டவுன்ஸ்வில்லே:கடந்த ஆண்டு உலகக் கோப்பையை வென்று ரசிகர்களை பரவசப்படுத்திய இந்திய கிரிக்கெட் அணியை போலவே, இந்திய ஜூனியர் அணியும் ரசிகர்களை பரவசப்படுத்தியுள்ளது. உலகக் கோப்பை இறுதிப் போட்டியில் வென்று மூன்றாவது முறையாக ஜூனியர் உலகக் கோப்பையை கைப்பற்றியுள்ளது இந்திய அணி.ஆஸ்திரேலியாவில் கடந்த 11 ஆம் தேதி, 19 வயதுக்குட்டோருக்கான உலகக் கோப்பை கிரிக்கெட் போட்டிகள் தொடங்கின. 16 அணிகள் பங்கேற்ற இந்தப் போட்டியின், இறுதிப் போட்டிக்கு நடப்பு சாம்பியனான ஆஸ்திரேலியா அணியும், முன்னாள் சாம்பியனான இந்திய அணியும் தகுதிப் பெற்றன.
இன்று நடைபெற்ற கோப்பைக்கான இறுதிப் போட்டியில், டாஸ் வென்ற இந்திய அணி கேப்டன் உன்முக் சந்த் , பந்துவீச்சை தேர்வு செய்தார். இதைத்தொடர்ந்து களமிறங்கிய ஆஸ்திரேலிய அணி, நிர்ணயிக்கப்பட்ட 50 ஓவர்களில், 8 விக்கெட் இழப்புக்கு 225 ரன்கள் எடுத்தது. அதிகப்பட்சமாக அந்த அணியின் கேப்டன் போசிஸ்டோ 87 ரன்கள் எடுத்தார். அபாரமாக பந்துவீசிய இந்தியாவின் சந்தீப் ஷர்மா 4 விக்கெட்டுகளையும், ரவிகாந்த் சிங், பாபா அபராஜித் ஆகியோர் தலா ஒரு விக்கெட்டையும் வீழ்த்தினர்.
இதைத்தொடர்ந்து, 226 ரன்கள் என்ற வெற்றி இலக்கை நோக்கி விளையாடிய இந்திய அணி, ஆரம்பத்தில் அதிர்ச்சி அளித்தது. அணியின் ஸ்கோர் 2 ரன்னாக இருந்தபோது, தொடக்க வீரர் பிரஷாந்த் சோப்ரா, டக் அவுட் ஆனார். பின்னர் வந்த தமிழக வீரர் பாபா அபராஜித், கேப்டன் உன்முக் சந்துடன் இணைந்து நிதானமான ஆட்டத்தை வெளிப்படுத்தினார்.
பாபா அபராஜித் 33 ரன்களில் ஆட்டமிழந்ததைத் தொடர்ந்து, பின்னர் வந்த வீரர்கள் அடுத்தடுத்து ஆட்டமிழந்தனர். ஒருகட்டத்தில் 97 ரன்களுக்கு 4 விக்கெட்டுகளை இழந்து சிறிது தடுமாற்றம் அடைந்த இந்திய அணியை, கேப்டன் உன்முக் சந்துடன் இணைந்து, வெற்றிப் பாதைக்கு அழைத்து சென்றார் ஸ்மித் படேல். ஒரு முனையில் கேப்டன் உன்முக் சந்த் சதம் விளாச, மறுமுனையில் ஸ்மித் படேல் அரைசதம் கடந்தார். இதன்மூலம், 14 பந்துகள் மீதமிருந்த நிலையில், 4 விக்கெட் இழப்புக்கு 227 ரன்களை எடுத்து, ஆஸ்திரேலியாவிடம் இருந்து கோப்பையை தட்டிப் பறித்தது இந்திய அணி.
இந்திய ஜூனியர் அணி வெல்லும் மூன்றாவது உலகக் கோப்பை இதுவாகும். கடந்த 1987 ஆம் ஆண்டு முதல் நடைபெற்று வரும் ஜூனியர் உலகக் கோப்பை கிரிக்கெட் போட்டியில், 1999- இரண்டாயிரமாவது ஆண்டு உலகக் கோப்பையை மொஹமது கைஃப் தலைமையிலும், 2007-2008 ஆம் ஆண்டுக்கான உலகக் கோப்பையை விராட் கோஹ்லி தலைமையிலும் இந்திய அணி கைப்பற்றியது.
இந்த ஆண்டு இந்திய அணிக்கு உலகக் கோப்பையை பெற்று தந்த கேப்டன் உன்முக் சந்த், ஆட்டநாயகன் விருதை பெற்றார். இந்த தொடரில் 276 ரன்கள் குவித்த ஆஸ்திரேலிய கேப்டன் போசிஸ்ட்டுக்கு தொடர் நாயகன் விருது வழங்கப்பட்டது.
0 கருத்துகள்:
கருத்துரையிடுக