பரங்கிப்பேட்டை அன்னங்கோவிலில் முகத்துவாரத்தில் முறையாக ஆழப்படுத்தவில்லை ரூ.10 கோடி அம்பேல்

பரங்கிப்பேட்டை:பரங்கிப்பேட்டை அன்னங்கோவில் முகத்துவாரத்தை கடந்த ஆண்டு நிரந்தரமாக ஆழப்படுத்த 10 கோடி ரூபாய் செலவு செய்தும் ஒரே ஆண்டில் மீண்டும் முகத்துவாரத்தில் மீன் பிடி படகுகள் சிக்கும் அவலம் ஏற்பட்டுள்ளது. இதனால் முகத்துவாரம் முறையாக ஆழப்படுத்தப்பட்டுள்ளதா என்பதை அதிகாரிகள் குழுவினர் ஆய்வு செய்ய வேண்டும் என மீனவர்கள் கோரிக்கை விடுத்துள்ளனர்.

பரங்கிப்பேட்டை அன்னங்கோவிலில் முகத்துவாரம் உள்ளது. இந்த முகத்துவாரம் வழியாகத்தான் பரங்கிப்பேட்டை மற்றும் கிள்ளையைச் சுற்றியுள்ள மீனவ கிராமங்களான முடசல் ஓடை, முழுக்குத்துறை, புதுப்பேட்டை, புதுக்குப்பம், சாமியார்பேட்டை உட்பட 30க்கும் மேற்பட்ட கிராமங்களை சேர்ந்த மீனவர்கள் படகில் கடலுக்குள் சென்று மீன் பிடிக்கச் செல்ல வேண்டும்.இந்த அன்னங்கோவில் முகத்துவாரம் அடிக்கடி தூர்ந்து போனதால் மீனவர்கள் கடலுக்குள் சென்று மீன் பிடிக்க முடியாத நிலை ஏற்பட்டது. இதனால் மீனவர்கள் அன்னங்கோவில் முகத்துவாரத்தை நிரந்தரமாக ஆழப்படுத்தக்கோரி கடந்த 20 ஆண்டிற்கும் மேலாக அரசுக்கு கோரிக்கை வைத்து வந்தனர். இந்நிலையில் கடந்த ஒரு ஆண்டிற்கு முன்பு உலக வங்கி நிதி மூலம் 10 கோடி ரூபாய் செலவில் அன்னங்கோவில் முகத்துவாரம் நிரந்தரமாக ஆழப்படுத்தும் பணி நடந்தது.

முறையாக ஆழப்படுத்தாததால் தற்போது முகத்துவாரம் வழியாக கடலுக்குள் சென்று மீன் பிடித்து விட்டு கரைக்குத் திரும்பும் படகுகள் முகத்துவாரத்தில் தரை தட்டி சிக்கிக் கொள்கிறது. இவ்வாறு சிக்கும் படகுகளை மற்ற படகுகள் மூலம் கரைக்குக் கட்டி இழுத்துச் செல்லும் நிலை ஏற்படுகிறது.பணி முடிந்து ஒரு ஆண்டிலேயே படகுகள் முகத்துவாரத்தில் சிக்கிக்கொள்ளும் நிலை ஏற்பட்டுள்ளது. முகத்துவாரத்தை போதுமான அளவிற்கு ஆழப்படுத்தாமல் கடமைக்காக ஆழப்படுத்தியுள்ளதாக பாதிக்கப்பட்டுள்ள மீனவர்கள் புலம்புகின்றனர். 10 கோடி ரூபாய் செலவில் முகத்துவாரம் ஆழப்படுத்தப்படுத்தும் பணி தண்ணீருக்கு உள்ளே செய்யப்பட்டதால் யாரும் கண்டுகொள்ள மாட்டார்கள் என நினைத்து போதுமான அளவிற்கு ஆழப்படுத்தப்படவில்லை என மீனவர்கள் குற்றம்சாட்டியுள்ளனர்.முகத்துவாரம் போதுமான அளவிற்கு ஆழப்படுத்தப்பட்டதா என மீன் வளத்துறை உயர் அதிகாரிகள் கொண்ட குழுவினர் ஆய்வு செய்து உரிய நடவடிக்கை எடுக்க வேண்டும் என மீனவர்கள் கோரிக்கை விடுத்துள்ளனர்.