சிதம்பரம் தொகுதி வாக்குச்சாவடிகளில் வாக்காளர் பெயர் சேர்த்தல் குறித்த சிறப்பு முகாம்

சிதம்பரம் தொகுதியில் உள்ள வாக்குச்சாவடிகளில் வாக்காளர் பெயர் சேர்த்தல் சிறப்பு முகாம்  (ஞாயிற்றுக்கிழமை) நடக்கிறது என்று சிதம்பரம் சப்கலெக்டர் அரவிந்த் தெரிவித்துள்ளார்.
 சிதம்பரம் தொகுதியில் வாக்குச்சாவடிகளில் நடக்கும் சுருக்கமுறை திருத்த முகாம்கள் குறித்து சிதம்பரம் சப்–கலெக்டர் அரவிந்த் ஒரு அறிக்கை வெளியிட்டுள்ளார். அதில் கூறியிருப்பதாவது:–

இந்திய தேர்தல் ஆணையம் மற்றும் தமிழ்நாடு தலைமை தேர்தல் அதிகாரி உத்தரவுப்படி வாக்காளர் பட்டியல் சிறப்பு சுருக்கமுறை திருத்தம் கடந்த 1–ந் தேதி முதல் வருகிற 31–ந் தேதி வரை நடைபெறுகிறது. இந்த நாட்களில் சிதம்பரம் தொகுதியில் வாக்காளர் பட்டியலில் புதிதாக பெயர் சேர்த்தல், நீக்கம், திருத்தம் மற்றும் முகவரி மாற்றம் தொடர்பாக வாக்காளர்கள் விண்ணப்பிக்கலாம்.
இதில், பெயர் சேர்த்தலுக்கு படிவம்–6, வெளிநாடு வாழ் இந்தியர்கள் பெயர் சேர்க்க படிவம்–6ஏ, பெயர் நீக்கத்திற்கு படிவம்–7, அனைத்து திருத்தம் செய்ய படிவம்–8, ஒரே தொகுதிக்குள் முகவரி மாற்றம் செய்ய படிவம்–8ஏ பெற்று விண்ணப்பிக்க வேண்டும்.

வாக்காளர்களின் வசதிக்காக  (ஞாயிற்றுக்கிழமை) மற்றும் 27–ந் தேதிகளில் நிர்ணயிக்கப்பட்ட அலுவலர்களை கொண்டு அந்தந்த வாக்குசாவடிகளில் சிறப்பு முகாம் நடைபெறுகிறது. இப்பணிகளை பார்வையிட நாளை சென்னை கருவூலங்கள் மற்றும் கணக்குதுறை ஆணையரும், தேர்தல் பார்வையாளருமான டாக்டர் வீரசண்முகமணி சிதம்பரத்திற்கு வந்து பார்வையிட்டு ஆய்வு செய்கிறார்.
அனைத்து வாக்குசாவடிகளிலும் மின்வசதி, கழிவறை வசதி, குடிநீர் வசதி உள்ளதா? என கண்காணித்து மண்டல அலுவலர்கள் அறிக்கை சமர்பிக்க உத்தரவிடப்பட்டுள்ளது.

சிறப்பு முகாம்களில் நிர்ணயிக்கப்பட்ட அலுவலர்கள் பணியில் இல்லாமல் இருந்தாலும், வாக்காளர்களிடம் அணுகு முறை சரியாக இல்லாவிட்டாலும் பொது மக்கள் புகார் தெரிவிக்கலாம். மேலும், ஒரு வாக்காளர்களின் பெயர்கள் இரண்டு இடங்களில் இருந்தாலும் புகார் தெரிவிக்கலாம்.
 இதுதவிர தேர்தல் சம்மந்தமான அனைத்து புகார்களையும் பொது மக்கள் சிதம்பரம் சார்–ஆட்சியர் அலுவலகம் மற்றும் வட்டாட்சியர் அலுவலகத்தில் நேரில் வந்து பதிவு செய்யலாம். இல்லாவிடில், தொலைபேசி 04144–222256, 04144–22322 என்ற எண்ணில் தொடர்பு கொண்டு புகார் தெரிவிக்கலாம்.
இவ்வாறு அவர் அந்த செய்தி குறிப்பில் கூறப்பட்டுள்ளது.