நிலம் கையகப்படுத்தும் அவசர சட்டத்தை எதிர்த்து தமிழ்நாடு விவசாயிகள் சங்கத்தினர் பேரணி,ஆர்ப்பாட்டம்

கடலூர்:நிலம் கையகப்படுத்தும் அவசர சட்டத்தை எதிர்த்து கடலூரில் தமிழ்நாடு விவசாயிகள் சங்கத்தினர் பாலகிருஷ்ணன் எம்.எல்.ஏ. தலைமையில் பேரணி– ஆர்ப்பாட்டம் நடத்தினர்.

விவசாயிகளின் விளை நிலங்களை அபகரிக்கும் நிலம் கையகப்படுத்தும் அவசர சட்டத்தை எதிர்த்தும், நெய்வேலி என்.எல்.சி. நிறுவனத்துக்கு நிலம் மற்றும் வீடு கொடுத்தவர்களுக்கும், தற்போது கொடுக்க இருப்பவர்களுக்கும் சட்டப்படி காலியாக உள்ள பணியிடங்களில் விவசாயிகளின் வாரிசுகளுக்கு வீட்டுக்கு ஒருவருக்கு வேலை வழங்க வேண்டும்,
என்.எல்.சி.க்கு வீடு மற்றும் நிலம் கொடுத்த அனைத்து விவசாயிகளுக்கும் கூடுதல் இழப்பீடு தொகை வழங்க வேண்டும் என்பன உள்பட பல்வேறு கோரிக்கைகளை வலியுறுத்தி கடலூரில் நேற்று தமிழ்நாடு விவசாயிகள் சங்கத்தினர் பேரணி நடத்தினர்.

கடலூர் உழவர் சந்தை அருகில் இருந்து கலெக்டர் அலுவலகம் நோக்கி புறப்பட்ட பேரணிக்கு தமிழ்நாடு விவசாயிகள் சங்க மாநில தலைவர் பாலகிருஷ்ணன் எம்.எல்.ஏ. தலைமை தாங்கினார். இதில் தமிழ்நாடு விவசாயிகள் சங்க நிர்வாகிகள், விவசாயிகள் கையில் கரும்புகளுடன் கலந்து கொண்டனர். பேரணி அண்ணாபாலம், பாரதிசாலை வழியாக சென்று கடலூர் கலெக்டர் அலுவலகம் அருகில் முடிவடைந்தது.
அதைத்தொடர்ந்து கலெக்டர் அலுவலக சாலையில் நின்று கொண்டு விவசாயிகள் சங்கத்தினர் ஆர்ப்பாட்டம் நடத்தினர். ஆர்ப்பாட்டத்துக்கு பாலகிருஷ்ணன் எம்.எல்.ஏ. தலைமை தாங்கி பேசினார்.
அப்போது அவர் கூறியதாவது:–

விவசாயிகளின் வாழ்வாதாரத்தை பாதிக்கும் நிலம் கையகப்படுத்தும் அவசர சட்டத்தை மத்திய அரசு திரும்ப பெற வேண்டும். இந்த சட்டத்தில் விவசாயிகள் கடுமையாக பாதிக்கப்படுவார்கள். என்.எல்.சி. நிறுவனத்துக்கு வீடு, நிலம் கொடுத்த விவசாயிகள் அகதிகளை போல அலைந்து வருகிறார்கள். ஆகவே அவர்களுக்கு உரிய இழப்பீடு வழங்க வேண்டும்.
கடலூர் மாவட்டத்தில் தனியார் சர்க்கரை ஆலைகள் விவசாயிகளுக்கு வழங்க வேண்டிய நிலுவை தொகையை இது வரை வழங்காமல் உள்ளது. ஆகவே கரும்பு விவசாயிகளின் நலன்கருதி நிலுவை தொகையை உடனடியாக வழங்க மாவட்ட நிர்வாகம் நடவடிக்கை எடுக்க வேண்டும். இல்லையென்றால் தங்கள் கோரிக்கை நிறைவேறும் வரை கலெக்டர் அலுவலகத்தை விட்டு வெளியேறமாட்டோம் என்று போராட வேண்டிய நிலைக்கு தள்ளப்படுவார்கள்.
தூர்வார வேண்டும்
போதிய தண்ணீர் இல்லாததால் சிதம்பரம், காட்டுமன்னார்கோவில் டெல்டா பகுதி விவசாயிகள் குறுவை சாகுபடி செய்ய முடியாத நிலை ஏற்பட்டுள்ளது. ஆகவே மேட்டூரில் இருந்து தண்ணீர் திறக்க தமிழக அரசு நடவடிக்கை எடுக்க வேண்டும். அதேபோல் கடலூர் மாவட்ட ஏரி, பாசன வாய்க்கால்களை முழுமையாக தூர்வார வேண்டும்.என்று  பாலகிருஷ்ணன் எம்.எல்.ஏ. பேசினார்.