ரேஷன் கார்டு உள்தாள் வழங்கும் பணி 15ம் தேதி துவக்கம் !

கடலூர்: மாவட்டத்தில் உள்ள ரேஷன் கார்டுகளின் ஆயுள் காலத்தை நீட்டிப்பதற்கான உள்தாள் வழங்கும் பணி வரும் 15ம் தேதி முதல் துவங்கப்பட உள்ளது.

பொது வினியோகத் திட்டத்தின் கீழ் வழங்கப்பட்டுள்ள ரேஷன் கார்டின் ஆயுட்காலம் கடந்த 2009ம் தேதியுடன் முடிவடைந்தது. அதன் பிறகு புதிய ரேஷன் கார்டு வழங்காமல் இரண்டு, இரண்டு ஆண்டாக உள் தாளை இணைத்து ஆயுள் காலத்தை நீட்டித்து வருகிறது. அதன்படி வரும் டிசம்பர் 31ம் தேதியுடன் முடிவடையும் ரேஷன் கார்டின் ஆயுள் காலத்தை மேலும் ஓராண்டிற்கு நீட்டித்து அரசு உத்தரவிட்டுள்ளது.
இதற்காக ரேஷன் கார்டுகளில் இணைப்பதற்கான உள்தாள்காள் அச்சடிக்கும் பணி சென்னை, விருத்தாசலம், புதுக்கோட்டை, சேலம் மற்றும் மதுரையில் உள்ள அரசு அச்சகங்களில் அச்சடிக்கப்பட்டு வருகிறது. இந்நிலையில் உணவுப் பொருள் வழங்கல் மற்றும் நுகர்வோர் பாதுகாப்புத் துறை ஆணையம் கோபாலகிருஷ்ணன், அனைத்து மாவட்ட கலெக்டர்களுக்கு அனுப்பியுள்ள சுற்றறிக்கையில், ரேஷன் கார்டுகளின் ஆயுள் காலத்தை ஓராண்டு நீட்டிப்பதற்காக உள் தாள்கள் அரசு அச்சகங்களில் அச்சடிக்கும் பணி தற்போது நடைபெற்று வருகிறது.
எனவே, நவம்பர் 30ம் தேதி (நேற்று) நடைமுறையில் உள்ள ரேஷன் கார்டுகளின் எண்ணிக்கைக்கு ஏற்ப உள்தாள்களை, அரசு அச்சகங்களில் பெற்றுக் கொள்ளவும், அதனை வரும் 12ம் தேதி முதல் ரேஷன் கார்டுதாரர்களுக்கு வழங்கிட உரிய நடவடிக்கை மேற்கொள்ள அறிவுறுத்தியுள்ளார்.அதன்படி கடலூர் மாவட்டத்தில் 1,124 முழுநேரம் மற்றும் 267 பகுதி நேர ரேஷன் கடைகளில் உள்ள 5.88 லட்சம் ரேஷன் கார்டுகளுக்கு வழங்குவதற்கான உள்தாள்கள் விருத்தாசலம் அச்சகத்திலிருந்து நேற்று கொண்டு வரப்பட்டுள்ளது.
அதேப்போன்று அனைத்து ரேஷன் கார்டுகளுக்கும் வழங்கல் பதிவேடு கூட்டுறவுத் துறை சார்பில் அச்சடித்து வழங்க நடவடிக்கை எடுக்கப்பட்டு வருகிறது. அதனைத் தொடர்ந்து வரும் 15ம் தேதி முதல் உள்தாள்கள் வழங்கப்பட உள்ளது.இதுதொடர்பாக ரேஷன் கடை விற்பனையாளர்களுக்கான ஆலோசனைக் கூட்டம் நடைபெற்றது. அதில், வரும் 15ம் தேதி முதல் உள்தாள் வழங்கும் பணியை துவங்க வேண்டும். கூட்ட நெரிசலைத் தவிர்த்திட திங்கள் முதல் வெள்ளிக்கிழமை வரை தினமும் 100 கார்டுகளுக்கு உள்தாள் வழங்க வேண்டும். இந்த ஐந்து நாட்களில் விடுபட்டவர்களுக்கு சனிக்கிழமை அன்று வழங்க வேண்டும். உள்தாள் வழங்கும் பணியை வரும் 25ம் தேதிக்குள் முடித்திட அறிவுறுத்தப்பட்டுள்ளது. அதன்படி மாவட்டத்தில் வரும் 15ம் தேதி முதல் ரேஷன் கார்டுகளுக்கு உள்தாள் வழங்கும் பணி துவங்கிட அனைத்து ஏற்பாடுகளும் செய்யப்பட்டுள்ளது.