புதுவை:புதுவை கடலில் வழக்கம் போல நேற்று காலை மீனவர்கள் மீன் பிடித்துக் கொண்டிருந்தனர். அப்போது நல்லவாடு மீனவரின் படகு வம்பாகீரப்பாளையம் மீனவரின் வலையை அறுத்து விட்டதாக கூறப்படுகிறது. இதனால் கடலிலேயே மீனவர்கள் 2 தரப்பினர்களுக்கும் இடையே தகராறு ஏற்பட்டது.இந்த மோதல் குறித்து செல்போன் மூலம் தகவல் பரவியதால், தேங்காய்திட்டு துறைமுகத்தில் வம்பாகீரப்பாளையம் மீனவர்கள் திரண்டனர். இதில் நல்லவாடு எழிலரசன் வீராம்பட்டினம் ஜவஹர், அனிச்சம்பள்ளம் வினோத் ஆகிய மீனவர்கள் தாக்கப்பட்டனர். இதில் படுகாயம் அடைந்த அவர்கள் புதுவை அரசு ஆஸ்பத்திரியில் சிகிச்சைக்கு அனுமதிக்கப்பட்டனர்.
இந்த தகவல் வீராம்பட்டினம், நல்லவாடு பகுதி மீனவ கிராமங்களுக்கு பரவியது. இதனால் அவர்கள் ஆவேசமாக அரிவாள், கத்தி, சுளுக்கி போன்ற ஆயுதங்களுடன் வம்பாகீரப்பாளையத்திற்கு படகுகளில் வந்தனர். இதனால் கடல் பகுதியிலும் துறைமுக பகுதியிலும் மீனவர்கள் பயங்கரமாக மோதிக்கொள்ளும் சூழ்நிலை ஏற்பட்டது.
தகவலறிந்து புதுவை வடக்கு பகுதி சூப்பிரண்டு ராமராஜு தலைமையில் போலீஸ் அதிகாரிகள் சம்பவ இடத்திற்கு விரைந்தனர். மீனவர்களை கலைந்து செல்லும்படி ராமராஜு கேட்டுக்கொண்டார். ஆனால் அவர்கள் தொடர்ந்து ரகளையில் ஈடுபட்டனர்.
மீனவர்களிடையே ஏற்பட்ட கலவரத்தை கட்டுப்படுத்த போலீசார்களும் படகில் ஏறி சென்றனர். அதில் வம்பாகீரப்பாளையம் மீனவர்கள் திரும்பி செல்லும்படி கூறி போலீசார் வந்த படகை மறித்து கடலுக்குள் தள்ளினர். அப்போது படகில் வந்த வீராம்பட்டினம் மீனவர்கள் கரையில் இருந்த வம்பாகீரப்பாளையம் மீனவர்கள் மீது கற்களை வீசினர். இதனால் மேலும் பதற்றம் அதிகரித்தது.
கலவரத்தை கட்டுப்படுத்த போலீசார் கண்ணீர் புகை குண்டுகளை வீசினர். அதிலும் கலவரம் கட்டுக்கு அடங்காததால் போலீசார் வானத்தை நோக்கி 7 ரவுண்டுகள் துப்பாக்கியால் சுட்டனர். இதனால் மீனவர்கள் அங்கிருந்து அலறி அடித்துக்கொண்டு சிதறி ஓடினர். அதன்பின்னரே அங்கு கலவரம் கட்டுக்குள் அடங்கியது.
இந்த சம்பவத்தினால் மீனவ கிராமங்களில் தொடர்ந்து பதற்றம் நிலவுகிறது. இதனால் அங்கு போலீசார் குவிக்கப்பட்டுள்ளனர். இந்த சம்பவம் தொடர்பாக ஒதியஞ்சாலை போலீசார் வழக்கு பதிவு செய்து விசாரணை நடத்தி வருகிறார்கள்.
0 கருத்துகள்:
கருத்துரையிடுக