மும்பை : 2006ல் மலேகானில் நடந்த குண்டுவெடிப்பில் முஸ்லீம்கள் எவரும் ஈடுபடவில்லை என்றும் முழுக்க முழுக்க இந்துத்துவ சக்திகளே இதில் ஈடுபட்டுள்ளனர் என்று தேசிய புலனாய்வு அமைப்பு (NIA) திட்டவட்டமாக கூறியுள்ளது.
2006ல் மலேகானில் நடந்த குண்டுவெடிப்பை நடத்தியதாக 9 முஸ்லீம் இளைஞர்களை மகாராஷ்டிரா தீவிரவாத எதிர்ப்பு படையினர் கைது செய்ததோடு அவர்களின் மீது MCOCA எனப்படும் மகாராஷ்டிரா ஒருங்கிணைந்த குற்றவியல் சட்டத்தின் கீழ் வழக்கு பதிவு செய்தனர். கைது செய்யப்பட்ட ஒன்பது நபர்களில் ஏழு நபர்கள் ஐந்து வருடங்கள் சிறையில் கழித்த பிறகு பிணையில் வெளிவந்துள்ளனர். மீதமுள்ள இருவர் மீது வேறொரு வழக்கு இருப்பதால் சிறையில் உள்ளனர்.
இவ்வழக்கை விசாரித்த இன்னொரு அமைப்பான NIA எனப்படும் தேசிய புலனாய்வு அமைப்பு தன் குற்றப்பத்திரிகையில் இக்குண்டு வெடிப்பு முழுக்க முழுக்க இந்துத்துவ அமைப்புகளே நடத்தியது என்று கூறியுள்ளது. மேலும் ATS எனும் தீவிரவாத எதிர்ப்பு படையினரால் இக்குண்டு வெடிப்பின் சூத்திரதாரி என்று குற்றம் சாட்டப்பட்ட சப்பிர் மசியுல்லாஹ் மலேகான் குண்டு வெடிப்புக்கு முன்னமேயே மும்பை குற்றப் பிரிவு காவல்துறையால் கைது செய்யப்பட்டு சிறையில் இருந்தார் என்று கூறியுள்ளது. மேலும் கைது செய்யப்பட்ட ஜாஹித் மஜீத் இச்சம்பவத்தின் போது அப்பகுதியிலேயே இல்லை என்றும் தேசிய புலனாய்வு அமைப்பு கூறியுள்ளது.
மலேகான் குண்டு வெடிப்பில் பயன்படுத்தப்பட்ட குண்டுகள் இந்தூரில் உள்ள சர்வசம்பன் நகரில் தயாரிக்கப்பட்டவை என்றும் அக்குண்டுகள் மனோகர் நர்வாரியா, ராம்சந்திரா கல்சங்கரா, தன் சிங் மற்றும் ராஜேந்திர சவுத்ரி ஆகியோரால் அரசு பேருந்தில் மாலேகானுக்கு எடுத்து செல்லப்பட்டது என்றும் குற்றப்பத்திரிகையில் கூறப்பட்டுள்ளது. மேலும் நாடெங்கிலும் உள்ள முஸ்லீம் வழிபாட்டு தளங்களில் தாக்குதல் நடத்த ஆயுத பயிற்சியும் குண்டுகள் தயாரிக்கவும் உதவியதாகவும் மேற்கண்ட நால்வர் மீதும் குற்றம் சாட்டப்பட்டுள்ளது. ஆனால் இவர்கள் மேல் MCOCA சட்டம் பிரயோகப்படுத்தப்படவில்லை என்பது குறிப்பிடத்தக்கது.
மேலும் மாலேகனில் குண்டு வெடிப்பு நிகழ்த்த நர்வாரியா மற்றும் சவுத்ரி ஆகியோர் மிதிவண்டிகள் வாங்கி அம்மிதிவண்டிகளில் குண்டுகளை பொருத்தி பேருந்து நிலையத்தில் வைத்ததாக குற்றம் சாட்டியுள்ள தேசிய புலனாய்வு அமைப்பு மேற்கண்ட நால்வரும் முஸ்லீம் மையவாடியிலும் முஷவரத் சூக்கிலும் குண்டுகள் வைத்த பின்னர் பேருந்து பிடித்து ஜலகான் வழியாக இந்தூர் சென்றதாகவும் கூறியுள்ளது.
thanx:inneram.com
0 கருத்துகள்:
கருத்துரையிடுக