கடலூர் : அமைச்சர் சம்பத் கொடுத்த வாக்குறுதிப்படி ரயில்வே சுரங்கப்பாதை பணி
துவங்கப்படாததை கண்டித்து பொதுநல இயக்கத்தினர், போலீஸ் தடையை மீறி உண்ணாவிரத
போராட்டத்தில் ஈடுபட்டதால் பரபரப்பு நிலவியது. கடலூர், லாரன்ஸ் ரோட்டில் ரயில்வே
கேட் மூடுவதால் ஏற்படும் போக்குவரத்து நெரிசலைத் தவிர்க்க, இலகு ரக வாகனங்கள்
சென்று வரும் வகையில் சுரங்கப்பாதை அமைக்க கடந்த தி மு க ஆட்சியில் 2009ம் ஆண்டு தமிழக அரசு 6 கோடி
ரூபாய் நிதி ஒதுக்கி, டெண்டர் விடப்பட்டது. சுரங்கப்பாதைப் பணிக்கு தடை கோரி
வர்த்தக சங்கத்தினர் சென்னை கோர்ட்டில் தொடர்ந்த வழக்கு கடந்த 2012ல் தள்ளுபடி
செய்யப்பட்டதை தொடர்ந்து, சுரங்கப்பாதை பணிகள் துவங்கியதுரயில்வே நிர்வாகம் தனது பணியை முடித்ததைத் தொடர்ந்து, ரயில்வே கேட்டிற்கு கிழக்கு பகுதியில் இணைப்புச் சாலைப் பணியை நெடுஞ்சாலைத் துறையினர் மேற்கொண்டனர்.
இப்பணி முடிந்து, ரயில்வே கேட்டிற்கு மேற்கு பகுதியில் இணைப்புச் சாலைப் பணியை கடந்த மாதம் துவங்க முயன்றபோது, சில தனி நபர்கள் பணியை தடுத்து நிறுத்தினர்.
இதனைக் கண்டித்தும், சுரங்கப்பாதை பணியை விரைந்து முடிக்க வலியுறுத்தி அனைத்து பொது நல இயக்கங்களின் கூட்டமைப்பு சார்பில் கடந்த 26ம் தேதி காலவரையற்ற உண்ணாவிரத போராட்டம் மேற்கொள்ளப் போவதாக அறிவிக்கப்பட்டது.
அவர்களிடம், அமைச்சர் சம்பத், கலெக்டர் கிர்லோஷ்குமார், ஆர்.டி.ஓ., ஷர்மிளா ஆகியோர் பேச்சுவார்த்தை நடத்தினர். அதில், மார்ச் 5ம் தேதிக்குள் பணி துவங்கப்படும் என உறுதியளித்தனர். அதனையேற்று, போராட்டம் தற்காலிகமாக ஒத்தி வைப்பதாக அறிவிக்கப்பட்டது. ஆனால், அமைச்சர் சம்பத் மற்றும் அதிகாரிகள் அளித்த வாக்குறுதியின்படி நேற்று வரை சுரங்கப்பாதை பணி துவங்கவில்லை. அதனைக் கண்டித்து அனைத்து பொது நல இயக்கத்தினர் நேற்று போலீஸ் அனுமதியின்றி, கலெக்டர் அலுவலகம் முன் காலவரையற்ற உண்ணாவிரதப் போராட்டத்தில் ஈடுபட்டனர். அவர்களிடம் தாசில்தார் செழியன் உள்ளிட்ட அதிகாரிகள் நீண்ட நேரம் பேச்சுவார்த்தை நடத்தினர். பின்னர், போராட்டக்குழுவை சேர்ந்த நிர்வாகிகளை அழைத்து ஆர்.டி.ஓ., ஷர்மிளா பேச்சுவார்த்தை நடத்தினார். அப்போது, வரும் 12ம் தேதிக்குள், போலீஸ் பாதுகாப்புடன் சுரங்கப்பாதை பணி துவங்கப்படும் என எழுதிக் கொடுத்தார்.
அதனையேற்று போராட்டக்குழுவினர் பகல் 1:00 மணிக்கு உண்ணாவிரத போராட்டத்தை தற்காலிகமாக கைவிட்டனர்.
0 கருத்துகள்:
கருத்துரையிடுக