புதுடெல்லி:மத்திய அரசின் ஹஜ் ஒதுக்கீட்டை உச்சநீதிமன்றம் வெட்டிக் குறைத்துள்ளது. இதன் மூலம் மத்திய அரசு பரிந்துரைக்கும் நபர்களின் எண்ணிக்கை 300 ஆக குறைந்துள்ளது. 5050 எண்ணிக்கையிலான ஒதுக்கீட்டை உச்சநீதிமன்றம் 300 ஆக குறைத்துள்ளது குறிப்பிடத்தக்கது.
2012-ஆம் ஆண்டு வி.ஐ.பிக்களுக்கு பரிந்துரைக்கும் ஒதுக்கீட்டின்
எண்ணிக்கையை தாக்கல் செய்யுமாறு முன்னர் உச்சநீதிமன்றம் உத்தரவிட்டிருந்தது. இதன் அடிப்படையில் மத்திய அரசு தாக்கல் செய்த எண்ணிக்கையை உச்சநீதிமன்ற நீதிபதிகளான அஃப்தாப் ஆலம் , ரஞ்சனா பிரகாஷ் ஆகியோர் அடங்கிய பெஞ்ச் வெட்டிக் குறைத்து உத்தரவிட்டது.
உச்சநீதிமன்றத்தின் புதிய உத்தரவின்படி குடியரசு தலைவருக்கு 100 பேரையும், துணை குடியரசு தலைவர் மற்றும் பிரதமருக்கு 75 பேர் வீதமும் பரிந்துரை செய்யலாம். வெளியிறவுத்துறை அமைச்சருக்கு 50 பேரை பரிந்துரைக்கலாம். மேலும் மத்திய ஹஜ் கமிட்டிக்கு 200 இடங்களை ஒதுக்கவும் உச்சநீதிமன்றம் உத்தரவிட்டது.
வி.ஐ.பி ஒதுக்கீட்டை குறைத்த உச்சநீதிமன்றம் மீதமுள்ள இடங்களை பல்வேறு மாநில ஹஜ் கமிட்டிகளுக்காக ஒதுக்குமாறு உத்தரவிட்டது.
புனித ஹஜ்ஜிற்காக தனியாக ஒதுக்கீடு மத்திய அரசுக்கு தேவையில்லை என உச்சநீதிமன்றம் கூறியது. இதுத் தொடர்பாக ஏதேனும் வழக்குகளை எந்த மாநில உயர்நீதிமன்றங்களும் ஏற்றுக்கொள்ள கூடாது என்றும், அவ்வழக்குகளை உச்சநீதிமன்றத்திற்கு அனுப்பவேண்டும் என்றும் நீதிபதிகள் தங்களது உத்தரவில் தெரிவித்தனர்.
கடந்த ஏப்ரல் 30-ஆம் தேதி அரசியல் வாதிகள் அரசு செலவில் ஹஜ்ஜிற்கு செல்ல வேண்டாம் என்றும், சொந்த செலவில் ஹஜ்ஜிற்கு சென்றால் போதும் என்றும் உச்சநீதிமன்றம் கூறியிருந்தது.
வருடந்தோறும் ஹஜ்ஜிற்கு பிரதமரின் நல்லெண்ணக்குழு செல்வதை நிறுத்தவும் நீதிபதிகள் உத்தரவிட்டிருந்தனர். ஹஜ் நல்லெண்ணக் குழுவில் நான்கு பேர் போதுமென்றும், நான்கு, ஐந்து ஆண்டுகளில் ஹஜ்ஜிற்கு நல்லெண்ணக் குழுவை அனுப்புவதை முற்றிலும் நிறுத்தவேண்டும் என்றும் உச்சநீதிமன்றம் தீர்ப்பளித்திருந்தது.
0 கருத்துகள்:
கருத்துரையிடுக