SSLC தேர்வு முடிவு கடலூர் மாவட்டத்தில் 81.10 சதவீதம் தேர்ச்சி

கடலூர்: முதன் முதலாக சமச்சீர் கல்வி பாடத்திட்டத்தினை பயின்று கடலூர் மாவட்டத்தில் பத்தாம் வகுப்பு அரசு பொதுத் தேர்வு எழுதிய மாணவர், மாணவியர்கள் 81.10 சதவீதம் தேர்ச்சி பெற்றுள்ளனர். இது கடந்த ஆண்டை விட 2.25 சதவீதம் தேர்ச்சி சதவீதம் கூடுதலாகும்.
சமச்சீர் கல்வித் திட்டத்தின் கீழ் முதன்முதலாக கடந்த கல்வியாண்டு பத்தாம் வகுப்பு அரசு பொது தேர்வுகளின் கீழ் கடலூர் மாவட்டத்தில் 18 ஆயிரத்து 572 மாணவர்களும், 19 ஆயிரத்து 89 மாணவிகளும் மொத்தம் 37 ஆயிரத்து 661 பேர் தேர்வு எழுதினர். நேற்று இணையதளங்கள் மூலமாக தேர்வு முடிவுகள் வெளியாகின. கடலூர் மாவட்டத்தில் தேர்வு எழுதிய மாணவ, மாணவிகளில் 14 ஆயிரத்து 731 மாணவர்களும், 15 ஆயிரத்து 813 மாணவிகளும் என மொத்தம் 30 ஆயிரத்து 544 பேர் தேர்ச்சி பெற்றனர். தேர்ச்சி சதவீதம் 81.10 சதவீதம் ஆகும். கடந்த ஆண்டு தேர்ச்சி சதவீதமான 78.85 சதவீதத்தை விட இந்த ஆண்டு 2.25 சதவீதம் கூடுதலாகும். மாணவர்களின் தேர்ச்சி 79.32 சதவீதமாகும். மாணவிகளின் தேர்ச்சி 82.84 ஆகும்.
கடலூர் மாவட்டத்தில் பத்தாம் வகுப்பு அரசு பொதுத் தேர்வு எழுதிய 321 பள்ளிகளில் 66 பள்ளிகள் நூற்றுக்கு நூறு சதவீதம் வெற்றி பெற்று சாதனை படைத்துள்ளன. தானே புயல் உள்ளிட்ட இடர்பாடுகளை கடந்து கடலூர் மாவட்ட மாணவர்கள் சிறப்பான தேர்ச்சி விகிதம் பெற்றிருப்பது பாராட்டுக்குறியது.
இருந்த போதிலும் இந்த கல்வியாண்டில் இதை விட சிறப்பான வெற்றியை பெற அனைத்து பள்ளிகளும் ஆரம்பத்திலிருந்து கடுமையாக உழைக்க வேண்டுமென முதன்மை கல்வி அலுவலர் ஜோசப்அந்தோணிராஜ் கூறினார்.