புதுடெல்லி: தேர்தல் கருத்துக் கணிப்புகளை சில ஆய்வு மற்றும் ஊடக நிறுவனங்கள் திரித்து வெளியிடுவதாக காங்கிரஸ் கூறி வரும் குற்றச்சாட்டின் மீது உரிய நடவடிக்கை எடுக்கும்படி, மத்திய அரசுக்கு தேர்தல் ஆணையம் கடிதம் எழுதியுள்ளது.
இது தொடர்பாக இந்திய தேர்தல் ஆணையத்தின் முதன்மைச் செயலாளர் கே. அஜயகுமார், மத்திய நிறுவன விவகாரத் துறை அமைச்சகத்துக்கும், தகவல் மற்றும் ஒலிபரப்புத் துறை அமைச்சகத்துக்கும் எழுதியுள்ள கடிதத்தில் கூறியிருப்பதாவது:
தேர்தல் கருத்துக் கணிப்புகள் திரித்து வெளியிடப்படுவதில் சதி இருப்பதாக குற்றச்சாட்டு எழுந்துள்ளது. மேலும், சிலர் முறைகேடாக பணம் பெற்றுக் கொண்டு, மக்களை திசை திருப்பும் வகையில் தவறான செய்திகளை வெளியிடுவதாகவும் புகார் கூறப்படுகிறது.
எனவே, மேற்கண்ட புகார் மீது உரிய அவசர நடவடிக்கை மேற்கொள்வது அவசியமாகும். இது தொடர்பாக காங்கிரஸ் கட்சியிடமிருந்து புகார் பெறப்பட்டுள்ளது.
சில நிறுவனங்கள் நடத்திய தேர்தல் கருத்துக் கணிப்புகள் தொடர்பாக ரகசிய நடவடிக்கை மேற்கொள்ளப்பட்டதில், சில நிறுவனங்கள் தேர்தல் கருத்துக் கணிப்புகளை திரித்து வெளியிடுவதற்காக குறிப்பிட்ட கட்சிகளிடம் இருந்து பணம் பெற்றுக் கொள்ள ஒப்புக் கொண்டதாக புகார் மனுவில் கூறப்படுகிறது என்று அந்தக் கடிதத்தில் குறிப்பிடப்பட்டுள்ளது.
தேர்தல் கருத்துக் கணிப்புகளை திரித்து வெளியிடும் சில முன்னணி நிறுவனங்கள் மீது காங்கிரஸ் கடந்த புதன்கிழமை தேர்தல் ஆணையத்திடம் புகார் செய்தது. அப்போது, “இது தொடர்பாக போலீஸில் புகார் கொடுத்து, மேற்கண்ட நபர்கள் மீது குற்ற வழக்குப் பதிவு செய்து நடவடிக்கை எடுக்க வேண்டும். மேலும், இதுபோன்ற செயல்களில் ஈடுபடும் கட்சிகள் தேர்தலில் போட்டியிட முடியாதவாறு தடை விதிக்க வேண்டும்’ என்று தேர்தல் ஆணையத்திடம் காங்கிரஸ் கேட்டுக் கொண்டது குறிப்பிடத்தக்கது.
இந்நிலையில், இந்த விவகாரம் தொடர்பாக தேர்தல் ஆணையம் மத்திய அரசுக்கு கடிதம் எழுதியுள்ளதற்கு அகில இந்திய காங்கிரஸ் கட்சியின் சட்ட மற்றும் மனித வளச் செயலாளர் கே.சி. மித்தல் மகிழ்ச்சி தெரிவித்துள்ளார். இது குறித்து அவர் கூறுகையில், தேர்தல் ஆணையத்தின் நடவடிக்கையால், கருத்துக் கணிப்பு முடிவுகளை திரித்து வெளியிட்ட நிறுவனங்களுக்கும், அவ்வாறு வெளியிடச் செய்த கட்சிகளுக்கும் இடையிலான கூட்டணியும், இதற்குப் பின்னணியில் உள்ள முறைகேடுகளும் அம்பலமாகும்.
மேலும், சில குறிப்பிட்ட தனி நபர்களையும், குறிப்பிட்ட கட்சிகளையும் முன்னிறுத்தி, மக்களை திசை திருப்ப கருத்துக் கணிப்புகளை திரித்து வெளியிடச் செய்யும் அவர்களின் மோசடியும் அம்பலமாகும் என்றார்
0 கருத்துகள்:
கருத்துரையிடுக