பக்கிங்காம் கால்வாயில் ஆக்கிரமிப்புகள் அதிகரிப்பு

பரங்கிப்பேட்டை முதல் சென்னை வரை படகு போக்குவரத்து இயக்கப்பட்ட பக்கிங்காம் கால்வாயில் பராமரிப்பு இல்லாததால் ஆக்கிரமிப்புகள் அதிகரித்து வருகிறது. மழை, வெள்ள காலங்களில் தண்ணீர் வடிய வழியில்லாத நிலை உருவாகி வருகிறது.மக்களின் பசிப்பிணியை போக்க வெட்டப்பட்ட பக்கிங்காம் கால்வாய் வரலாற்று சிறப்பு வாய்ந்தது. தரைவழி போக்குவரத்து சீர்படாத நிலையில் நீர்வழி போக்குவரத்து முதன்மையானதாக கருதப்பட்ட காலத்தில் பரங்கிப்பேட்டையில் இருந்து சென்னைக்கு பக்கிங்காம் கால்வாய் மூலம் வாணிபம் நடந்துள்ளது. வாணிப நோக்கில் அடியெடுத்து வைத்த ஆங்கிலேயர்கள், பிரஞ்சுக்காரர்கள், டச்சுக்காரர்கள் இந்த கால்வாய் வழியாக பரங்கிப்பேட்டையில் இருந்து சென்னை வரை வாணிபம் செய்தனர். ஆங்கிலேயர்கள் பரங்கிப்பேட்டையை துறைமுகமாக பயன்படுத்தியதால் போர்டோநோவா (புதிய துறைமுகம்) என்ற பெயரை பரங்கிப்பேட்டை பெற்றது என்கின்றனர்.இப்படி சிறப்பு வாய்ந்த பக்கிங்காம் கால்வாயில் காலப்போக்கில் பரங்கிப்பேட்டையில் இருந்து பெரியப்பட்டு வரை ஆக்கிரமிப்புகள் அதிகரித்து வருகிறது.

விவசாய நிலமாகவும் மற்றும் சவுக்கை பயிர் செய்யும் இடமாக மாறியதால் மழை, வெள்ள காலங்களில் தண்ணீர் வடிய வழியில்லாமலும், பாசன வசதி இல்லாமலும் விவசாயிகள் பாதிக்கப்பட்டு வருகின்றனர்.தற்போது பக்கிங்காம் கால்வாய் பக்கத்திலேயே தனியார் அனல்மின் நிலையம் அமைய இருப்பதால் அதற்காக கரிக்குப்பம் கிராமம் அருகே கட்டட பணிக்காக பக்கிங்காம் கால்வாயை தூர்த்து சாலை அமைத்து லாரி மூலம் செம்மண் எடுத்துச் செல்லப்படுகிறது. இதுபோல பெரும்பாலானவர்கள் ஆக்கிரமிப்பு செய்து வருவது நாளுக்குநாள் தொடர்ந்து வருகிறது. கடந்த மூன்று ஆண்டுகள் ஏற்பட்ட வெள்ளத்தின்போது பரங்கிப்பேட்டை, கரிக்குப்பம், புதுச்சத்திரம், பெரியப்பட்டு உட்பட 20க்கும் மேற்பட்ட கிராமங்களில் தண்ணீர் வடியாததால் விவசாய நெற்பயிர்கள் அழுகி சேதமடைந்தன.விவசாயிகளின் கோரிக்கையின்பேரில் சட்டமன்ற தொகுதி மேம்பாட்டு நிதியில் இருந்து பெரியப்பட்டில் இருந்து கரிக்குப்பம் வரை பக்கிங்காம் கால்வாய் ஆழப்படுத்தப்பட்டது. கரிக்குப்பத்தில் இருந்து பரங்கிப்பேட்டை பெரியமதகு வரை ஆழப்படுத்தப்படாமல் உள்ளது.தற்போது ஆக்கிரமிப்புகள் அதிகரித்து வருவதால் மழை, வெள்ள காலங்களில் இந்த பகுதி தண்ணீர் வடிய வழியில்லாமல் கடுமையாக பாதிக்கப் படும்.எனவே பொதுமக்கள் ஒத்துழைப்போடு பக்கிங்காம் கால்வாய் ஆக்கிரமிப்புகளை அகற்றி முறையாக ஆழப்படுத்த வேண்டும் என்றும், பக்கிங்காம் கால்வாயில் பாசன வசதிக் காக நான்கு இடங்களில் தடுப்பு அணைகள் கட்டிக் கொடுக்க வேண்டும் என விவசாயிகள் கோரிக்கை வைத்துள்ளனர்.