எகிப்து - அதிபர் முர்ஸியை பதவியிலிருந்து நீக்கியது ராணுவம்

கெய்ரோ:எகிப்தில் நடைபெற்ற ஜனாதிபதி முர்ஸியின் ஆட்சி கலைக்கப்பட்டுள்ளது. புதிய அதிபரை நியமிப்பதற்கு எகிப்து ராணுவம் முயற்சிகள் மேற்கொண்டு வருகிறது.

முஸ்லிம் சகோதரத்துவ அமைப்பின் அரசியல் கட்சியான சுதந்திரம் மற்றும் நீதிக்கட்சி எகிப்தில் ஆட்சி புரிந்து வருகிறது. ஏறத்தாழ இரண்டரை ஆண்டுகளுக்கு முன்பு ஹோஸ்னி முபாரக் ஆட்சிக்கு எதிராக மக்கள் போராட்டம் நடத்தியதைப் போல தற்போது அதிபர் முர்ஸிக்கு எதிராக மிகப் பெரிய அளவிலான போராட்டம் கெய்ரோவில்
நடைபெற்று வருகிறது. முர்ஸிக்கு ஆதரவாகவும் பொதுமக்கள் அதிகளவில் திரண்டு போராட்டம் நடத்தினாலும், ராணுவம் முர்ஸியின் ஆட்சியை விட்டு நீக்குவதற்காக அனைத்து நடவடிக்கைகளையும் எடுத்து வருகிறது. இன்று(03.07.13) இரவு 7 (எகிப்து நேரம்) மணிக்கு முர்ஸியை அதிபர் பதவியிலிருந்து நீக்கி விட்டதாக ராணுவம் தெரிவித்துள்ளது.

முஸ்லிம் சகோதரத்துவ அமைப்பினைச் சார்ந்த தலைவர்கள் கைது செய்யப்பட்டுள்ளதாகவும் தெரிகிறது. அதிபர் முர்ஸி மற்றும் முஸ்லிம் சகோதரத்துவ அமைப்பின் தலைவர் முஹம்மத் பதீ ஆகியோர் நாட்டை விட்டு வெளியேறவும் ராணுவம் தடை விதித்துள்ளது. கெய்ரோவை ராணுவம் தனது கட்டுப்பாட்டுக்குள் கொண்டு வந்துள்ளது.

எதிர்க்கட்சிகளுடன் இணைந்துக் கூட்டணி ஆட்சி அமைக்க முர்ஸி சம்மதம் தெரிவித்துள்ளதாக தகவல்கள் தெரிவிக்கின்றன. இதனைப் பற்றி ராணுவம் கருத்து எதனையும் இதுவரை தெரிவிக்கவி்ல்லை. எதிர்க்கட்சித் தலைவர் முஹம்மத் எல் பராதி, அல் அஸ்ஹர் தலைமை மதகுரு ஷேக் அஹமத் அல் தாயிப் மற்றும் கிறிஸ்தவ மதகுரு தவாட்ரோஸ் II ஆகியோருடன் ராணுவத் தலைமை அதிகாரி அல் ஸிஸ்ஸி எதிர்கால நடவடிக்கைகள் குறி்த்து கலந்துப் பேசியுள்ளார். இந்தக் கூட்டத்தில் ஸலபி அமைப்பினைச் சார்ந்தவர்களும், போராட்டத்தினை நடத்தி வரும் இளைஞர் இயக்கத்தினைச் சார்ந்தவர்களும் கலந்துக் கொண்டுள்ளனர்.

இறுதியாக கிடைத்த தகவலின்படி தலைமை நீதிபதி அட்லி மன்சூர் எகிப்தின் தற்காலிக அதிபராக நியமிக்கப்பட்டுள்ளார்

source:inneram