கடந்த 5 மாதங்களுக்குப் பின்னர் கடலூரில் ஒரு மணி
நேரம் பலத்த மழை பெய்ததால் பொதுமக்கள் மகிழ்ச்சி அடைந்துள்ளனர்.
கடந்த டிசம்பர் மாதம் புயல் தாக்கிய பின்னர்
கடலூர் மற்றும் மாவட்டத்தின் பல பகுதிகளில் மழை பெய்யவில்லை. ஒரு சில இடங்களில்
லேசாக பெய்த மழையால் வெப்பம் வெளியேறி பொதுமக்கள் பாதிக்கப்பட்டனர்.
கடலூர் மாவட்டத்தில் புயல் தாக்கியதில் 80
சதவீதத்துக்கும் மேலான மரங்கள் முற்றிலும் அழிந்தன. எஞ்சிய மரங்கள் கிளைகளை இழந்து
மொட்டையாக நிற்கின்றன.
மரங்கள் சேதம் அடைந்ததால் கோடை காலத்தில்
வெப்பத்தின் தாக்கம் அதிக அளவில் இருந்தது.
எக்காலத்திலும் இல்லாத அளவில் கடலூர்
மாவட்டத்தில் 106 டிகிரிக்கும் மேல் வெயில் காய்ந்தது. மேலும் கடல் காற்றும்
இல்லாததால் பொதுமக்கள் மிகவும் சிரமம் அடைந்தனர். கத்திரி வெயில் முடிந்தும்
வியாழக்கிழமை வரையில் கடலூர் மாவட்டத்தில் 104 டிகிரி வெயில் அடித்துள்ளது.
வெள்ளிக்கிழமை வழக்கம் போல் காலை முதல் மாலை 5
மணி வரையில் வெயிலின் கடுமை அதிகரித்து காணப்பட்டது.
இந்நிலையில் 7.30 மணி அளவில் கடலூர் மற்றும்
பண்ருட்டி பகுதியில் மழை பெய்தது.
கடலூரில் ஒரு மணி நேரம் மழை வெளுத்து வாங்கியது,
சாலைகளில் தண்ணீர் பெருக்கெடுத்து ஓடியது.பண்ருட்டியில் 15 நிமிடம் மழை
பெய்தது.
0 கருத்துகள்:
கருத்துரையிடுக