ள அரசு தொடக்க மற்றும் நடுநிலைப் பள்ளிகளில் மாணவர் சேர்க்கை எண்ணிக்கை வெகுவாக குறைந்து வருகிறது. ஆசிரியர்கள் பற்றாக்குறை இருந்த காலம் போக, தற்போது மாணவர்கள் இல்லாத பள்ளிகள் இருக்கும் நிலைக்கு அரசு பள்ளிகள் தள்ளப்பட்டன. இதற்கு பெற்றோர்களிடம் ஏற்பட்டுள்ள ஆங்கில வழிக்கல்வி மோகம் காரணமாகும்.

மெட்ரிக் பள்ளிகளில் குழந்தைகளை சேர்த்தால்தான் உயர்கல்வி படிப்பதற்கான இடம் கிடைக்கும் என்பதால் பல பெற்றோர் அரசு பள்ளிகளில் தங்கள் பிள்ளைகளை சேர்க்காமல் மெட்ரிக் பள்ளிகளில் சேர்த்து வந்தனர்.
தமிழகத்தில் அரசு பள்ளிகளில் மாணவர்கள் சேர்க்கையை அதிகப்படுத்த பல்வேறு வழிமுறைகளை மாநில அரசு நடைமுறைப்படுத்தி வருகிறது. இதன் ஒரு பகுதியாக அனைத்து அரசு தொடக்க மற்றும் நடுநிலைப்பள்ளிகளில் ஆங்கில வழிக்கல்வி வகுப்புகளை துவங்க திட்டமிட்டது.
அதன்படி கடந்த 2012-13ம் ஆண்டில் தமிழகத்தில் உள்ள அரசு பள்ளிகளில் அறிமுக வகுப்பான எல்.கே.ஜி., மற்றும் 6ம் வகுப்புகளில் ஆங்கில வழிக்கல்வி துவங்கப்பட்டது.
மாவட்டத்தில் 1,424 ஊராட்சி ஒன்றிய தொடக்கப் பள்ளி மற்றும் நடுநிலைப் பள்ளிகள் உள்ளது. கடந்த 2013-14ம் ஆண்டில் கடலூர் மாவட்டத்தில் 169 பள்ளிகளில் ஆங்கில வகுப்புகள் தொடங்கப்பட்டது.
இந்தாண்டு 82 தொடக்க மற்றும் நடுநிலை, நகராட்சி பள்ளிகளில் ஆங்கில வகுப்பு தொடங்கப்பட்டுள்ளது. மாவட்டத்தில் தற்போது ஊராட்சி ஒன்றிய தொடக்கப் பள்ளிகளில் 763 மாணவர்களும், நகராட்சி தொடக்கப் பள்ளியில் 42 மாணவர்களும், ஊராட்சி ஒன்றிய நடுநிலைப் பள்ளிகளில் 253 பேரும், நகராட்சி நடுநிலைப் பள்ளிகளில் 16 பேர் ஆங்கில வகுப்பில் சேர்க்கப்பட்டுள்ளனர்.