நெய்வேலி :நெய்வேலி என்.எல்.சி.யின் 5 சதவீத பங்குகளை விற்கும் மத்திய அரசின் முடிவை கண்டித்து காலவரையற்ற போராட்டம் நடத்த போவதாக அனைத்து தொழிற்சங்கத்தினர் அறிவித்தள்ளனர்.இந்த நிலையில் என்.எல்.சி. அனைத்து தொழிற்சங்க கூட்டமைப்பின் ஆலோசனை கூட்டம் அண்ணா தொழிலாளர் ஊழியர் சங்க அலுவலகத்தில் நேற்று காலை நடைபெற்றது. இதற்கு அண்ணா தொழிலாளர் ஊழியர் சங்க செயலாளர் ராம உதயகுமார் தலைமை தாங்கினார். தொ.மு.ச. தலைவர் திருமாவளவன், பொருளாளர் அண்ணாதுரை, அலுவலக செயலாளர் ஸ்ரீதரன் ஆகியோர் முன்னிலை வகித்தார்கள்.
பின்னர் இதுகுறித்து தொ.மு.ச. தலைவர் திருமாவளவன் கூறியதாவது:–
கூட்டத்தில் என்.எல்.சி.யின் பங்கு விற்பனை முடிவை தடுத்து நிறுத்த அனைத்து அரசியல் கட்சிகள் தொழிற்சங்கங்கள் எதிர்ப்பு தெரிவித்த பிறகும், மத்திய அரசு 5 சதவீத பங்குகளை விற்க முடிவு எடுத்துள்ளதை எதிர்க்கிறோம்.
மேலும் இந்த அறிவிப்பை திரும்ப பெற வலியுறுத்தி அனைத்து தொழிற் சங்கங்களையும் ஒன்றிணைத்து பொறியாளர் சங்கம், அதிகாரிகள் சங்கத்தின் நிர்வாகிகளையும் கலந்து பேசி காலவரையற்ற வேலைநிறுத்தம் உள்ளிட்ட போராட்டங்களை நடத்துவது பற்றி ஆலோசிக்க உள்ளோம்.
இதற்காக காலை 10 மணிக்கு தொ.மு.ச. அலுவலகத்தில் ஆலோசனை நடத்தி அடுத்தக்கட்ட போராட்டங்கள் என்னென்ன? என்பது குறித்து அறிவித்து, எங்களது கோரிக்கைகள் வென்றெடுப்போம்‘
இவ்வாறு திருமாவளவன் தெரிவித்தார்.
முன்னதாக கூட்டத்தில் ஏ.ஐ.டி.யூ.சி. தொழிற்சங்க மாவட்ட செயலாளர் சேகர், நாராயணசாமி, கவுதம், பாபு, பாட்டாளி தொழிற்சங்கத்தின் செயலாளர் திலகர்,, சி.ஐ.டி.யூ. குப்புசாமி, ஐ.என்.டி.யூ.சி. ரவிக்குமார், எம்.எல்.எம். முருகபாண்டியன், சந்திரசேகர், டி.டி.யூ.சி. வேலு, ரவிச்சந்திரன், தொழிலாளர் விடுதலை முன்னணி ராமன், பி.எம்.எஸ். ராஜகோபால், முருகன், அண்ணா தொழிற்சங்க பொருளாளர் தேவாநந்தன், உட்பட பலர்கலந்து கொண்டார்கள்.
0 கருத்துகள்:
கருத்துரையிடுக