துபை ஓபன் டென்னிஸ்: ரோஜர் பெடரர் சாம்பியன்!

துபை: துபை ஓபன் டென்னிஸ் தொடரின் ஒற்றையர் பிரிவில் சுவிட்சர்லாந்தின் ரோஜர் பெடரர் கிண்ணத்தை கைப்பற்றினார். துபையில் ஆண்களுக்கான சர்வதேச டென்னிஸ் சாம்பியன்ஷிப் தொடர் நடந்தது. இதன் ஆண்கள் ஒற்றையர் பிரிவு இறுதிச்சுற்றில் ‘நம்பர்–8’ வீரர் சுவிட்சர்லாந்தின் ரோஜர் பெடரர், தரவரிசையில் 6வது இடத்திலுள்ள செக் குடியரசின் தாமஸ் பெர்டிச்சை சந்தித்தார். முதல் செட்டை 3–6 என இழந்த பெடரர், அடுத்த செட்டை 6–4 என வென்று பதிலடி கொடுத்தார். வெற்றியாளரை நிர்ணயிக்கும் மூன்றாவது செட்டில் அசத்திய பெடரர் 6–3 என கைப்பற்றினார். முடிவில் ரோஜர் பெடரர் 3–6, 6–4, 6–3 என்ற செட் கணக்கில் வெற்றி பெற்று சாம்பியன் பட்டத்தை தட்டிச் சென்றார். இத்தொடரில் பெடரர் வெல்லும் 6வது பட்டம் இதுவாகும்.