முகநூல் நண்பர்களால் சுத்தம் செய்யப்பட்டு, கடலூர் மஞ்சை நகர் மைதானத்தில் சேகரித்து வைக்கப்பட்ட குப்பை மூட்டைகள், நகராட்சி நிர்வாகத்தின் அலட்சியத்தால், மூன்று நாள்களாக அப்புறப்படுத்தப்படாமல் அதே இடத்திலேயே உள்ளன. கடலூர் மாவட்ட ஆட்சியர் அலுவலகம் எதிரில் சுமார் 30 ஏக்கர் பரப்பளவில் உள்ள மஞ்சை நகர் திறந்தவெளி மைதானம், மது பாட்டில்கள் மற்றும் பிளாஸ்டிக் கழிவுகள் சூழ்ந்து மிக மோசமான நிலையில் இருந்தது.
இந்த மைதானத்தை கடலூர் முகநூல் நண்பர்கள் சுமார் 50 பேர் கடந்த ஞாயிற்றுக்கிழமை சுத்தம் செய்தனர். அப்போது சேகரிக்கப்பட்ட கண்ணாடி துகள்கள் மற்றும் பிளாஸ்டிக் கழிவுகள் சுமார் 50 மூட்டைகளில் கட்டப்பட்டு மைதானத்தில் உள்ள மேடை முன் வைத்துள்ளனர்.
இந்த மூட்டைகளை எடுத்துச்செல்லுமாறு முகநூல் நண்பர்கள் நகராட்சி அதிகாரிகளை ஞாயிற்றுக்கிழமை அணுகியபோது, விடுமுறை நாள் என்பதால் பணிக்கு ஊழியர்கள் வரவில்லை. அதனால் திங்கள்கிழமை எடுத்துச் செல்கிறோம் என ஞாயிற்றுக்கிழமை கூறியுள்ளனர்.
ஆனால், செவ்வாய்க்கிழமை மாலை வரை இந்த குப்பை மூட்டைகள் அங்கிருந்து அப்புறப்படுத்தவில்லை. மூன்று நாள்களாக அதே இடத்தில் கிடப்பதால், நாய்கள், கால்நடைகள் குப்பை மூட்டைகளை சேதப்படுத்தியுள்ளன.
நகரம் சுத்தமாக இருக்க வேண்டும் என்ற நல்ல எண்ணத்தில் முதல் முறையாக முகநூல் நண்பர்கள் இந்தச் சேவையை செய்துள்ளனர். இத்தகைய சேவைகளை ஊக்கப்படுத்த வேண்டிய நகராட்சி நிர்வாகம், அலட்சியப் போக்குடன் நடந்துகொள்வது வருத்தம் அளிக்கிறது என்கின்றனர் தன்னார்வலர்கள்.
0 கருத்துகள்:
கருத்துரையிடுக