கடலூர் முதுநகர் அருகே தொழிலாளி வெட்டிக்கொலை மர்ம கும்பலுக்கு போலீஸ் வலைவீச்சு

கடலூர் முதுநகர்:கடலூர் முதுநகர்  அருகே தொழிலாளியை சரமாரியாக வெட்டிக்கொலை செய்த மர்ம கும்பலை போலீசார் தேடி வருகின்றனர்.

இது பற்றி போலீஸ் தரப்பில் கூறப்பட்டதாவது:கடலூர் முதுநகர் அருகே சின்னபிள்ளையார்மேட்டை சேர்ந்தவர் ஞானசுந்தரம். இவருடைய மகன் தென்னரசு என்கிற சின்னராசு (வயது 28). சிப்காட் தனியார் தொழிற்சாலை ஒன்றில் ஒப்பந்த தொழிலாளியான அவர் நேற்று முன்தினம் பணியை முடித்து விட்டு இரவு 10 மணி அளவில் வீட்டுக்கு நடந்து வந்தார்.

ஈச்சங்காடு அருகே வந்த போது, 2 மோட்டார் சைக்கிள்களில் வந்த 4 பேர் அவரை வழிமறித்து சரமாரியாக அரிவாளால் வெட்டினர். இதில் சின்னராசுக்கு தலை, கழுத்து உள்பட 20-க்கும் மேற்பட்ட இடங்களில் வெட்டுக்காயங்கள் ஏற்பட்டது. இதனால் ரத்த வெள்ளத்தில் கீழே விழுந்த அவர் அலறி துடித்தார். இதை பார்த்ததும் சக ஊழியர்கள் ஓடி வந்தனர். அதற்குள் அந்த கொலை கும்பல் மோட்டார் சைக்கிளில் தப்பிச்சென்று விட்டது.


 இதையடுத்து பலத்த காயங்களுடன் உயிருக்கு ஆபத்தான நிலையில் கிடந்த சின்னராசுவை சக ஊழியர்கள் மீட்டு சிகிச்சைக்காக கடலூர் அரசு மருத்துவமனையில் அனுமதித்தனர். பின்னர் மேல் சிகிச்சைக்காக புதுச்சேரி ஜிப்மர் மருத்துவமனையில் அனுமதிக்கப்பட்ட அவருக்கு தீவிர சிகிச்சை அளித்தும் பலனின்றி சின்னராசு நேற்று காலை பரிதாபமாக உயிரிழந்தார்.

இது பற்றி சின்னராசுவின் தம்பி வெங்கடேசபெருமாள் அளித்த புகாரின் பேரில் கடலூர் துணை போலீஸ் சூப்பிரண்டு ராமமூர்த்தி மேற்பார்வையில் கடலூர் முதுநகர் போலீஸ் இன்ஸ்பெக்டர் குருமூர்த்தி மற்றும் போலீசார் வழக்குப்பதிவு செய்து விசாரணை நடத்தினர். அதில் கொலையுண்ட சின்னராசுவின் அண்ணன் உதயசூரியன் கடந்த 2011-ம் ஆண்டு ஜூலை மாதம் அவரது நண்பர்களுடன் ஏற்பட்ட தகராறில் வெட்டிக்கொலை செய்யப்பட்டார். இந்த கொலை வழக்கில் தொடர்புடைய குற்றவாளிகளுக்கு தண்டனை பெற்று தர வேண்டும் என்பதில் சின்னராசு தீவிரமாக இருந்தார். இந்த வழக்கு விசாரணை அடுத்த வாரம் முடிவடைந்து தீர்ப்பு விரைவில் வெளிவருவதாக இருந்தது.



 இதை அறிந்த ஒரு கும்பல் அவரை பல வகையில் அச்சுறுத்தி வந்தனர். இதனால் அந்த கும்பல் அவரை கொலை செய்திருக்கலாமா? அல்லது வேறு ஏதாவது முன்விரோதம் காரணமாக அவர் கொலை செய்யப்பட்டாரா? என்ற கோணத்திலும் போலீசார் விசாரணை நடத்தி வருகின்றனர்.

 மேலும் இந்த வழக்கில் கொலை குற்றவாளிகளை பிடிப்பதற்காக போலீஸ் இன்ஸ்பெக்டர்கள் குருமூர்த்தி, சரவணன், பிரதீப்குமார் ஆகியோர் தலைமையில் 3 தனிப்படைகள் அமைக்கப்பட்டுள்ளது. அந்த தனிப்படையினர் குற்றவாளிகளை தீவிரமாக தேடி வருகின்றனர்.