பெங்களூர்: நியூசிலாந்திற்கு எதிரான 2வது டெஸ்ட் போட்டியில் இந்திய கேப்டன் டோணி, விராத் கோஹ்லி ஜோடியின் அதிரடி ஆட்டத்தில் இந்தியா 5 விக்கெட்கள் வித்தியாசத்தில் அபார வெற்றி பெற்றது. முதல் டெஸ்ட் போட்டியில் ஏற்கனவே வெற்றி பெற்ற நிலையில், இன்று 2வது போட்டியிலும் வெற்றி பெற்று 2-0 என்ற கணக்கில் டெஸ்ட் தொடரை இந்தியா கைப்பற்றியுள்ளது.இந்தியாவிற்கு சுற்றுப்பயணம் வந்துள்ள நியூசிலாந்து அணி 2 போட்டிகள் கொண்ட டெஸ்ட் மற்றும் டுவென்டி20 தொடர்களில் பங்கேற்று வருகிறது. இதில் இரு அணிகளுக்கும் இடையிலான முதல் டெஸ்ட் போட்டி ஹைதராபாத்தில் நடைபெற்றது. இதில் இந்தியா அபார வெற்றி பெற்றது. இந்த நிலையில் இரு அணிகளுக்கும் இடையிலான 2வது டெஸ்ட் போட்டி கடந்த 31ம் தேதி பெங்களூரில் துவங்கியது.
போட்டியின் டாஸ் வென்று முதல் இன்னிங்ஸை ஆடிய நியூசிலாந்து அணி அனைத்து விக்கெட்களையும் இழந்து 365 ரன்களை குவித்தது. அதன்பிறகு முதல் இன்னிங்ஸை ஆடிய இந்திய அணி சிறப்பாக ஆடியது. விராத் கோஹ்லி சதமடிக்க, சுரேஷ் ரெய்னா, டோணி ஆகியோர் அரைசதம் அடிக்க, அனைத்து விக்கெட்களையும் இழந்து இந்தியா 353 ரன்களை எடுத்தது. நியூசிலாந்து வீரர் டிம் செளத்தீ சிறப்பாக பந்துவீசி 7 விக்கெட்களை வீழ்த்தினார்.
அதன்பிறகு 2வது இன்னிங்ஸை ஆடிய நியூசிலாந்து அணி துவக்கம் முதலே வரிசையாக விக்கெட்களை இழந்தது. ஒரு வீரர் கூட அரைசதம் அடிக்காத நிலையில் நேற்று போட்டியின் 3வது நாள் ஆட்டநேர இறுதியில் நியூசிலாந்து 9 விக்கெட்களை இழந்து 232 ரன்களை எடுத்திருந்தது.
போட்டியின் 4வது நாளான இன்று காலையில் களமிறங்கிய நியூசிலாந்து அணியின் கடைசி விக்கெட்டான ஜீவன் பட்டோலும் அவுட்டாக 2வது இன்னிங்ஸ் முடிவுக்கு வந்தது. நியூசிலாந்து அணியின் 2வது இன்னிங்ஸில் அனைத்து விக்கெட்களையும் இழந்து 248 ரன்கள் எடுத்தது. இதனுடன் முதல் இன்னிங்ஸில் பெற்ற 12 ரன்களையும் சேர்த்து, 2வது டெஸ்ட் போட்டியில் இந்திய அணி வெற்றி பெற 261 ரன்கள் தேவை என்று நிர்ணயிக்கப்பட்டுள்ளது.
261 ரன்களை எடுத்தால் வெற்றி பெறலாம் என்று களமிறங்கிய இந்திய அணிக்கு, துவக்க வீரர்கள் ஷேவாக், கம்பிர் ஜோடி அதிரடி துவக்கத்தை அளித்தது. முதல் விக்கெட்டுக்கு 77 ரன்கள் சேர்க்கப்பட்டது. ஷேவாக் 33 பந்துகளில் 1 சிக்ஸ், 7 பவுண்டரிகள் அடித்து 38 ரன்கள் எடுத்த நிலையில் ஜித்தன் பட்டேல் பந்தில் போல்டானார். சற்றுநேரம் நிலைத்து நின்ற கம்பிர் 34 ரன்களை எடுத்து, ரோஸ் டெய்லரிடம் கேட்சாகி வெளியேறினார்.
இளம்வீரர் புஜாரா வழக்கம் போல பொறுமையாக ஆடினார். ஆனால் 48 ரன்கள் எடுத்த போது, டெனியல் பிளைனிடம் கேட்ச் கொடுத்து அவுட்டானார். சச்சின் வழக்கத்திற்கு மாறாக இன்று அதிரடியாக ஆடினார். ஆனால் 27 ரன்களில் அவரும் போல்டானார். அதிகம் எதிர்பார்க்கப்பட்ட சுரேஷ் ரெய்னா டக் அவுட்டாகி ஏமாற்றினார்.
அதன்பிறகு கேப்டன் டோணியும், விராத் கோஹ்லியும் ஜோடி சேர்ந்து ஆடினர். அவ்வப்போது அதிரடி கட்டிய இந்த ஜோடியின் மூலம் இந்திய அணியின் ஸ்கோர் வேகமாக உயர்ந்தது. 9 பவுண்டரிகளை அடித்த விராத் கோஹ்லி அரைசதம் கடந்தார். அவருக்கு ஒத்துழைப்பு கொடுத்து ஆடிய கேப்டன் டோணி வெற்றிக்கு 6 ரன்கள் தேவைப்பட்ட நிலையில் சிக்ஸ் அடித்து அணியின் வெற்றியை உறுதி செய்தார்.
இதன்மூலம் இந்திய அணி 5 விக்கெட்கள் வித்தியாசத்தில் அபார வெற்றிப் பெற்றது. விராத் கோஹ்லி 51 ரன்களுடன், டோணி 48 ரன்களுடன் கடைசி வரை அவுட்டாகாமல் இருந்தனர். நியூசிலாந்திற்கு எதிரான 2 டெஸ்ட் போட்டிகளையும் வென்ற இந்திய அணி தொடரை 2-0 என்ற கணக்கில் கைப்பற்றியது.
போட்டியில் ஒரு சதம், ஒரு அரைசதம் அடித்த விராத் கோஹ்லிக்கு ஆட்டநாயகன் விருது வழங்கப்பட்டது. அதேபோல டெஸ்ட் தொடரில் மொத்தம் 18 விக்கெட்களை வீழ்த்திய இந்திய வீரர் அஸ்வின், தொடர் நாயகனாக தேர்வு செய்யப்பட்டார்.
0 கருத்துகள்:
கருத்துரையிடுக