அடிப்படை வசதிகள் இன்றி பழுதடைந்து வரும் பரங்கிப்பேட்டை ரயில் நிலையம்

பரங்கிப்பேட்டை:பரங்கிப்பேட்டை ரயில் நிலையத்தில் அடிப்படை வசதிகள் இருந்தும் செயல்படுத்த ஊழியர்கள் கவனம் செலுத்தாததால் பயணிகளின் அவதி நாளுக்கு நாள் அதிகரித்து வருகிறது.
விழுப்புரம்- மயிலாடுதுறை அகல ரயில் பாதையில் எக்ஸ்பிரஸ் மற்றும் பாசஞ்சர் ரயில்கள் இயக்கப்படுகிறது. பரங்கிப்பேட்டையில் பாசஞ்சர் ரயில்கள் மட்டும் நின்று செல்கின்றன.

பரங்கிப்பேட்டையை சுற்றியுள்ள பொதுமக்கள், கல்லூரி மாணவர்கள் மற்றும் வியாபாரிகள் என அனைவரும் பயனடைந்து வருகின்றனர். இங்கு தினமும் சுமார் 20 ஆயிரம் ரூபாய் வரை டிக்கெட்டில் வருவாய் வருகிறது.

இங்கு ரயில் பயணிகளுக்கு தேவையான அடிப்படை வசதிகள் இருந்தும் முறையாக செயல்படுத்த ஊழியர்கள் ஆர்வம் காட்டவில்லை.ரயில்வே பிளாட்பாரத்தில் முள்செடிகள் வளர்ந்து பல மாதங்களாக வெட்டவில்லை. பயணிகள் உட்காரும் இடம், பிளாட்பாரங்களில் குப்பைகள் சுத்தப்படுத்தாமல் தேங்கி சுகாதார சீர்கேடு ஏற்பட்டு, துர்நாற்றம் வீசுகிறது.
இதனால் அங்கு சென்று உட்கார பயணிகள் அச்சமடைந்து மரத்தடி நிழலில் கால்கடுக்க நின்றிருந்து ரயில் ஏறிச் செல்கின்றனர். ரயில் நிலையத்தில் குடிநீர் வசதி செய்துக் கொடுக்காததால் பயணிகள் குடிநீருக்கு அலைய வேண்டிய நிலை உள்ளது. ரயில் பயணிகள் வசதிக்காக புதியதாக கட்டிய கழிப்பிட வசதி பல மாதங்களாக திறக்காமல் காட்சி பொருளாக பூட்டியே இருப்பதால் அவசர நேரங்களில் ரயில் பயணிகள் அவதியடைகின்றனர். ரயில் நிலையத்தில் இருந்து பிளாட்பாரம் வரை மின்சார வசதி இருந்தும் இரவு நேரங்களில் விளக்குகள் எரியாததால் பிளாட்பாரம் முழுவதும் இருள் ‹ழ்ந்துள்ளது. இதனால் ரயிலில் இருந்து இறங்கி வீட்டிற்கு செல்லும் போது பிளாட்பாரத்தில் உள்ள முள்செடிகளில் அடிக்கடி சிக்கிக்கொள்கின்றனர்.
ஓசியில் பயணம்
ரயில் நிலையத்தில் உள்ள டிக்கெட் அலுவலகத்தை அடிக்கடி பூட்டி விடுகின்றனர். பயணிகள் டிக்கெட் எடுக்க முடியாமல் ஓசியில் பயணம் செய்வது வாடிக்கையாகிறது. வழியில் செக்கிங் இன்ஸ்பெக்டரிடம் சிக்கிக் கொண்டால் யார் அசிங்கப்படுவது என பயணிகள் வேதனையுடன் கூறுகின்றனர்.
டிக்கெட் அலுவலகத்தில் முன்பதிவு, தத்கால் வசதி செய்துதராததால் பயணிகள் சிதம்பரம், கடலூர் செல்ல வேண்டிய நிலை உள்ளது. மேலும் மூன்று நிமிடம் நிற்க வேண்டிய பாசஞ்சர் ரயில்கள் ஒரு நிமிடத்திற்குள் சென்று விடுவதால் பயணிகள் ரயிலில் இருந்து இறங்கவும், ஏறவும் முடியாததால் அடிக்கடி விபத்துகள் நடந்து வருகிறது.பரங்கிப்பேட்டை ரயில் நிலையத்திற்கு செல்லும் சாலை மிகவும் குறுகலாக உள்ளது. ரயில் நிலையத்தின் கட்டிடம் பழுதடைந்து மூலையில் லேசாக பெயர்ந்து விழுந்துள்ளது. ரயில் நிலையத்தில் ஏறி செல்லும் சாய்வு பாதையொட்டி முள் புதர்கள் முளைத்து அந்த பாதையில் செல்ல முடியாத நிலை உள்ளது. பயணிகள் உட்காருவதற்கு உரிய வசதிகள் உள்ளிட்டவை இல்லாததால் இந்த ரயில் நிலையத்திற்கு வரும் பயணிகள் கடும் அவதிப்படும் நிலை உள்ளது

பரங்கிப்பேட்டை ரயில் நிலையத்தை சுற்றிலும் முட்புதர்கள் மண்டி ரயில் நிலையம் பாதுகாப்பற்றதாக உள்ளது. எனவே ரயில் நிலையத்தில் உள்ள முட்புதர் களை அகற்றி பாழடைந்து வரும் கட்டிடத்தை சீரமைத்து பயணிகளுக்கு அடிப்படை வசதிகளை ஏற்படுத்தி தர வேண்டும் என அப்பகுதி மக்கள் கோரிக்கை வைத்துள்ளனர்.
எனவே ரயில்வே பயணிகளுக்கு அடிப்படை வசதிகள் மற்றும் முன்பதிவு, தத்கால் உள்ளிட்ட வசதிகள் செய்து தர அதிகாரிகள் நடவடிக்கை எடுக்க வேண்டும்.