ரியாத் : ஐ.நா பாதுகாப்புச் சபை திறனற்றது என்று கூறி, சவூதிக்கு வழங்கப்பட்ட தற்காலிக பாதுகாப்புச் சபை உறுப்பினர் பதவியை ஏற்க மறுத்துள்ளது.
இது குறித்து சவூதி அரேபிய வெளியுறவுத்துறை அமைச்சகம் வெளியிட்டுள்ள அறிக்கையில், "ஐ.நா பாதுகாப்புச் சபை இரட்டை நிலைப்பாட்டை கொண்டிருப்பதால், உலகில் அமைதியை நிலைநாட்டும் தனது கடமையை செய்வதில் இருந்து தவறி விட்டது.
சிரியா விவகாரத்தில், ஐ.நா பாதுகாப்புச் சபை முழுமையாக தோல்வியடைந்து விட்டது. சிரிய அதிபர் பஷார் அல் அஸாத்தின் அரசு, ரசாயன ஆயுதங்களைப் பயன்படுத்தி பொதுமக்களை கொன்ற போது அதனை தடுக்கவோ, பஷார் அரசுக்கு தண்டனை தரவோ ஐ.நா பாதுகாப்புச் சபையால் இயலவில்லை. மேலும், பல்லாண்டுகளாக நடைபெற்று வரும் பாலஸ்தீன் - இஸ்ரேல் மோதல்களை முடிவுக்கு கொண்டு வருவதில் ஐ.நா பாதுகாப்புச் சபை திறனற்று, தோல்வியடைந்துள்ளது. எனவே, இத்தகைய திறனற்ற ஐ.நா பாதுகாப்புச் சபையின் தற்காலிக உறுப்பினர் பதவியை நிராகரிக்கிறோம்" என்று குறிப்பிடப்பட்டுள்ளது.
ஐ.நா பாதுகாப்புச் சபையின் தற்காலிக உறுப்பினராக சவூதி தேர்வாகியுள்ளது என்ற அறிவிப்பு வெளியான சில மணி நேரத்தில் பதவியை நிராகரித்து சவூதி அரேபியா அறிக்கை வெளியிட்டது குறிப்பிடத்தக்கது. சவூதியின் இம்முடிவு மக்களிடையே பெரும் வரவேற்பை பெற்றுள்ளதாகத் தெரிகிறது.
0 கருத்துகள்:
கருத்துரையிடுக