கடலூர் :45 நாட்கள் மீன்பிடி தடைக்காலத்திற்கு பிறகு கடலூர் துறைமுகத்தில் நேற்று மத்தி மீன்கள் வரத்து அதிகமாக காணப்பட்டது. மேலும், அரியவகை மீன்களில் ஒன்றான மயில் மீன்களும் சிக்கின.
கடலூர் மாவட்டத்தில் இருந்து நாள்தோறும் கடலூர் முதுநகர் சிங்காரத்தோப்பு, சோனாங்குப்பம், அக்கரைக்கோரி, தேவனாம்பட்டினம் ,பரங்கிப்பேட்டை சுற்றி உள்ளிட்ட மீனவ கிராமங்களை சேர்ந்த ஆயிரத்துக்கும் அதிகமான மீனவர்கள் நூற்றுக்கும் மேற்பட்ட விசை மற்றும் பைபர் படகுகளில் மீன்பிடிக்க ஆழ்கடலுக்கு சென்று வருவது வழக்கம்.
இந்நிலையில் கடந்த ஏப்ரல் மாதம் 15-ந் தேதி முதல் மே 29-ந் தேதி வரை மீன்பிடி தடை காலமாக அறிவிக்கப்பட்டது. இதையடுத்து மீனவர்கள் யாரும் கடலுக்கு மீன்பிடிக்க செல்லவில்லை. இந்த நாட்களில் படகு பராமரிப்பு, வலை சீரமைப்பு போன்ற பணிகளில் மீனவர்கள் ஈடுபட்டு வந்தனர்.
இந்நிலையில் 45 நாட்களாக அமலில் இருந்த மீன்பிடி தடைக்காலம் நேற்று இரவு முடிவுக்கு வந்தாலும் ஒரு சில மீனவர்கள் நேற்று முன்தினமே மீன்பிடிக்க கடலுக்கு சென்றனர்.
நீண்ட இடைவெளிக்கு பின்னர் நாட்டு படகுகளில் சென்ற மீனவர்கள் வலையில் 100 டன் மத்தி மீன்கள் கிடைத்தன. 40 கிலோ எடை கொண்ட மத்தி மீன்கள் அடங்கிய பெட்டி ஆயிரம் ரூபாய்க்கு விலைபோனது. மேலும் கவளை மீன் 3 டன்னும், இதர மீன்களும் கிடைத்தன. மீன்களை கேரள வியாபாரிகள் போட்டிப்போட்டுக் கொண்டு ஏலம் எடுத்தனர். பின்னர், மீன்களை ஐஸ்பெட்டியில் அடைத்து லாரி மூலம் கேரளாவிற்கு அனுப்பி வைத்தனர். அரியவகை மீன்களில் ஒன்றான மயில் மீன்களை தூண்டிலில் மட்டுமே பிடிக்க முடியும். இந்நிலையில், நேற்று தூண்டிலில் 15 மயில்மீன்கள் பிடிக்கப்பட்டன. இந்த மீன்கள் ஒவ்வொன்றும் சுமார் 100 முதல் 150 கிலோ எடை கொண்டது. மருத்துவ குணம் கொண்ட இந்த மீன்கள் பெங்களூருக்கு ஏற்றுமதி செய்யப்பட்டது. தடைக்காலம் முடிவடைந்ததை தொடர்ந்து மீனவர்கள் கடலுக்குள் சென்று அவர்களின் பணியை தொடங்கியதால், மீன் ஏலம் விடும் தலம் பரபரப்பாக காட்சியளித்தது.
0 கருத்துகள்:
கருத்துரையிடுக