டெல்லி :நாட்டின் கையிருப்பில் இருந்த வெங்காயத்தின் 90% அளவிற்கு ஏற்கனவே காலியாகிவிட்டதால் வரும் வாரங்களில் வெங்காயம் விலை உயரும் அபாயம் உள்ளது.அரசின் கையிருப்பில் தற்போது சுமார் 4 லட்சம் டன் வெங்காயம் மட்டுமே உள்ளதாக கூறப்படுகிறது. இது சுமார் 10 நாள் விநியோகத்திற்கு மட்டுமே போதுமானதாகும். இந்நிலையில் வெங்காயம் விலை கிலோ ஒன்றுக்கு ரூ.90 முதல் ரூ.100 வரை விற்கப்படுகிறது. இதனால் மக்கள் பெரிதும் பாதிக்கப்பட்டுள்ளனர்.
வெங்காய விலையை கட்டுப்படுத்த நடவடிக்கை எடுக்க அவர்கள் வலியுறுத்தியுள்ளனர். இதனிடையே வெங்காய விலையை குறைக்க மத்திய அரசு பல்வேறு நடவடிக்கைகளை எடுத்து வருகிறது. பதுக்கல் காரர்கள் மற்றும் தரகர்கள் ஏராளமான வெங்காயத்தை பதுக்கி வைத்திருப்பதால் செயற்கை பற்றாக்குறை காணப்படுவதாக மத்திய அரசு கூறியுள்ளது.
பதுக்கல்காரர்கள் மீது நடவடிக்கை எடுக்குமாறு மாநில அரசுகளுக்கு மத்திய அரசு உத்தரவிட்டுள்ளது. வெங்காய விலையை கட்டுபடுத்த குறைந்தபட்ச ஏற்றுமதி விலையை அதிகரிக்குமாறு கூட்டுறவு ஏற்றுமதி நிறுவனம் யோசனை தெரிவித்துள்ளது
இதனிடையே பா.ஜ.க. ஆளும் மத்தியப் பிரதேசத்தில் வெங்காயத்தை பதுக்கி வைத்ததே விலை உயர்வுக்கு காரணம் என காங்கிரஸ் ஆளும் டெல்லி மாநில உணவுத் துறை அமைச்சர் ஹாரூன் யூசுப் குற்றம்சாட்டியுள்ளார். இது குறித்து அவர் கூறியது: டெல்லியில் நடைபெறவுள்ள சட்டப்பேரவைத் தேர்தலில், பா.ஜ.க. வெங்காய விலை உயர்வு பிரச்னையை முன் நிறுத்த முயலுகிறது. இந்த விலை உயர்வுக்கு பா.ஜ.க. ஆளும் மத்தியப் பிரதேச அரசே காரணம். அந்த மாநிலத்தில் நடைபெறும் பதுக்கலால்தான் வெங்காயத்தின் விலை உயர்ந்துள்ளது. வெங்காய விலை உயர்வை பா.ஜ.க. அரசியலாக்குகிறது. இது மிகவும் துரதிருஷ்டவசமானது. பதுக்கலை தடுப்பதற்கு மத்தியப் பிரதேச அரசு எந்த நடவடிக்கையும் எடுக்கவில்லை. இதை வேண்டும் என்றே அந்த மாநில அரசு செய்கிறது. டெல்லியில் கடந்த 1998-ஆம் ஆண்டு நடைபெற்ற பா.ஜ.க. ஆட்சியில் வெங்காயத்தின் விலை கிலோ ரூ. 80க்கு விற்பனை செய்யப்பட்டது..தற்போது டெல்லி மாநகரம் முழுவதும் நடமாடும் விற்பனை மையங்கள் மூலம் கிலோ ரூ. 60க்கு வெங்காயம் விற்பனை செய்யப்படுகிறது. வெங்காயத்தை உற்பத்தி செய்யும் அனைத்து மாநிலங்களிலும் பதுக்கல் மூலம் செயற்கையாக ஏற்படும் விலை உயர்வைக் கட்டுப்படுத்த அந்தந்த மாநில அரசுகள் நடவடிக்கை எடுக்க வேண்டும் என மத்திய அரசு அறிவுறுத்தி உள்ளது என்றார்.
0 கருத்துகள்:
கருத்துரையிடுக