மாவட்டத்தில் மின் ஆளுமைத் திட்டம் முடங்கியது : "தூங்கி வழியும்' நிர்வாகம் விழிக்குமா

கடலூர்:வெளிப்படையான நிர்வாகத்திற்காக துவங்கப்பட்ட மின் ஆளுமைத் திட்டம், அதிகாரிகளின் மெத்தனப் போக்கினால் முடக்கப்பட்டுள்ளது.மக்களுக்காக அரசு கொண்டு வரும் திட்டங்களை, விரைந்து மக்களுக்கு கொண்டு செல்லும் வகையில் அரசுப் பணிகளை எளிமைப்படுத்தும் வகையிலும், காலதாமதத்தை தவிர்க்கவும் அரசின் அனைத்து துறைகளும் கம்ப்யூட்டர் மயமாக்கும் (மின் ஆளுமைத் திட்டம்) முயற்சி தமிழகத்தில் முதன் முதலாக திருவாரூர் மாவட்டத்தில் மேற்கொள்ளப்பட்டது. அது முழுவெற்றி பெற்றதைத் தொடர்ந்து,
இத்திட்டம் மாநிலம் முழுவதும் விரிவுபடுத்தப் பட்டது.அதன்படி கடந்த 2007-08ம் ஆண்டில் கடலூர் மாவட்டத்தில், இத்திட்டம் முன் மாதிரியாக செயல்படுத்தப்பட்டது. இதற்கான அனைத்து கட்டமைப்பு வசதிகளை தேசிய தகவல் மையம் ஏற்படுத்திக் கொடுத்துள்ளது. இதனை கண்காணிக்கவும், கம்ப்யூட்டரை இயக்குதல் குறித்த பயிற்சி அளிக்க கடலூர் கலெக்டர் அலுவலகத்தில் தேசிய தகவல் மையம் (நிக்) செயல்பட்டு வருகிறது.தேசிய தகவல் மையத்தினர், மாவட்டத்தில் உள்ள அனைத்து துறைகளிலும், கம்ப்யூட்டர் மைய வசதி ஏற்படுத்தி "ஆன்-லைன்' இணைப்பும் ஏற்படுத்திக் கொடுத்ததோடு, இதனை பராமரிப்பது, துறை தகவல்களை பதிவு செய்வது குறித்து ஒவ்வொரு துறைகளிலும் தேர்வு செய்யப்பட்ட ஊழியர்களுக்கு பயிற்சி அளித்தனர்.அதனைத் தொடர்ந்து மாவட்டத்தின் அனைத்து பொது தகவல்கள், சுற்றுலா தலங்கள், ஆன்மிக தலங்கள் மற்றும் ஒவ்வொரு துறைகளிலும் செயல்படுத்தப்படும் திட்டங்கள், அதனை மக்கள் பயன்படுத்திக் கொள்ள மேற்கொள்ள வேண்டிய விதிமுறைகள் குறித்த விவரங்கள், ஒவ்வொரு துறைகளின் உயர் அதிகாரிகள், எம்.பி., எம்.எல்.ஏ., மற்றும் உள்ளாட்சி பிரதிநிதிகளின் பட்டியல், அவர்களது புகைப்படங்கள், அவர்களை தொடர்பு கொள்ள வேண்டிய தொலைபேசி எண்கள், இணையதள முகவரிகள் மாவட்ட இணைய
தளத்தில் பதிவு செய்யப்பட்டது.அப்போது 2005-06ம் நிதியாண்டின் புள்ளி விவரங்கள் பதிவு செய்யப்பட்டது. இது மாவட்ட மக்களுக்கு பெரிதும் பயனுள்ளதாக இருந்தது. அனைத்திற்கும் மேலாக, மாவட்டம் குறித்த புள்ளி விவரங்களை வெளி மாவட்ட, மாநில மற்றும் பிற நாடுகளில் வசிப்பவர்களும் தெரிந்து கொள்ள வசதியாக இருந்தது.
மின் ஆளுமை திட்டத்தில் மாநிலத்தில் முன்னோடி மாவட்டமாக விளங்கிய கடலூர், அதிகாரிகளின் போதிய ஆர்வம் இல்லாத காரணத்தினால், மாவட்டத்தின் முக்கிய தகவல்களை பதிவு செய்யாமல் உள்ளனர்.மாவட்ட எஸ்.பி.,யாக தற்போது ராதிகா பணியில் உள்ளார். ஆனால், இரண்டு ஆண்டுகளுக்கு முன் எஸ்.பி.,யாக இருந்த அஷ்வின் கோட்னீஸ் பெயர், கடலூர் மாவட்ட இணையதளத்தில் உள்ளது. அதேபோன்று, உள் ளாட்சி தேர்தல் முடிந்து இரண்டாண்டு முடியப்போகிறது. ஆனால், இன்னமும் 2006-11ல் இருந்த உள்ளாட்சி பிரதிநிதிகளின் பெயர்களே இடம் பெற்றுள்ளன.இவை அனைத்திற்கும் மேலாக மாவட்டம் குறித்த முன்னுரை பகுதியில் மாவட்ட மக்கள் தொகை உள்ளிட்ட விவரங்கள் அனைத்தும் கடந்த 2001ம் ஆண்டு எடுக்கப்பட்டதேயாகும். கடந்த 2011ல் மக்கள் தொகை கணக்கெடுப்பு நடத்தி அதன் புள்ளி விவரங்கள் வெளியாகி இரண்டாண்டாகியும் மாற்றம் செய்யப்படாமல் உள்ளது. இதேப்போன்று அனைத்து தகவல்களும் தவறாகவே உள்ளதால், மாவட்ட நிர்வாகத்தின் இணையதள சேவை பயனில்லாமல் முடங்கிக் கிடக்கிறது.மின் ஆளுமை திட்டத்தில், மாநிலத்திற்கே முன்னோடியாக இருந்த கடலூர் மாவட்டம், தற்போது அதிகாரிகளின் மெத்தனத்தால், முடக்கப்பட்டுள்ளது. அதனை மீண்டும் உயிர்ப்பிக்க கலெக்டர் விரைந்து நடவøடிக்கை எடுக்க வேண்டியது அவசியமாகும்.