கடலூரில் இன்று முதல் மணல் லாரி உரிமையாளர்கள் காலவரையற்ற வேலை நிறுத்தம்

கடலூர்:தமிழகத்தில் இருந்து பிற மாநிலங்களுக்கு மணல் ஏற்றி செல்லும் லாரிகளை பறிமுதல் செய்ய தமிழக அரசு ஆணை பிறப்பித்துள்ளது. அதன்படி கடந்த வெள்ளிக்கிழமை முதல் கடலூர் மாவட்டத்தில் இருந்து புதுவை வழியாக மணல் ஏற்றி சென்ற லாரிகளை போலீசார் பறிமுதல் செய்து வருகின்றனர்.

மேலும் லாரி டிரைவர்களையும் கைது செய்து வருகிறார்கள். இதற்கிடையே கடலூர் தாலுகா லாரி உரிமையாளர்கள் கடலூர் மாவட்ட போலீஸ் சூப்பிரண்டு பகலவனை சந்தித்து பறிமுதல் செய்யப்பட்ட லாரிகளையும், லாரி டிரைவர்களையும் விடுவிக்க வேண்டும் என்றும், புதுவை வழியாக மரக்காணம் மற்றும் சென்னைக்கு லாரிகளில் மணல் ஏற்றி செல்ல அனுமதிக்க வேண்டும் என்று கோரிக்கை விடுத்தனர். ஆனால் இந்த கோரிக்கை ஏற்கபட வில்லை.

இதையடுத்து மணல் லாரி உரிமையாளர்கள் காலவரையற்ற வேலை நிறுத்தத்தில் ஈடுபட போவதாக அறிவித்து இருந்தனர். அதன்படி கடலூர் தாலுகா லாரி உரிமையாளர்கள் இன்று (திங்கட்கிழமை) காலவரையற்ற வேலை நிறுத்தத்தை தொடங்கினர். அவர்கள் இன்று காலை கடலூர் கலெக்டர் அலுவலகம் முன்பு ஆர்ப்பாட்டத்தில் ஈடுபட்டனர்.

ஆர்ப்பாட்டத்துக்கு சங்க தலைவர் பிரகாஷ் தலைமை தாங்கினார். செயலாளர் உத்திரகுமரன், பொருளாளர் கோபிநாதன், துணை தலைவர்கள் சங்கர், விஜயகுமார் உள்பட லாரி உரிமையாளர்கள் ஏராளமானோர் ஆர்ப்பாட்டத்தில் பங்கேற்றனர்.

மணல் லாரி உரிமையாளர்கள் வேலை நிறுத்தம் கட்டுமான பணிகள் பாதிக்கப்பட்டுள்ளது. வேலை நிறுத்தம் தொடரும் பட்சத்தில் கடலூர் மற்றும் அதனை சுற்றி உள்ள பகுதிகளில் கட்டுமான பணிகள் பெரிதளவில் பாதிப்பு ஏற்படும் நிலை உருவாகும்.