சிதம்பரம் அருகே சி.முட்லூரில் அரசு கலைக்கல்லூரி உள்ளது. இந்த கல்லூரியில் சிதம்பரம், புவனகிரி, பரங்கிப்பேட்டை, கிள்ளை மற்றும் அதனை சுற்றியுள்ள கிராம புறங்களில் இருந்து ஏராளமான மாணவ–மாணவிகள் படித்து வருகின்றனர். இந்த நிலையில் மாணவர்கள் கல்லூரிக்கு சென்று வர போதுமான பஸ் வசதிகளை செய்து கொடுக்க சம்பந்தப்பட்ட அதிகாரிகள் நடவடிக்கை எடுக்கவில்லை. இதனால் மாணவர்கள் குறித்த நேரத்திற்கு கல்லூரிக்கு சென்று வர முடியாமல் பெரும் அவதி அடைந்தனர். இது குறித்து மாவட்ட நிர்வாகத்திடம் மாணவர்கள் பல முறை புகார் அளித்தனர். எனினும் எந்தவித நடவடிக்கையும் எடுக்கப்படவில்லை. இந்த நிலையில் கல்லூரி மாணவர்கள் நேற்று சிதம்பரம்–சி.முட்லூர் புறவழிச்சாலையில் ஒன்று திரண்டனர். பின்னர் அவர்கள் தங்களுக்கு போதுமான அளவிற்கு பஸ் வசதிகளை உடனடியாக செய்து கொடுக்க வேண்டும் என கோரி திடீரென சாலை மறியலில் ஈடுபட்டனர்.
பேச்சுவார்த்தை
இது பற்றிய தகவல் அறிந்ததும் கிள்ளை சப்–இன்ஸ்பெக்டர் நாகராஜ் தலைமையிலான போலீசார் சம்பவ இடத்திற்கு சென்று மறியலில் ஈடுபட்ட மாணவர்களுடன் பேச்சுவார்த்தை நடத்தினர். அப்போது மாணவர்கள் பஸ் வசதி இன்றி நாங்கள் பெரும் சிரமம் அடைந்து வருகின்றோம். புறவழிச்சாலையில் செல்லும் பஸ்கள் கூட எங்களது கல்லூரியில் நின்று செல்வது இல்லை என கூறினர். இதை கேட்ட போலீசார் இது குறித்து சம்பந்தப்பட்ட அதிகாரிகளிடம் தெரிவித்து நடவடிக்கை எடுக்கப்படும் என்றனர். இதையடுத்து மாணவர்கள் மறியலை கைவிட்டு கலைந்து சென்றனர். இந்த சம்பவத்தால் சி.முட்லூர் சாலையில் 15 நிமிடங்கள் போக்குவரத்து பாதிப்பு ஏற்பட்டது.
0 கருத்துகள்:
கருத்துரையிடுக