நெய்வேலி என்.எல்.சி. ஒப்பந்த தொழிலாளர்கள் கடந்த ஏப்ரல் 21-ந்தேதி முதல் வேலை
நிறுத்தத்தில் ஈடுபட்டனர். மறியல், உண்ணாவிரதம் உள்பட பல்வேறு போராட்டங்கள்
நடைபெற்றன. பிரச்சினைக்கு தீர்வு காண 12 கட்டமாக பேச்சுவார்த்தை நடந்தும் சுமூக
முடிவு ஏற்படவில்லை.
அதையடுத்து 13-வது கட்ட பேச்சுவார்த்தை நேற்று முன்தினம் சென்னையில்
நடைபெற்றது. மத்திய தொழிலாளர் நல ஆணையாளர் பிரசாத் முன்னிலை வகித்தார். என்.எல்.சி.
நிர்வாக தரப்பில் மனித வளத்துறை இயக்குனர் ஆச்சார்யா, சுரங்கத்துறை இயக்குனர்
சுரேந்தர் மோகன், ஒப்பந்த தொழிலாளர்கள் தரப்பில் ஏ.ஐ.டி.யூ.சி. சங்க அகில இந்திய
துணை பொது செயலாளர் மகாதேவன், மாவட்ட செயலாளர் சேகர், ஜீவா ஒப்பந்த தொழிலாளர்கள்
சங்க தலைவர் உக்கிரவேல், சிறப்பு தலைவர் குப்புசாமி, பொது செயலாளர் வெங்கடேசன்
உள்பட பலர் கலந்து கொண்டனர்.
நேற்று நள்ளிரவு வரை நடந்த இந்த பேச்சுவார்த்தையில் உடன்பாடு ஏற்பட்டது.
இதுகுறித்து ஜீவா ஒப்பந்த தொழிலாளர்கள் சங்க பொது செயலாளர் வெங்கடேசன்
கூறியதாவது:-
என்.எல்.சி. ஒப்பந்த தொழிலாளர்கள் பிரச்சினை குறித்த பேச்சுவார்த்தையில் சுமூக
முடிவு ஏற்பட்டு ஒப்பந்தம் கையெழுத்தானது. பேச்சுவார்த்தையின் போது சீனியாரிட்டி
அடிப்படையில் ஒப்பந்த தொழிலாளர்களை படிப்படியாக நிரந்தரம் செய்ய
ஒப்புக்கொள்ளப்பட்டது. நிரந்தர தொழிலாளர்கள் ஓய்வு பெறும் நேரத்தில் காலியிடங்களில்
ஒப்பந்த தொழிலாளர்களை கொண்டு நிரப்புவது என்றும் என்.எல்.சி. விரிவாக்க பணிகளில்
புதிய ஆட்களை நியமனம் செய்யும்போது ஒப்பந்த தொழிலாளர்களுக்கு முன்னுரிமை வழங்குவது
என்றும் முடிவானது.
எனவே ஸ்டிரைக் வாபஸ் பெறப்பட்டு இன்று (4-ந்தேதி) முதல் ஒப்பந்த தொழிலாளர்கள்
வேலைக்கு திரும்புகின்றனர்.
இவ்வாறு அவர் கூறினார்.
ஸ்டிரைக் வாபஸ் பெறப்பட்டதை தொடர்ந்து என்.எல்.சி. ஒப்பந்த தொழிலாளர்கள் இன்று
காலை 6 மணி அளவில் மகிழ்ச்சியுடன் வேலைக்கு சென்றனர்.
0 கருத்துகள்:
கருத்துரையிடுக