பொறையார் அருகே பரிதாபம்:கார் மீது டேங்கர் லாரி மோதல் நாகூரை சார்ந்த மூவர் பலி;

மயிலாடுதுறை:பொறையார் அருகே, கார் மீது டேங்கர் லாரி மோதிய விபத்தில் மூன்று பேர் பரிதாபமாக உயிரிழந்தனர்; ஒருவர் படுகாயமடைந்தார்.
நாகை மாவட்டம், நாகூர் தைக்கால் தெருவை சேர்ந்தவர் செய்யது அகமது, 52. இவரது மனைவி ஜுலைகா நாச்சியா,45.
இருவரும் நேற்று காரில் சென்னை சென்று, வெளிநாட்டிலிருந்து வந்த செய்யது அகமதுவின் தங்கை ஜீனத், 42 என்பவரை அழைத்துக் கொண்டு, ஊர் திரும்பிக் கொண்டிருந்தனர். காரை, நாகூர் சமரச நகர் யூசுப், 28 என்பவர் ஓட்டினார்.
மாலை 6:45 மணிக்கு, பொறையார் அடுத்த நண்டலாறு சோதனைச்சாவடி அருகே வந்தபோது, காரைக்காலில் இருந்து வந்த டேங்கர் லாரி, கார் மீது மோதியது.
இதில் கார் முழுவதும் நசுங்கியது, படுகாயமடைந்த கார் டிரைவர் யூசுப், ஜுலைகா நாச்சியா, ஜீனத் ஆகிய மூவரும் சம்பவ இடத்திலேயே உயிரிழந்தனர்.
பொறையார் தீயணைப்பு வீரர்கள், காரின் இடிபாடுகளில் சிக்கியிருந்த செய்யதுஅகமதுவை மீட்டு, பொறையார் அரசு மருத்துவமனைக்கு அனுப்பினர். பின், மேல் சிகிச்சைக்கு நாகை அரசு மருத்துவமனையில் சேர்க்கப்பட்டார்.
பொறையார் போலீசார், விபத்தில் இறந்தவர்களின் உடலைக் கைப்பற்றி பிரேத பரிசோதனைக்காக பொறையார் அரசு மருத்துவமனைக்கு அனுப்பினர். போலீசார் வழக்கு பதிந்து, லாரி டிரைவரை தேடி வருகின்றனர்.