வாழ்விடம் தேடி வாழ்வைத் தொலைக்கும் மான்கள்,மயில்கள்

கடலூர்:வறட்சியால் வாழ்விடத்தை தொலைத்த மான்கள், உயிர்பிழைக்க குடியிருப்பு பகுதிகளில் நுழையும் போது நாய்கள் கடித்தும், சமூக விரோதிகளாலும் உயிரிழக்கின்றன.
கடலூர் மாவட்டம், வேப்பூர் அருகேயுள்ள கிருஷ்ணாபுரத்தில் 55 சதுர கி.மீ. சுற்றளவில் 6,112 ஏக்கர் பரப்பளவில் தமிழக அரசுக்குச் சொந்தமான வனப்பகுதி உள்ளது. விழுப்புரம் மாவட்டம், உளுந்தூர்பேட்டை தேசிய நெடுஞ்சாலையில் பாதூர் கிராமத்தில் தொடங்கி கடலூர் மாவட்டம், வேப்பூர் கூட்டுரோடு வழியாக வடபுறம், பெரியநெசலூர், அடரி, அரசங்குடி நாங்கூர் வழியாக விருத்தாசலம்-சேலம் மாநில நெடுஞ்சாலை வரை இந்த வனப்பகுதி உள்ளது.
இங்கு ஏராளமான மயில்கள், மான்கள், குரங்குகள், எறும்புத் தின்னிகள், காட்டுப் பன்றிகள் மற்றும் பறவை இனங்கள் வசிக்கின்றன.
கடலூர், விழுப்புரம் மாவட்டங்களில் பிடிக்கப்படும் பாம்புகள் இங்கு விடப்படுகின்றன. வன விலங்குகள் நலன் கருதி 50 ஆண்டுகளுக்கு முன், ஆச்சான், புங்கை, நாவல், வேம்பு உள்பட பல வகையான மரங்களும், விலங்குகளின் உணவுத் தேவையை நிறைவு செய்ய பல வகையான பழச்செடிகள், மரங்கள் வைத்து பராமரிக்கப்பட்டு வந்தன. ஆனால், தற்போது அவை பராமரிப்பின்றி அழிந்து வருகின்றன.
பராமரிக்கப்படாத குடிநீர்த் தொட்டிகள்: கடந்த 1991-ல் வன விலங்குகளின் தாகத்தை தீர்க்க, வனப் பகுதிக்குள் தரையில் பல இடங்களில் சிமென்ட் தொட்டிகள் அமைக்கப்பட்டன. கோடை காலங்களில் தொட்டிகளில் லாரிகள் மூலம் தண்ணீர் கொண்டு வந்து நிரப்ப வேண்டும்.
ஆனால், வனத் துறை அலட்சியத்தால் 10 ஆண்டுகளாக தண்ணீர் நிரப்பாமல், தொட்டியில் புதர்கள் படர்ந்தன. மழைக் காலங்களில் கிடைக்கும் தண்ணீரை சேமிக்க, வனப் பகுதிக்குள் கட்டிய தடுப்பணையிலும் தண்ணீர் இல்லாமல், வன விலங்குகள் தண்ணீர் தேடி அலையும் நிலை ஏற்பட்டுள்ளது.
உயிர் பிழைக்க வெளியேறி உயிரிழக்கும் மான்கள்: இங்குள்ள வன விலங்குகள் தண்ணீர், உணவு தேடி விருத்தாசலம்-சேலம் சாலையை கடந்து குடியிருப்புப் பகுதிகளுக்குள் நுழையும் போது, வாகனங்களில் சிக்கி இறக்கின்றன. மேலும், ஊருக்குள் வரும் மான்களை நாய்கள் விரட்டி கடிக்கின்றன. இதனால், கடந்த 5 மாதங்களில் மட்டும் 10-க்கும் மேற்பட்ட மான்கள் இறந்துள்ளன. தப்பிப் பிழைத்து ஊருக்குள் வரும் மான்களை ஒரு சிலர் இறைச்சிக்காக கொன்றுவிடுகின்றனர்.

கண்காணிப்பு அவசியம்: வனப்பகுதி முழுவதும், 24 மணி நேரமும் குடிமகன்களின் பாராக மாறிவிடுகிறது. அவர்கள் கண்ணில் படும் வன விலங்குகளையும் அடித்து, கொன்று சமைத்து சாப்பிட்டு விடுகின்றனர். இதைத் தடுக்க வனத்துறையினர் ரோந்து மேற்கொள்ள வேண்டும்.
வன விலங்குகள் சாலையை கடக்க முயன்று வாகனங்களில் சிக்கி இறப்பதை தடுக்கவும், காட்டுப்பன்றிகள் போன்றவற்றால் விவசாயப் பயிர்கள் சேதமாவதை தடுக்கவும் வனப் பகுதியைச் சுற்றிலும் தடுப்பு வேலி அமைக்க வேண்டும்.
மேலும், வன விலங்குகளின் தாகத்தைத் தீர்க்க தண்ணீர் தொட்டிகளில் தண்ணீர் நிரப்பவும், தடுப்பணை கட்டியுள்ள இடத்தை மழைக் காலத்திற்குள் தூர் வாரி, அகலப்படுத்தவும் அரசு நடவடிக்கை எடுக்க வேண்டும் என்பதே சமூக ஆர்வலர்களின் எதிர்பார்ப்பாக உள்ளது.