இதுகுறித்து கடலூரில் அவர் செய்தியாளர்களுக்கு வியாழக்கிழமை அளித்த பேட்டி: நாடாளுமன்றத் தேர்தல் தேதி அறிவிக்கப்பட்டுள்ளதால், அரசியல் கட்சிகள் மற்றும் அதன் வேட்பாளர்களுக்கான தேர்தல் நடத்தை விதிகள் அனைத்தும் உடனடியாக அமலுக்கு வருகிறது.
தேர்தல் நடத்தை விதிகளை கண்காணிக்க வட்டாட்சியர், காவல்துறையினர், காவலர்கள் மற்றும் விடியோகிராபர்கள் அடங்கிய குழுவினரின் பறக்கும்படை, நிலையான கண்காணிப்புக் குழு உடனடியாக அமைக்கப்படுகிறது.
தேர்தல் தொடர்பாக புகார்கள் அளிக்க மாவட்ட ஆட்சியர் அலுவலகத்தில் 24 மணிநேரம் செயல்படும் கட்டுப்பாட்டு அறை அமைக்கப்பட்டுள்ளது. கட்டுப்பாட்டு அறையை 18004257035 என்ற கட்டணமில்லா தொலைபேசி எண்ணில் தொடர்பு கொண்டு தகவல் தெரிவிக்கலாம்.
அரசு ஊழியர்கள் மற்றும் அரசு வாகனங்களை பிரசாரத்துக்கு பயன்படுத்தக்கூடாது. வாக்குச்சாவடி மற்றும் வாக்கு எண்ணும் பகுதிக்கு அமைச்சர்கள் செல்லக்கூடாது. வேட்பாளர் அல்லது வாக்காளர், முகவர்கள் மட்டும் செல்லலாம். சாதி, மதம், மொழி இன ரீதியாக வெறுப்புணர்வை தூண்டக் கூடாது. வழிபாட்டுத் தலங்களில் தேர்தல் பிரசாரம் செய்யக்கூடாது.
கொள்கை, செயல் குறித்து மற்ற கட்சிகளை விமர்சிக்கலாமேத் தவிர, தனிப்பட்ட விஷயங் களை விமர்சிக்கக் கூடாது. மற்ற கட்சிகளுக்குள் குழப்பத்தை ஏற்படுத்த முயலக் கூடாது.
அனுமதி பெறாமல் தனியார் இடங்களை பயன்படுத்தக் கூடாது. தொலைக்காட்சிகளில் விளம்பரம் செய்ய 3 நாட்களுக்கு முன் அனுமதி பெற வேண்டும். வாக்காளர்களுக்கு பணம் கொடுப்பது போன்ற செயல்களில் ஈடுபடக்கூடாது.
பொதுமக்கள் பயன்படுத்தும் சாலை, நடைபாதைகளில் விளம்பரம் செய்யக் கூடாது. உரிய அனுமதி பெற்றே விளம்பரம் செய்யவேண்டும். இரவு 10 மணிக்குமேல் காலை 6 மணி வரை பிரசாரம் செய்யக் கூடாது உள்ளிட்ட தேர்தல் நடத்தை விதிகள் அமலுக்கு வருகிறது.
கடலூர் மாவட்டத்தில் 2,154 வாக்குச்சாவடி மையங்கள் தயார் நிலையில் உள்ளன.
இதில் 10 சதவீத வாக்குச்சாவடிகள் பதற்றமானவை என அறியப்பட்டுள்ளது.
தேர்தல் பணியில் 15,000 அரசுப் பணியாளர்கள், பாதுகாப்பு பணியில் போலீஸார், துணை ராணுவப்படை, ஓய்வுபெற்ற போலீஸார், ராணுவ வீரர்கள் என மொத்தம் சுமார் 7,000 பேர் ஈடுபடுத்தப்படுவார்கள் என்றார்.
0 கருத்துகள்:
கருத்துரையிடுக