தி.மு.க.கூட்டணியில்’’ விடுதலை சிறுத்தைகள் கட்சிக்கு சிதம்பரம் தொகுதி

சென்னை:தி.மு.க. தலைமையிலான ‘‘ஜனநாயக முற்போக்கு கூட்டணியில்’’ விடுதலை சிறுத்தைகள் கட்சிக்கு சிதம்பரம் தொகுதி ஒதுக்கீடு செய்யப்பட்டுள்ளது

தி.மு.க. தலைமையிலான ‘‘ஜனநாயக முற்போக்கு கூட்டணி’’யில் தொகுதி பங்கீடு பேச்சுவார்த்தை கடந்த 4–ந்தேதி தொடங்கியது. முதல் நாள் பேச்சுவார்த்தையில் புதிய தமிழகம் கட்சிக்கு தென்காசி தொகுதியும், மனிதநேய மக்கள் கட்சிக்கு மயிலாடுதுறை தொகுதியும் ஒதுக்கப்பட்டது.

2–வது நாளாக நேற்றுமுன்தினம் நடைபெற்ற பேச்சுவார்த்தையில், இந்திய யூனியன் முஸ்லிம் லீக் கட்சிக்கு வேலூர் தொகுதி ஒதுக்கப்பட்டது. அதைத்தொடர்ந்து 3 கட்சி தலைவர்களும், தி.மு.க. தலைவர் கருணாநிதியும் தொகுதி உடன்பாடு ஒப்பந்த அறிக்கையில் கையெழுத்திட்டனர்.

 

விடுதலை சிறுத்தைகள் கட்சி தரப்பில் 3 பொது தொகுதிகள், 2 தனி தொகுதிகள் என 5 தொகுதிகள் கேட்டு நடைபெற்ற தொகுதி பங்கீடு பேச்சுவார்த்தை இழுபறியில் இருந்து வந்தது.

இதனால் நேற்று முன்தினம் தொல்.திருமாவளவன் உள்பட விடுதலை சிறுத்தைகள் கட்சி நிர்வாகிகள் கூட்டத்தில் இருந்து பாதியிலேயே வெளியேறினர்.

இந்த நிலையில் நேற்று விடுதலைசிறுத்தைகள் கட்சி சார்பில் தொகுதி பங்கீடு தொடர்பாக பேச காலையில் நேரம் ஒதுக்கி தருமாறு தி.மு.க. பொருளாளர் மு.க.ஸ்டாலின் தலைமையிலான தொகுதி பங்கீட்டு குழுவினரிடம் அனுமதி கோரப்பட்டது.

 

ஆனால் தொகுதி பங்கீட்டு குழுவினர் மாலை 6 மணிக்கு வரும்படி விடுதலை சிறுத்தைகள் கட்சி நிர்வாகிகளை கேட்டுக்கொண்டனர். இதைத்தொடர்ந்து நேற்று மாலை தொல்.திருமாவளவன், பொதுச்செயலாளர் ரவிக்குமார், செய்தி தொடர்பாளர் வன்னியரசு, கொள்கை பரப்புச்செயலாளர் எஸ்.எஸ்.பாலாஜி ஆகியோர் அண்ணா அறிவாலயத்துக்கு வந்தனர்.

 

அங்கு கருணாநிதி மற்றும் மு.க.ஸ்டாலின் தலைமையிலான தொகுதி பங்கீடு குழுவினரிடம் பேச்சுவார்த்தையில் ஈடுபட்டனர். பேச்சுவார்த்தை முடிவில் விடுதலை சிறுத்தைகள் கட்சிக்கு சிதம்பரம் தொகுதி ஒதுக்குவது என்று தீர்மானிக்கப்பட்டது. இதற்கு தொல்.திருமாவளவன் உள்பட நிர்வாகிகள் சம்மதம் தெரிவித்தனர்.

இதனையடுத்து சிதம்பரம் தொகுதியினை பெற்றதற்கான, தொகுதி உடன்பாடு தொடர்பான அறிக்கையில் தி.மு.க. தலைவர் கருணாநிதி முன்னிலையில் தொல்.திருமாவளவன் கையெழுத்திட்டார்.

கடந்த பாராளுமன்ற தேர்தலின்போது, தி.மு.க. கூட்டணியில் இருந்த விடுதலை சிறுத்தைகள் கட்சிக்கு விழுப்புரம், சிதம்பரம் ஆகிய 2 தொகுதிகள் ஒதுக்கி தரப்பட்டது. அதில் விழுப்புரம் தொகுதியில் விடுதலை சிறுத்தைகள் கட்சி தோல்வி அடைந்தது குறிப்பிடத்தக்கது.